குழந்தைகளிடம் விஜய் உருக்கமான வேண்டுகோள்... "வீட்டில் சொல்லி விசில் சின்னத்திற்கு ஓட்டுப் போடுங்க!"

தமிழக சட்டமன்ற தேர்தல் களம் சூடுபிடித்துள்ள நிலையில், தவெக தலைவர் விஜய் குழந்தைகளைக் குறிவைத்து ஒரு புதிய பிரசார வியூகத்தைக் கையில் எடுத்துள்ளார். பிரசாரத்தின் போது தன்னைச் சந்திக்க வரும் சிறுவர்களிடம் மிகவும் கனிவாகப் பேசி வரும் அவர், தங்களது பெற்றோர்களிடம் சொல்லி தனது கட்சியின் 'விசில்' சின்னத்திற்கு வாக்களிக்க வலியுறுத்துமாறு உருக்கமான வேண்டுகோள் விடுத்துள்ளார். எதிர்கால சந்ததியினரான குழந்தைகளின் நலனுக்காகவே தான் அரசியலுக்கு வந்துள்ளதாகவும், அவர்களின் ஒளிமயமான வாழ்விற்கு விசில் சின்னமே சரியான தேர்வு என்றும் அவர் சுட்டிக்காட்டியுள்ளார்.

குழந்தைகளிடம் பேசும்போது அவர்களின் கல்வி மற்றும் விளையாட்டு ஆர்வங்கள் குறித்துக் கேட்டறிந்த விஜய், தமிழகத்தில் ஒரு பெரிய அரசியல் மாற்றத்தைக் கொண்டு வர சிறுவர்களின் பங்கு மிக முக்கியமானது எனத் தெரிவித்தார். "வீட்டிற்குச் சென்றதும் உங்கள் அப்பா, அம்மா மற்றும் தாத்தா, பாட்டியிடம் சொல்லுங்கள்... இந்த முறை அவர்கள் அனைவரும் மறக்காமல் விசில் சின்னத்திற்குத் தான் ஓட்டுப் போட வேண்டும்" என அவர் அன்புடன் கட்டளையிட்டார். விஜய்யின் இந்த மாறுபட்ட அணுகுமுறை பிரசாரக் களத்தில் இருந்த தொண்டர்கள் மற்றும் பொதுமக்களிடையே பெரும் நெகிழ்ச்சியை ஏற்படுத்தியது.

சினிமாப் பாடல்களில் வரும் 'விசில் போடு' என்ற வரியைப் போலவே, நிஜ வாழ்விலும் இந்த விசில் சின்னம் மக்களின் இதயங்களில் நீங்கா இடம் பிடிக்கும் என விஜய் நம்பிக்கை தெரிவித்துள்ளார். ஏற்கனவே பெண்கள் மற்றும் இளைஞர்களிடையே பெரும் ஆதரவு பெற்றுள்ள நிலையில், தற்போது குழந்தைகளிடமும் அவர் நெருக்கத்தை ஏற்படுத்தி வருவது மற்ற அரசியல் கட்சிகளுக்குப் பெரும் சவாலாகப் பார்க்கப்படுகிறது. வரும் ஏப்ரல் 23 ஆம் தேதி நடைபெறவுள்ள தேர்தலில், இந்த 'குழந்தைகள் பாசம்' வாக்குகளாக மாறுமா என்பதைப் பொறுத்திருந்துதான் பார்க்க வேண்டும்.