கோட்டையை நோக்கித் தளபதி... முதல்வராகப் பதவியேற்க நேரு ஸ்டேடியம் வந்தடைந்தார் விஜய்!

தமிழகத்தின் புதிய முதலமைச்சராகத் தமிழக வெற்றிக் கழகத் தலைவர் விஜய் இன்று (மே 10) காலை 10:00 மணியளவில் முறைப்படி பதவியேற்க உள்ளார். இதற்காகச் சென்னை நீலாங்கரையில் உள்ள தனது இல்லத்திலிருந்து பலத்த போலீஸ் பாதுகாப்புடன் புறப்பட்ட விஜய், தற்போது விழா நடைபெறும் சென்னை ஜவஹர்லால் நேரு உள்விளையாட்டு அரங்கிற்கு வந்து சேர்ந்துள்ளார். சுமார் 60 ஆண்டுகால திராவிடக் கட்சிகளின் ஆட்சிக்கு முற்றுப்புள்ளி வைத்துவிட்டு, ஒரு புதிய அரசியல் மாற்றத்தை விதைக்கத் துடிக்கும் விஜய்யின் இந்தப் பயணம் தமிழக வரலாற்றில் ஒரு முக்கியத் திருப்புமுனையாகப் பார்க்கப்படுகிறது.

நேரு உள்விளையாட்டு அரங்கில் இன்னும் சற்று நேரத்தில் நடைபெறவுள்ள இந்த பிரம்மாண்ட விழாவில், தமிழக ஆளுநர் ராஜேந்திர விஸ்வநாத் அர்லேகர் விஜய்க்குப் பதவிப் பிரமாணமும் ரகசியக் காப்புப் பிரமாணமும் செய்து வைக்கிறார். இந்த வரலாற்றுச் சிறப்புமிக்க நிகழ்வில் பங்கேற்கவும், புதிய முதலமைச்சருக்குத் தனது வாழ்த்துகளைத் தெரிவிக்கவும் அகில இந்திய காங்கிரஸ் கட்சியின் மூத்த தலைவர் ராகுல் காந்தி டெல்லியிலிருந்து சென்னை வந்துள்ளார். விஜய்யின் வருகையைக் கண்டதும் அரங்கிற்குள் குவிந்திருந்த ஆயிரக்கணக்கான தொண்டர்கள் மற்றும் ரசிகர்கள் விண்ணதிர முழக்கமிட்டுத் தங்களது மகிழ்ச்சியை வெளிப்படுத்தினர்.

ஆட்சியமைக்கத் தேவையான 118 இடங்களை விடக் கூடுதலாக 121 உறுப்பினர்களின் ஆதரவு கடிதங்களை ஆளுநரிடம் சமர்ப்பித்து, மெஜாரிட்டியை உறுதி செய்த பின்னரே விஜய் இன்று முதல்வராகப் பொறுப்பேற்கிறார். இன்று காலை 10:00 மணி முதல் இந்த விழா தொடங்கி நடைபெற்று வருவதால், கோட்டைக்குள் நுழையப் போகும் தங்களது புதிய நாயகனைக் காணத் தமிழகமே ஆவலுடன் காத்திருக்கிறது. விஜய்யுடன் சேர்ந்து அவரது அமைச்சரவையில் இடம் பெற்றுள்ள 10 முக்கிய அமைச்சர்களும் இன்று முறைப்படி பொறுப்பேற்றுத் தங்களது மக்கள் பணியைத் தொடங்க உள்ளனர்.