300 வருஷங்களா ‘மொஹரம்’ கொண்டாடும் இந்துக்கள்... தஞ்சாவூரில் விநோத கிராமம்!

தஞ்சாவூர் அருகே உள்ள காசவளநாடு புதூர் கிராமத்தில் தான் இந்த விநோத பழக்கம் கடந்த 300 ஆண்டுகளுக்கும் மேலாக கடைபிடிக்கப்பட்டு வரப்படுகிறது. ஒவ்வொரு வருடமும்  மொஹரம் பண்டிக்கையை இந்த கிராமத்தில் பெரும்பான்மையாக வசித்து வரும் இந்துக்கள் கொண்டாடி வருகிறார்கள்.
மொஹரம் பண்டிகைக்காக 10 நாட்களுக்கு முன்னதாகவே விரதத்தை துவங்கி, ஊரின் மையப்பகுதியான செங்கரையில் உள்ள சாவடியில் உள்ளங்கை போன்ற உருவத்தை ‘அல்லா சுவாமி’ என வைத்து, தினமும் அதற்கு பூஜைகள் நடத்தி, பாத்தியா ஓதி வழிபாடு நடத்துகின்றனர்.

அதன்படி இந்தாண்டும் கடந்த பத்து நாட்களுக்கு முன்பாக விரதம் இருந்து நேற்றிரவு தொடங்கி இன்று காலை வரை, அல்லாவுக்கு மாலை அணிவித்து வீதியுலாவாக ஒவ்வொரு வீட்டுக்கும் எடுத்துச் சென்றனர். அப்போது அனைத்து வீடுகளிலும் புது மண் கலயத்தில் பானகம் வைத்து அவல், தேங்காய், பழங்கள் சகிதம் அல்லா சுவாமியை வழிப்பட்டனர்.
இன்று காலையும் கிராமத்தின் அனைத்து வீடுகளுக்கும் அல்லா சுவாமியை தாரை, தப்பட்டையுடன் எடுத்துச் சென்றனர். அப்போது வீட்டுக்கு வீடு அல்லா சுவாமிக்கு எலுமிச்சை, ரோஜா மாலைகள் மற்றும் பட்டுதுண்டு சாத்தி வழிபட்டனர். மீண்டும் செங்கரையில் சாவடிக்கு வந்ததும், அல்லா சுவாமியை தூக்கி வந்த நபர்கள் முதலில் தீ குண்டத்தில் இறங்கினர். அவர்களைத் தொடர்ந்து நேர்த்திக்கடன் செலுத்துவதற்காக விரதம் இருந்த ஆண்கள், பெண்கள் உள்ளிட்ட ஏராளமானோர் தீ குண்டத்தில் இறங்கி வழிபட்டனர்.  

இது குறித்து நம்மிடம் பேசிய கிராம மக்கள், “எங்கள் கிராமத்தில் குளம் வெட்டப்பட்ட போது உள்ளங்கை உருவத்தில் ஒரு உலோகம் கிடைத்தது. அதை நாங்கள் அல்லாவின் கையாக கருதி அதற்காக கோயில் அமைத்து வழிபாடு செய்து வருகிறோம். 
இவ்விழாவை இந்துக்களான நாங்கள் கொண்டாடும் போது,  இஸ்லாமியர்களும் உடன் இருந்து அவர்களும் வழிபடுகின்றனர். இந்துக்கள் அதிகம் இருப்பதால், இந்து முறைப்படியே வீதியுலா, தீக்குண்டம் இறங்குவது போன்ற விநோத வழிபாட்டை நாங்கள் செய்கிறோம்.
எங்கள் ஊரில் பிறந்த பெண்கள் அனைவரும் மொஹரம் திருவிழாவின் போது பிறந்த வீட்டுக்கு வந்து பானகம் தயாரித்து அல்லாவுக்கு வழங்குவதை இன்றளவும் கடைபிடித்து வருகின்றனர். சுமார் 300 ஆண்டுகளுக்கும் மேலாக, மத நல்லிணக்கத்தை போற்றும் வகையில், இந்த விழாவை கிராம விழாவாக ஆண்டுதோறும் கொண்டாடி வருகிறோம். இதற்காக இந்த 10 நாட்களிலும் கிராமமே மின்விளக்குகளால் அலங்கரிக்கப்பட்டு விழாக்கோலம் கொண்டிருக்கும்” என்றனர்.

ஆடி மாதத்தில் சுபகாரியங்களை செய்யலாமா? கூடாதா?!

லட்சத்துல கடன் இருந்தாலும் ஈஸியா தீர்க்கும் எளிய பரிகாரம்!

காதலித்து கர்ப்பமாக்கிய காதலன்... கைக்குழந்தையுடன் காதலி தர்ணா

விட்டேனா பார்!! ராஜநாகத்துடன் ஆக்ரோஷமாக சண்டையிடும் கோழி!