நிற்காமல் சென்ற எமன்... லாரியில் பிரேக் பிடிக்காததால் ஆட்டோ, பைக் மீது மோதி 3 பேர் பலி; 4 பேர் படுகாயம்!

ஹரியானா மாநிலம் பகதூர்கார் நகரில் பிரேக் பிடிக்காத லாரி மோதி 3 பேர் உயிரிழந்த சம்பவம் பெரும் சோகத்தை ஏற்படுத்தியுள்ளது. இதில் 4 பேர் படுகாயமடைந்துள்ளனர்.  

ஹரியானா மாநிலம் பகதூர்கார் நகரில் நேற்று கட்டுப்பாட்டை இழந்த லாரி ஒன்று அடுத்தடுத்து மோதிய விபத்தில், ஒரு கல்லூரி மாணவர் உட்பட 3 பேர் உயிரிழந்தனர். மேலும் 4 பேர் படுகாயமடைந்த நிலையில் மருத்துவமனையில் அனுமதிக்கப்பட்டுள்ளனர்.

பகதூர்கார் நகரின் பரபரப்பான சாலை ஒன்றில் நேற்று மாலை அதிவேகமாக வந்த லாரி ஒன்றின் பிரேக் திடீரென செயலிழந்ததாகக் கூறப்படுகிறது. இதனால் ஓட்டுநரின் கட்டுப்பாட்டை இழந்த அந்த லாரி, சாலையோரம் நடந்து சென்ற பாதசாரிகள் இருவர் மீது முதலில் மோதியது. இதில் அவர்கள் இருவரும் சம்பவ இடத்திலேயே உடல் நசுங்கிப் பலியாகினர்.

பாதசாரிகள் மீது மோதிய பின்பும் வேகம் குறையாத அந்த லாரி, முன்னால் சென்ற ஆட்டோ மற்றும் ஒரு இருசக்கர வாகனத்தின் மீது பயங்கரமாக மோதியது. இந்த மோதலில் இருசக்கர வாகனத்தில் சென்ற நபர் தூக்கி வீசப்பட்டு உயிரிழந்தார். லாரி மோதிய வேகத்தில் ஆட்டோ அப்பளம் போல நொறுங்கியது. இதில் ஆட்டோவில் இருந்தவர்கள் மற்றும் அருகில் இருந்தவர்கள் என மொத்தம் 4 பேர் பலத்த காயமடைந்தனர்.

​​​​​​​

இந்த விபத்து குறித்து தகவலறிந்து சம்பவ இடத்திற்கு விரைந்து வந்த பகதூர்கார் போலீசார், காயமடைந்தவர்களை மீட்டு அருகில் உள்ள அரசு மருத்துவமனைக்கு அனுப்பி வைத்தனர். உயிரிழந்தவர்களின் உடல்கள் பிரேத பரிசோதனைக்காக அனுப்பி வைக்கப்பட்டுள்ளன. விபத்தை ஏற்படுத்திய லாரி ஓட்டுநர் தப்பியோடிவிட்ட நிலையில், போலீசார் லாரியைப் பறிமுதல் செய்து வழக்குப் பதிவு செய்துள்ளனர்.

பிரேக் பிடிக்காதது தான் விபத்திற்கு உண்மையான காரணமா அல்லது ஓட்டுநரின் அலட்சியமா என்ற கோணத்தில் தீவிர விசாரணை நடைபெற்று வருகிறது. இந்த விபத்து காரணமாக அந்தப் பகுதியில் சுமார் ஒரு மணி நேரம் போக்குவரத்து பாதிக்கப்பட்டது.