பில்லி சூனியம் எடுப்பதாகக் கூறி இளம்பெண் பலாத்காரம்!

மகாராஷ்டிரா மாநிலம் நாசிக் மாவட்டத்தில் குடும்பப் பிரச்சினைகளால் அவதிப்பட்டு வந்த 28 வயது இளம்பெண் ஒருவர், தீர்வு தேடி போலி சாமியார் மகேஷ் காக்டே என்பவரை அணுகியுள்ளார். அந்தப் பெண்ணுக்குப் பில்லி சூனியம் இருப்பதாகக் கூறி நம்ப வைத்த அந்த நபர், அதனை அகற்றச் சிறப்புப் பூஜைகள் செய்ய வேண்டும் என ஆசை வார்த்தை கூறியுள்ளார். இதனை நம்பிய அந்தப் பெண் கடந்த 2024-ம் ஆண்டு அந்த நபர் தங்கியிருந்த இடத்திற்குச் சென்றபோது, போலி சாமியார் அவரைத் தனி அறைக்கு அழைத்துச் சென்று கொடூரமாகப் பாலியல் பலாத்காரம் செய்துள்ளார்.

பாதிக்கப்பட்ட பெண்ணை மிரட்டும் நோக்கில் அந்த நபர் ஆபாசமாகப் புகைப்படம் மற்றும் வீடியோ எடுத்து வைத்துக் கொண்டு, இது குறித்து வெளியே சொன்னால் விபரீதம் ஏற்படும் என எச்சரித்துள்ளார். இதனால் நீண்ட நாட்களாகப் பயந்து வாழ்ந்து வந்த அந்தப் பெண், ஒரு கட்டத்தில் துணிச்சலாகக் காவல் நிலையத்தில் புகார் அளித்தார். புகாரைப் பெற்றுக்கொண்ட போலீசார் தீவிர விசாரணை நடத்தித் தலைமறைவாக இருந்த போலி சாமியார் மகேஷ் காக்டேவை கடந்த 23-ம் தேதி அதிரடியாகக் கைது செய்தனர்.

மத நம்பிக்கையைப் பயன்படுத்திப் பெண்களுக்கு இழைக்கப்படும் இது போன்ற அநீதிகள் சமூகத்தில் பெரும் அதிர்ச்சியை ஏற்படுத்தியுள்ளன. கைது செய்யப்பட்ட நபர் மீது பாலியல் வன்கொடுமை மற்றும் மிரட்டல் உள்ளிட்ட பல்வேறு பிரிவுகளின் கீழ் வழக்குப்பதிவு செய்யப்பட்டுள்ளது. இது போன்ற போலி சாமியார்களை மக்கள் ஒருபோதும் நம்ப வேண்டாம் என்றும், ஏதேனும் பிரச்சினைகள் இருந்தால் உரிய அதிகாரிகளையோ அல்லது சட்டப்பூர்வ அமைப்புகளையோ அணுக வேண்டும் என்றும் போலீசார் விழிப்புணர்வு ஏற்படுத்தி வருகின்றனர்.
​