முதியோர் பராமரிப்பு மையத்தில் வினோத் காம்ப்ளி... பேச சிரமப்பட்டதால் ரசிகர்கள் கவலை... அதிர்ச்சி வீடியோ!
முன்னாள் இந்திய கிரிக்கெட் வீரர் வினோத் காம்ப்ளி, தானேவில் உள்ள முதியோர் பராமரிப்பு மையத்தில் இருந்து வெளியிட்டுள்ள புதிய வீடியோ சமூக வலைதளங்களில் வைரலாகி வருகிறது. அந்த வீடியோவில் அவர் பேசுவதற்கு சிரமப்படுவது போன்ற காட்சிகள் இடம்பெற்றுள்ளதால், கிரிக்கெட் ரசிகர்கள் அவரது உடல்நிலை குறித்து கவலை தெரிவித்துள்ளனர்.54 வயதான வினோத் காம்ப்ளி, தானேவில் உள்ள Nidan Centre for Elderly Care-ல் இருப்பதாக வீடியோவில் தெரிவித்துள்ளார். அங்கு தனக்கு சிறப்பான வசதிகள் கிடைப்பதாகவும், தூய்மை மற்றும் சுகாதார வசதிகள் சிறப்பாக இருப்பதாகவும் அவர் கூறியுள்ளார்.
மேலும், அங்குள்ளவர்கள் தன்னிடம் மிகுந்த அன்புடனும் மரியாதையுடனும் நடந்து கொள்வதாகவும், வீட்டை விட்டு தொலைவில் இருப்பது போன்ற உணர்வே ஏற்படவில்லை என்றும் காம்ப்ளி தெரிவித்துள்ளார்.ஆனால், வீடியோவில் காம்ப்ளி பேசும்போது சில இடங்களில் வார்த்தைகளை தெளிவாக உச்சரிக்க சிரமப்படுவது போன்ற காட்சிகள் ரசிகர்களின் கவனத்தை ஈர்த்துள்ளன. இதனால் சமூக வலைதளங்களில் பலரும் அவரது உடல்நிலை குறித்து கவலை தெரிவித்து வருகின்றனர்.
அதேநேரத்தில், காம்ப்ளி “முதியோர் இல்லத்தில் நிரந்தரமாக தங்கியுள்ளார்” என்று இந்த வீடியோ மட்டும் வைத்து முடிவு செய்ய முடியாது. அவர் தற்போது அந்த முதியோர் பராமரிப்பு மையத்தில் சிகிச்சை அல்லது பராமரிப்பில் இருப்பதாகவே தகவல்கள் வெளியாகியுள்ளன.வினோத் காம்ப்ளி சமீப ஆண்டுகளில் பல்வேறு உடல்நலப் பிரச்சினைகளை எதிர்கொண்டுள்ளார். 2024-ம் ஆண்டு உடல்நலக் குறைவு காரணமாக அவர் மருத்துவமனையில் அனுமதிக்கப்பட்டிருந்தார். அதன்பிறகும் அவரது உடல்நிலை குறித்து அவ்வப்போது செய்திகள் வெளியாகி வந்தன.
இந்திய அணிக்காக காம்ப்ளி 17 டெஸ்ட் போட்டிகளில் விளையாடி 1,084 ரன்களையும், 104 ஒருநாள் போட்டிகளில் 2,477 ரன்களையும் குவித்துள்ளார். குறிப்பாக டெஸ்ட் கிரிக்கெட்டில் 54.20 என்ற சிறப்பான பேட்டிங் சராசரியுடன் நான்கு சதங்களை பதிவு செய்துள்ளார்.காம்ப்ளியின் புதிய வீடியோ தற்போது கிரிக்கெட் ரசிகர்களிடையே பெரும் கவனத்தை பெற்றுள்ள நிலையில், அவர் விரைவில் முழுமையான உடல்நலத்துடன் திரும்ப வேண்டும் என ரசிகர்கள் வாழ்த்து தெரிவித்து வருகின்றனர்.