விஜய் வியூகம் மொத்தமா மாறிடுச்சு... கரூரில் கால் வைப்பதற்கு முன் செந்தில் பாலாஜியைக் கைது செய்ய திட்டம்!

நாளை தமிழக முதலமைச்சர் ச. ஜோசப் விஜய் கரூர் மாவட்டத்திற்கு முதன்முறையாக அரசு மற்றும் அரசியல் பயணம் மேற்கொள்ள உள்ள நிலையில், அதற்கு முன்பாக அங்கு நிலவி வந்த பெரும் அரசியல் பரபரப்பு தற்காலிகமாக ஓய்ந்துள்ளது.

கடந்த ஜூன் 26 அன்று, தவெக உத்தங்கரை தொகுதி சட்டமன்ற உறுப்பினர் என். இளையராஜாவிடம், சட்டப்பேரவைத் தலைவருக்கு எதிரான தீர்மானத்தின் போது கட்சி கொறடா உத்தரவை மீறி வாக்களிக்க ₹35 கோடி லஞ்சம் கொடுக்க முயன்றதாகச் சென்னை திருப்லிகேன் காவல் நிலையத்தில் வழக்குப்பதிவு செய்யப்பட்டது.

இந்தக் குதிரை பேர சதித் திட்டத்தின் பின்னணியில் திமுக பிரமுகரும், கோவை தெற்கு தொகுதி எம்.எல்.ஏ-வுமான வி. செந்தில் பாலாஜி மற்றும் அவரது சகோதரர் அசோக் குமார் ஆகியோர் இருப்பதாகக் காவல்துறை தரப்பில் குற்றம் சாட்டப்பட்டது. இதன் அடிப்படையில், முதலமைச்சர் விஜய் நாளை கரூரில் கால் வைப்பதற்கு முன்பாகவே, செந்தில் பாலாஜியைக் கைது செய்து தவெக அரசின் நடவடிக்கையை நிரூபிக்கத் திட்டமிடப்பட்டதாக அரசியல் வட்டாரங்களில் தகவல்கள் வெளியாகின.

கைது நடவடிக்கைக்கு அஞ்சி செந்தில் பாலாஜி மற்றும் அவரது சகோதரர் அசோக் குமார் தரப்பில் சென்னை உயர் நீதிமன்றத்தில் அவசர முன்ஜாமீன் மனுத் தாக்கல் செய்யப்பட்டிருந்தது. இந்த மனுவை நேற்று விசாரித்த நீதிபதி ஜி.கே. இளன்திரையன், இருவருக்கும் நிபந்தனை அடிப்படையிலான முன்ஜாமீனை வழங்கி அதிரடி உத்தரவிட்டார்:

இந்த விவகாரத்தில் பதியப்பட்ட எஃப்.ஐ.ஆர் ஆவணத்தில் செந்தில் பாலாஜியின் பெயர் நேரடியாக இடம் பெறவில்லை என்பதையும், வெறும் சந்தேகத்தின் அடிப்படையிலேயே அவர் சேர்க்கப்பட்டுள்ளார் என்பதையும் நீதிமன்றம் சுட்டிக்காட்டியது.

முன்ஜாமீன் வழங்கப்பட்டாலும், செந்தில் பாலாஜி மற்றும் அவரது சகோதரர் இருவரும் வழக்கின் விசாரணை அதிகாரி முன்னிலையில் தினமும் காலை மற்றும் மாலை என இருமுறை நேரில் ஆஜராகி விசாரணைக்கு முழு ஒத்துழைப்பு வழங்க வேண்டும் என நீதிமன்றம் நிபந்தனை விதித்துள்ளது.

சென்னை உயர் நீதிமன்றத்தின் இந்த உடனடி முன்ஜாமீன் உத்தரவு காரணமாக, முதலமைச்சரின் வருகைக்கு முன்பாகக் கரூரில் செந்தில் பாலாஜியைக் கைது செய்ய வகுக்கப்பட்டிருந்த அரசியல் வியூகங்கள் தலைகீழாக மாறியுள்ளன. எனினும், நாளை கரூரில் நடைபெறும் மக்கள் சந்திப்பு கூட்டத்தில் இந்த விவகாரம் குறித்து முதலமைச்சர் விஜய் ஏதேனும் முக்கியக் கருத்துக்களைப் பேசுவாரா என்ற எதிர்பார்ப்பு  அதிகரித்துள்ளது.

இந்தத் தற்காலிக முன்ஜாமீன் உத்தரவுக்கு முந்தைய நாட்களில், செந்தில் பாலாஜியின் சகோதரர் அசோக் குமார் தாக்கல் செய்த மனு மற்றும் இந்த வழக்கில் அடுத்தடுத்து நிகழ்ந்த திடீர் சட்ட மாற்றங்கள் குறித்து இந்த காணொளி விரிவாக விளக்குகிறது.