"ஜெயலலிதாவைப் போலவே விஜய்" - தவெகவில் இணைந்த பின் உடுமலை ராதாகிருஷ்ணன் பேச்சு!

அதிமுகவின் முன்னாள் அமைச்சரும், முக்கிய நிர்வாகியுமான உடுமலை ராதாகிருஷ்ணன் தமிழக வெற்றிக் கழகத்தில் முறைப்படி தன்னை இணைத்துக் கொண்ட பின்னர் செய்தியாளர்களைச் சந்தித்துப் பேசியது பெரும் விவாதத்தை ஏற்படுத்தியுள்ளன.

மாற்றுக்கட்சியில் இணைந்ததற்கான காரணத்தையும், தங்களது கடந்த கால அரசியல் சூழ்நிலையையும் உடுமலை ராதாகிருஷ்ணன் விவரித்துள்ளார். "கடந்த 9 ஆண்டு காலமாக எங்குச் செல்வது, என்ன செய்வது என்று திசை தெரியாத ஒரு சூழ்நிலையில் நாங்கள் இருந்து வந்தோம். தமிழக வெற்றிக் கழகத்தில் இணைந்திருப்பதன் மூலமாக, ஒரு தெளிவான புதிய அரசியல் பயணத்தை நாங்கள் தொடங்கியுள்ளோம்" என்று குறிப்பிட்டுள்ளார்.

"தமிழக மக்கள் மறைந்த முன்னாள் முதலமைச்சர் ஜெயலலிதாவை எத்தகைய ஆளுமையுடன் பார்த்தார்களோ, அதே போலவே தற்போதைய தமிழக முதலமைச்சர் விஜயையும் பார்க்கின்றனர். மக்கள் மத்தியில் அவருக்கான ஆதரவு அந்த அளவிற்குப் பிரம்மாண்டமாக உள்ளது." வரவிருக்கும் தேர்தல் களப் பணிகள் குறித்தும், தவெக தலைமையின் முடிவுகள் குறித்தும் அவர் தனது இலக்கை வெளிப்படுத்தியுள்ளார்:

தமிழகத்தில் அடுத்து வரவிருக்கும் உள்ளாட்சித் தேர்தலில், மாநிலம் முழுவதிலும் உள்ள அனைத்துப் பகுதிகளிலும் தமிழக வெற்றிக் கழகம் மிகப்பெரிய வெற்றியைப் பெறுவதற்குக் களத்தில் நின்று தீவிரமாகப் பாடுபடுவோம் என்று உறுதியளித்துள்ளார். தங்களை நம்பித் தமிழக வெற்றிக் கழகத்தில் இணைத்துக் கொண்டு, புதிய அரசியல் வாய்ப்பினை வழங்கிய முதலமைச்சர் விஜய்க்குத் தனது நெஞ்சார்ந்த நன்றியினையும் அவர் இச்சந்திப்பில் தெரிவித்துக் கொண்டார்.

அதிமுகவின் மூத்த நிர்வாகிகள் அடுத்தடுத்து தவெகவில் இணைந்து வருவது, தமிழகத்தின் தற்போதைய அரசியல் களத்தில் ஒரு முக்கிய மைல்கல்லாகப் பார்க்கப்படுகிறது.