ஆட்சியமைக்க உரிமை கோருகிறார் விஜய்... நாளை ஆளுநருடன் முக்கிய சந்திப்பு!

தமிழக சட்டமன்றத் தேர்தலில் 108 இடங்களைக் கைப்பற்றி தனிப்பெரும் கட்சியாக உருவெடுத்துள்ள தமிழக வெற்றிக் கழகத்தின் தலைவர் விஜய், நாளை (மே 6) ஆளுநர் ஆர்.வி. அர்லேகரைச் சந்தித்து ஆட்சியமைக்க உரிமை கோர உள்ளார். இதற்காக இன்று காலை பனையூரில் உள்ள கட்சி அலுவலகத்தில் நடைபெற்ற ஆலோசனைக் கூட்டத்தில், தவெக சட்டமன்றக் கட்சித் தலைவராக விஜய் ஒருமனதாகத் தேர்ந்தெடுக்கப்பட்டார். வெற்றி பெற்ற எம்.எல்.ஏ-க்கள் அனைவரும் அவருக்குத் தங்களது முழு ஆதரவை வழங்கியுள்ளனர்.

தமிழகத்தில் ஆட்சியமைக்கத் தேவையான பெரும்பான்மைக்கு 118 இடங்கள் தேவை என்ற நிலையில், 108 இடங்களைப் பெற்றுள்ள தவெக-விற்குச் சில கட்சிகள் ஆதரவளிக்க முன்வந்துள்ளன. குறிப்பாக, கம்யூனிஸ்ட் கட்சிகள், விடுதலைச் சிறுத்தைகள் மற்றும் காங்கிரஸ் உள்ளிட்ட கட்சிகள் விஜய்யின் ஆட்சிக்குத் தங்களது ஆதரவை வழங்க வாய்ப்புள்ளதாக அரசியல் வட்டாரங்கள் தெரிவிக்கின்றன. இதற்கிடையில், ஆட்சியமைக்க அழைப்பு விடுக்குமாறு ஆளுநருக்குத் தவெக சார்பில் ஏற்கனவே மின்னஞ்சல் மூலம் கடிதம் அனுப்பப்பட்டுள்ளது.

இந்தத் தேர்தலில் திமுக கூட்டணி 73 இடங்களிலும், அதிமுக கூட்டணி 53 இடங்களிலும் வெற்றி பெற்றுள்ள நிலையில், தமிழகத்தில் ஒரு மிகப்பெரிய அரசியல் மாற்றம் நிகழ்ந்துள்ளது. ஆளுநரின் சந்திப்பிற்குப் பிறகு, விஜய் தமிழகத்தின் அடுத்த முதலமைச்சராகப் பதவியேற்கும் தேதியும், அதற்கான ஏற்பாடுகளும் அதிகாரப்பூர்வமாக அறிவிக்கப்படும் என எதிர்பார்க்கப்படுகிறது. 59 ஆண்டுகால திராவிட அரசியலுக்குப் பிறகு, ஒரு புதிய அரசியல் சக்தியாகத் தவெக ஆட்சிக் கட்டிலில் அமரவுள்ளது ஒட்டுமொத்தத் தமிழகத்தின் கவனத்தையும் ஈர்த்துள்ளது.