அதிர்ச்சி... தலையணையால் அமுக்கி, தந்தையே மகனை கொன்ற கொடூரம்!
பெற்ற தந்தையே, மகனை தலையணையால் அமுக்கி கொலை செய்து விட்டு, மகன் உடல் நலம் பாதித்து இறந்ததாக நாடகமாடியது அம்பலமாகி உறவினர்களிடையே அதிர்ச்சியை ஏற்படுத்தியுள்ளது. தூத்துக்குடி மாவட்டம் கோவில்பட்டி அருகே உள்ள லிங்கம்பட்டி அண்ணாநகரைச் சேர்ந்தவர் மருதுபாண்டி (47). கோவில்பட்டி அருகே உள்ள கடலையூர் சாலையில் சிமெண்டு கடை நடத்தி வரும் இவரது மனைவி அமுதா. இவர்களது மகன் தர்மதுரை (23).
தர்மதுரைக்கு மது குடிக்கும் பழக்கம் இருந்து வந்ததாகவும், வீட்டிற்கு வந்து பெற்றோருடன் தகராறு அடிக்கடி செய்து வந்ததாகவும் கூறப்படுகிறது. மேலும், வேலைக்கு செல்லாமல் தனது தந்தையிடம் சண்டையிட்டு வந்தார்.
கடந்த 21ம் தேதி வீட்டில் மருதுபாண்டி மட்டும் இருந்த போது, அங்கு தர்மதுரை வந்துள்ளார். தனது தந்தையிடம் மதுக்குடிக்க பணம் கேட்டு தொந்தரவு செய்து, தந்தையைத் தாக்க முயன்றார்.
இதில் ஆத்திரம் அடைந்த மருதுபாண்டி, தர்மதுரையை கீழே தள்ளினார். அப்போது அவர் மயங்கி விழுந்து உயிரிழந்ததாக கூறப்பட்டது. இது குறித்து தகவலறிந்த நாலாட்டின்புத்தூர் போலீசார் சந்தேக மரணம் என வழக்குப்பதிவு செய்தனர்.
இந்நிலையில், தர்மதுரையின் உடல் பிரேத பரிசோதனை செய்யப்பட்டு அதன் அறிக்கை போலீசாரிடம் வழங்கப்பட்டது. அதில் அவர் மூச்சுவிட முடியால் அமுக்கப்பட்டு, மூச்சுத்திணறி உயிரிழந்தது தெரிய வந்தது.
இதனால் போலீசார் விசாரணையை தீவிரப்படுத்தினர். சம்பவம் நடந்த அன்று வீட்டில் இருந்த மருதுபாண்டியிடம் துருவி, துருவி விசாரணை மேற்கொண்டதில் திடீர் திருப்பம் ஏற்பட்டது. வீட்டில் தந்தை-மகனுக்கிடையே ஏற்பட்ட தகராறில் மருதுபாண்டி, தர்மதுரையை கீழே தள்ளிவிட்டார். பின்னர் அருகிலிருந்த தலையணையால் அவரது முகத்தை அமுக்கி மூச்சை திணறடித்து கொலை செய்தது தெரிய வந்தது.
மகன் இறந்ததை கண்டு அதிர்ச்சி அடைந்த அவர் என்ன செய்வதென்று திகைத்து, அக்கம்பக்கத்தினரிடம் தனது மகன் மயங்கி விழுந்து விட்டதாக கூறி நாடகமாடியது போலீஸ் விசாரணையில் தெரிய வந்தது. இதையடுத்து போலீசார் மர்மச்சாவு வழக்கை கொலை வழக்காக மாற்றி, மருதுபாண்டியை கைது செய்தனர்.
இதையும் பிடிச்சிருந்தா படிச்சு பாருங்க
லட்சத்துல கடன் இருந்தாலும் ஈஸியா தீர்க்கும் எளிய பரிகாரம்
பளபளக்கும் மிருதுவான சருமத்திற்கு இதை மட்டும் செய்தாலே போதும்!!
நாப்கின்களால் ஏற்படும் ரேசஸ் மற்றும் எரிச்சலை போக்க இயற்கை வழிகள்!!