ஆம்புலன்ஸ் மீது கார் மோதி கோர விபத்து.. நடுரோட்டில் தீ பற்றி எரிந்ததால் அதிர்ச்சி!
கோவையில், கிணத்துக்கடவு வழியாக, கோவை - பொள்ளாச்சி நான்கு வழிச்சாலை உள்ளது. இந்த சாலையில் கிணத்துக்கடவு பகுதியில் 2.5 கிலோ மீட்டர் தூரத்திற்கு மேம்பாலம் கட்டப்பட்டுள்ளது. இதனால் கிணத்துக்கடவு நகர் வழியாக செல்லும் வாகனங்கள் அதிவேகத்தில் செல்கின்றன.
கோவை மருத்துவமனைக்கு நோயாளி ஒருவரை அழைத்துச் சென்ற பின், நேற்று இரவு இந்த மேம்பாலத்தில் ஆம்புலன்ஸ் ஒன்று உடுமலை நோக்கி வந்து கொண்டிருந்தது. இந்த ஆம்புலன்ஸ் அருகே உடுமலை ஆலாம்பாளையம் பகுதியை சேர்ந்த வினோத்குமார் (22) என்பவர் வந்தார்.
கிணத்துக்கடவு மேம்பாலத்தில் ஏறும் போது இருசக்கர வாகன ஓட்டி விபத்தில் சிக்கினார். இதைப் பார்த்த ஆம்புலன்ஸ் டிரைவர் வினோத்குமார், அவரை மீட்பதற்காக மேம்பாலத்தில் ஆம்புலன்ஸை பின்னோக்கி நகர்த்தினார். அப்போது, கோவையில் இருந்து செட்டியக்காபாளையம் பகுதிக்கு சென்று கொண்டிருந்த கோகுல் (28) ஓட்டிச் சென்ற பேட்டரி (எலக்ட்ரிக்) கார், அதிவேகமாக வந்த ஆம்புலன்சின் பின்பகுதியில் எதிர்பாராதவிதமாக மோதியது.
இதில் ஆம்புலன்ஸ் மற்றும் பேட்டரி கார் மேம்பாலத்தில் தூக்கி வீசப்பட்டன. இந்த விபத்தில் ஆம்புலன்சின் பெட்ரோல் டேங்க் உடைந்து சாலை முழுவதும் பெட்ரோல் கசிந்தது. இரண்டு கார்களும் சாலையில் சறுக்கியதால், தீப்பொறிகள் பெட்ரோலைப் பற்றவைத்து ஆம்புலன்ஸ் முழுவதும் எரிய ஆரம்பித்தன.
இதை பார்த்த ஆம்புலன்ஸ் டிரைவர் வினோத்குமார் உடனடியாக கீழே இறங்கி பாதுகாப்பான இடத்திற்கு சென்றார். அவருக்குப் பின்னால் காரில் வந்த கோகுல் சீட் பெல்ட் அணிந்திருந்ததால், ஏர்பேக் திறந்துள்ளது. இதனால், கார் கவிழ்ந்தது, ஆனால் கோகுல் காயமின்றி தப்பினார்.
சாலையில் ஆம்புலன்ஸ் எரிவதை பார்த்த வாகன ஓட்டிகள் உடனடியாக தீயணைப்பு துறைக்கு தகவல் கொடுத்தனர். தீயணைப்பு துறையினர் விரைந்து வந்து ஆம்புலன்சில் தீயை அணைத்தனர். ஆனால் அதற்குள் ஆம்புலன்ஸ் முற்றிலும் எரிந்து நாசமானது. இதையடுத்து இரு வாகனங்களும் கிரேன் மூலம் அகற்றப்பட்டு போக்குவரத்து சீரானது. இந்த சம்பவம் கிணத்துக்கடவு பகுதியில் பெரும் பரபரப்பை ஏற்படுத்தியது.
லட்சத்துல கடன் இருந்தாலும் ஈஸியா தீர்க்கும் எளிய பரிகாரம்!
மாசி மாதத்துல இத்தனை விசேஷமா... இந்த நட்சத்திர தினங்களை மிஸ் பண்ணாதீங்க!