தவெக மாவட்ட பொறுப்பாளர்கள் யார் யார் ... கட்சி நிர்வாகிகளுடன் விஜய் ஆலோசனை!

தமிழ் திரையுலகில் இளைய தளபதியாக கொண்டாடப்படும் நடிகர் விஜய் தமிழக வெற்றிக் கழகம் எனும் பெயரில் அரசியல் கட்சியை தொடங்கியுள்ளார். அதன் முதலாம் ஆண்டு நிறைவு விழா அடுத்த மாதம் நடைபெற உள்ள நிலையில் அதற்கு முன்னதாக கட்சியில் நிர்வாகிகளுக்கு பொறுப்பை வழங்க கட்சி தலைமை முயற்சி மேற்கொண்டு வருகிறது.
அதற்காக கடந்த ஜனவரி 10ம் தேதி சென்னை பனையூரில் தவெக பொதுச்செயலாளர் ஆனந்த் தலைமையில் கட்சி நிர்வாகிகள் ஆலோசனை கூட்டம் நடத்தப்பட்டது. அப்போது ஒரு சில மாவட்டங்களில் கட்சி தலைமை நியமித்த நிர்வாகிகளுடன் கட்சியினர் அதிருப்தி தெரிவித்த காரணத்தால் அன்றைய தினம் பெரும் சலசலப்பு ஏற்பட்டது.அன்றைய தினம் மாவட்ட செயலாளர்கள், பொறுப்பாளர் பதவிகளுக்கு விருப்பம் இருப்பவர்கள் விண்ணப்பிக்கலாம் எனத் தகவல்கள் வெளியாகின.
அவர்களுடன் இன்றைய தினம் சென்னை பனையூரில் உள்ள கட்சி அலுவலகத்தில் நேர்காணல் நடைபெற உள்ளதாக தெரிகிறது. அதன்படி இன்றைய தினம், ராணிப்பேட்டை, அரியலூர், புதுக்கோட்டை, சென்னை, தர்மபுரி உட்பட குறிப்பிட்ட மாவட்டங்களை சேர்ந்த நிர்வாகிகளுக்கு மட்டும் பொறுப்புகள் வழங்கும் நிகழ்வு இன்று நடைபெற உள்ளது. இதில் கட்சி நிர்வாகிகளுடன் ஆலோசனை மேற்கொள்ள தவெக தலைவர் விஜய் பனையூர் கட்சி அலுவலகம் வர இருப்பதாகவும், கட்சி நிர்வாகிகள் நியமனம் குறித்து அவர் முடிவு செய்ய உள்ளதாகவும் தகவல்கள் வெளியாகியுள்ளன.கட்சி தொடங்கி ஓராண்டு நிறைவு விழாவில் அனைத்து மாவட்ட செயலாளர்கள் மற்றும் மாவட்ட பொறுப்பாளர்கள் யார் என்பது குறித்த தகவல்கள் வெளியிடப்படலாம் என எதிர்பார்ப்பு நிலவி வருகிறது.