BRICS Summit 2026: மோடி அளித்த விருந்துக்கு ஜின்பிங் வராதது ஏன்? வெளியான தகவல்!

  இந்தியா தலைமையில் நடைபெற்ற BRICS உச்சி மாநாட்டில் பங்கேற்க டெல்லி வந்த சீன அதிபர் ஷி ஜின்பிங், பிரதமர் நரேந்திர மோடி ஏற்பாடு செய்திருந்த பிரமாண்ட இரவு விருந்தில் பங்கேற்கவில்லை. இது சர்வதேச அரசியல் வட்டாரத்தில் கவனம் பெற்றுள்ளது.ஜின்பிங் சனிக்கிழமை டெல்லி வந்ததுடன், BRICS மாநாட்டில் பங்கேற்றார். பின்னர் பிரதமர் மோடியுடன் சுமார் 50 நிமிடங்கள் இருதரப்பு பேச்சுவார்த்தையும் நடத்தினார். இந்தியா–சீனா உறவு, எல்லை அமைதி, வர்த்தகம் உள்ளிட்ட முக்கிய விவகாரங்கள் குறித்து இரு தலைவர்களும் ஆலோசித்தனர்.

இதையடுத்து பிரதமர் மோடி, BRICS நாடுகளின் தலைவர்கள் மற்றும் பிரதிநிதிகளுக்காக இந்திய கலாசாரத்தை பிரதிபலிக்கும் வகையில் சிறப்பு இரவு விருந்துக்கு ஏற்பாடு செய்திருந்தார். ரஷிய அதிபர் விளாடிமிர் புதின் உள்ளிட்ட பல தலைவர்கள் இதில் பங்கேற்றனர். ஆனால் ஜின்பிங் மட்டும் விருந்தில் கலந்து கொள்ளவில்லை.

ஜின்பிங் விருந்தில் பங்கேற்காததற்கான அதிகாரப்பூர்வ காரணம் இதுவரை தெரிவிக்கப்படவில்லை. இருப்பினும், அவர் ஓய்வெடுப்பதற்காக ஹோட்டலுக்கு திரும்பியிருக்கலாம் என்று தகவல்கள் தெரிவிக்கின்றன. அபுதாபி இளவரசர் ஷேக் காலித் பின் முகமது பின்பும் விருந்தில் பங்கேற்கவில்லை; அவர் ஏற்கனவே டெல்லியில் இருந்து புறப்பட்டுச் சென்றிருந்தார்.

இதற்கிடையே, மோடி–ஜின்பிங் பேச்சுவார்த்தையில் இரு நாடுகளும் தங்களுக்கிடையிலான வேறுபாடுகள் மோதலாக மாறாமல் பார்த்துக்கொள்ள வேண்டும் என்றும், பரஸ்பர மரியாதை மற்றும் நம்பிக்கையுடன் உறவை முன்னெடுக்க வேண்டும் என்றும் வலியுறுத்தப்பட்டது.எனவே, ஜின்பிங் விருந்தில் பங்கேற்காதது குறித்து பல்வேறு விவாதங்கள் எழுந்தாலும், அதற்கான உறுதியான காரணம் அதிகாரப்பூர்வமாக வெளியாகவில்லை.