"நானும் வஹிதாவும் நல்ல நண்பர்கள்... ஏன் இப்படி சொன்னாங்கன்னு புரியல” - பிக்பாஸ் வின்னர் முத்துக்குமரன் விளக்கம்!

பிக்பாஸ் சீசன் 8 வெற்றியாளரான முத்துக்குமரன் மீது இன்ஸ்டாகிராம் பிரபலம் வஹிதா பாலியல் குற்றச்சாட்டுகளை முன்வைத்துத் தற்கொலைக்கு முயன்ற விவகாரம் சோசியல் மீடியாவில் பெரும் பரபரப்பை ஏற்படுத்தியுள்ள நிலையில், இது குறித்து முத்துக்குமரன் தனது தரப்பு விளக்கத்தை அளித்துள்ளார்.

பட்டிமன்றப் பேச்சாளரும், யூடியூபருமான முத்துக்குமரன் மீது, இன்ஸ்டாகிராமில் 1.4 மில்லியன் ஃபாலோவர்களைக் கொண்டுள்ள வஹிதா என்பவர் பாலியல் குற்றச்சாட்டு ஒன்றை முன்வைத்தார். தம்மோடு நெருக்கமாகப் பழகிவிட்டுத் திருமணம் செய்ய மறுத்து ஏமாற்றி விட்டதாகக் கூறி அவர் வீடியோ வெளியிட்டதோடு, அதிகப்படியான மாத்திரைகளை உட்கொண்டு தற்கொலைக்கும் முயன்றார். தற்போது அவர் மருத்துவமனையில் சிகிச்சைப் பெற்று வருகிறார்.

தன் மீது எழுந்துள்ள குற்றச்சாட்டுகள் குறித்துப் பதிலளித்துள்ள முத்துக்குமரன், "நானும் வஹிதாவும் நல்ல நண்பர்கள் மட்டுமே. அவர் ஏன் திடீரென இப்படிச் செய்தார் என்று எனக்குச் சத்தியமாகப் புரியவில்லை. இது குறித்து நான் அவரிடம் தெளிவுபடுத்தக் கேட்டுக் கொண்டிருக்கிறேன். அவர் சற்று மன உளைச்சலில் இருந்தார்" எனத் தெரிவித்துள்ளார்.

பொதுவெளியில் முற்போக்காகவும் நன்னெறிகளைப் பற்றியும் பேசி வந்த முத்துக்குமரன் மீது எழுந்துள்ள இந்தக் குற்றச்சாட்டு, அவரது ரசிகர்களையும் பொதுமக்களையும் அதிர்ச்சியில் ஆழ்த்தியுள்ளதுடன், இணையத்தில் இதுகுறித்துத் தீவிர விவாதங்களையும் விமர்சனங்களையும் ஏற்படுத்தியுள்ளது.