மன்னார் வளைகுடா நோக்கி நகரும் காற்று சுழற்சி... சென்னை உள்ளிட்ட கடலோர மாவட்டங்களில் இன்றிரவு மழைக்கு வாய்ப்பு!

வட தமிழகக் கடற்கரையை ஒட்டிய வளிமண்டலப் பகுதியில் நிலவி வந்த காற்று சுழற்சியானது, அடுத்த 24 மணி நேரத்தில் இலங்கை மற்றும் மன்னார் வளைகுடாப் பகுதியை நோக்கி நகரக்கூடும் எனத் தனியார் வானிலை ஆய்வாளர் ஹேமச்சந்தர் தெரிவித்துள்ளார்.

இந்த வளிமண்டலச் சுழற்சியின் நகர்வு காரணமாக, தலைநகர் சென்னை உள்ளிட்ட வட கடலோரப் பகுதிகளில் இன்று இரவு முதலே மழை படிப்படியாகத் தொடங்கும் என்று எதிர்பார்க்கப்படுகிறது.

மேலும், அடுத்த இரண்டு நாட்களுக்கு வட கடலோர மாவட்டங்கள், காவிரி டெல்டா மாவட்டங்கள் மற்றும் தென் கடலோரப் பகுதிகளில் ஆங்காங்கே விட்டுவிட்டு மிதமான முதல் கனமழை பெய்யக்கூடும் என்றும் தெரிவிக்கப்பட்டுள்ளது. பருவமழைக் கால மாறுதல்கள் காரணமாகக் கடலோரப் பகுதிகளில் காற்றின் வேகமும் அதிகரிக்க வாய்ப்புள்ளதாக வானிலை கணிப்புகள் தெரிவிக்கின்றன.