இஸ்ரேலின் புதிய பிரதமர் யார்? 1981-க்குப் பின் அதிகபட்ச வாக்குப்பதிவு.. நவ.4ல் முடிவுகள் வெளியீடு!

இஸ்ரேல் நாட்டின் 26-வது நாடாளுமன்றத் தேர்தலுக்கான வாக்குப்பதிவு நேற்று விறுவிறுப்பாக நடைபெற்று முடிந்தது. இதில் 1981-ஆம் ஆண்டிற்குப் பிறகு முன்னெப்போதும் இல்லாத வகையில் மிக அதிக அளவிலான வாக்குப்பதிவு எட்டப்பட்டுப் புதிய வரலாறு படைக்கப்பட்டுள்ளது.

வாக்குப்பதிவு தொடங்கும் தொடக்க நேரங்களிலேயே வாக்குப்பதிவு வீதம் உச்சத்தை தொட்டது. மாலை 4 மணி நிலவரப்படி சுமார் 55.7 சதவீத வாக்காளர்கள் (40,85,075 பேர்) தங்களது ஜனநாயகக் கடமையை ஆற்றியிருந்தனர். இது 2022-ஆம் ஆண்டு நடைபெற்ற தேர்தலை விட (47.5%) மிக அதிகம் என்பது குறிப்பிடத்தக்கது.

இணையவழி அச்சுறுத்தல்கள் மற்றும் ஹேக்கிங் பயம் காரணமாக, இஸ்ரேலில் மின்னணு வாக்குப்பதிவு இயந்திரங்கள் பயன்படுத்தப்படுவதில்லை. நாடாளுமன்றத்தில் உள்ள 120 இடங்களுக்கும் பாரம்பரிய முறைப்படி வாக்குச்சீட்டுகளைப் பயன்படுத்தியே வாக்காளர்கள் வாக்களித்தனர்.

120 உறுப்பினர்களைக் கொண்ட நாடாளுமன்றத்தில் ஆட்சி அமைக்கப் பெரும்பான்மையான 61 இடங்கள் தேவையாகும். தற்போதைய பிரதமர் பெஞ்சமின் நெதன்யாகு தலைமையிலான ‘லிகுட்’ கட்சிக்கும், முன்னாள் ராணுவத் தளபதி காடி ஐசன்கோட் தலைமையிலான எதிர்க்கட்சிக் கூட்டணிக்கும் இடையே மிகக் கடுமையான போட்டி நிலவுகிறது.

இஸ்ரேலில் கடந்த 1996 முதல் 2022 வரை சராசரியாக 2.4 ஆண்டுகளுக்கு ஒருமுறை எனத் தொடர்ச்சியாகத் தேர்தல்கள் நடந்து வந்த நிலையில், 2022-ல் அமைக்கப்பட்ட 25-வது நாடாளுமன்றம் 1988-க்குப் பிறகு கலைக்கப்படாமல் தனது முழு 4 ஆண்டு காலத்தையும் நிறைவு செய்து தேர்தல் களம் கண்டுள்ளது குறிப்பிடத்தக்கது.

வாக்குப்பதிவு நிறைவடைந்ததைத் தொடர்ந்து ஊடகங்களின் முதற்கட்டக் கருத்துக்கணிப்பு முடிவுகள் வெளியாகியுள்ளன. தூதரக வாக்காளர்கள் மற்றும் தபால் வாக்குகள் அக்.30-க்குள் எண்ணி முடிக்கப்படும். இதனைத் தொடர்ந்து, இஸ்ரேலிய மத்திய தேர்தல் குழுவின் அதிகாரப்பூர்வ இறுதி முடிவுகள் நவம்பர் 4ம் தேதி முறைப்படி அறிவிக்கப்பட உள்ளன. அதன் பின்னரே இஸ்ரேலின் அடுத்த பிரதமர் யார் என்பது இறுதியாகும்.