வடமாநில தொழிலாளர்கள் வாக்காளர் பட்டியலில் சேர்க்கப்படுவார்களா? - தமிழக தேர்தல் அதிகாரிகள் விளக்கம்!

தமிழ்நாட்டில் தங்கியுள்ள பீகார் தொழிலாளர்கள் வாக்காளர் பட்டியலில் சேர்க்கப்படுவார்களா என்ற கேள்விக்கு தமிழக தேர்தல் அதிகாரிகள் விளக்கம் அளித்துள்ளனர்.

பீகார் மாநிலத்தைத் தொடர்ந்து தமிழ்நாட்டிலும் வாக்காளர் பட்டியல் சிறப்பு தீவிர திருத்தப் பணிகள் நவம்பர் 4ம் தேதி தொடங்குகிறது. இதற்காக தேர்தல் ஆணையம் பல்வேறு வழிகாட்டு நெறிமுறைகளை வெளியிட்டுள்ளது. 2002–2004-ம் ஆண்டுகளில் வாக்காளர் பட்டியலில் பெயர் இருந்தவர்கள், அதை தற்போதைய பட்டியலுடன் இணைத்து சரிபார்த்தால் போதுமானது. ஆனால் பெயர் இல்லாதவர்கள் இந்திய பிரஜை அடையாளச் சான்று, பிறந்த தேதி, மற்றும் தற்போதைய முகவரி சான்று உள்ளிட்ட 12 ஆவணங்களில் ஏதேனும் ஒன்றை இணைத்து விண்ணப்பிக்க வேண்டும் என தேர்தல் ஆணையம் தெரிவித்துள்ளது.

இதில் பீகார் SIR (State Identity Register) ஆவணம் சேர்க்கப்பட்டிருப்பது குறித்து திமுக அமைப்புச் செயலாளர் ஆர். எஸ். பாரதி கேள்வி எழுப்பினார். “பீகார் வாக்காளர் பட்டியல் மற்றும் தமிழ்நாட்டின் SIR பட்டியல் ஒன்றோடு ஒன்று இணைக்கப்படுவது தெளிவில்லாத நிலையை உருவாக்குகிறது. இது அரசியல் கட்சிகளுக்கு குழப்பம் தரும். பீகார் வாக்காளர்கள் தகுதி இல்லாமல் தமிழ்நாட்டில் வாக்காளர் பட்டியலில் சேர்க்கப்படுவார்களோ என்ற சந்தேகம் எழுந்துள்ளது” என்று அவர் கூறினார்.

இதற்கு பதிலளித்த தேர்தல் ஆணைய அதிகாரிகள், “இந்தியாவில் ஒருவருக்கு ஒரே இடத்தில்தான் வாக்குரிமை வழங்கப்படும். பீகார் SIR ஆவணம் தமிழ்நாட்டில் வசிப்பவர்களின் சரிபார்ப்பிற்காக மட்டுமே சேர்க்கப்பட்டுள்ளது. பீகார் தொழிலாளர்களை தமிழ்நாட்டின் வாக்காளர் பட்டியலில் சேர்க்கும் நோக்கம் எதுவும் இல்லை. தேவையான ஆவணங்கள் சமர்ப்பிக்கப்பட்டால் மட்டுமே சோதனை செய்து பெயர் சேர்க்கப்படும் அல்லது நிராகரிக்கப்படும்,” என்று விளக்கம் அளித்தனர்.

இதன் மூலம், தமிழ்நாட்டில் வேலை நிமித்தமாக தங்கியுள்ள பீகார் தொழிலாளர்கள் தாமாகவே வாக்காளர் பட்டியலில் சேர்க்கப்படுவார்கள் என்ற கூற்றில் உண்மை இல்லை என தேர்தல் அதிகாரிகள் உறுதி செய்துள்ளனர்.

இதையும் பிடிச்சிருந்தா படிச்சு பாருங்க

புரட்டாசி மாதத்தில் இத்தனை சிறப்புகளா? என்னென்ன வழிபாடுகள், பலன்கள் தெரியுமா?

லட்சத்துல கடன் இருந்தாலும் ஈஸியா தீர்க்கும் எளிய பரிகாரம்

பளபளக்கும் மிருதுவான சருமத்திற்கு இதை மட்டும் செய்தாலே போதும்!!

உங்க நட்சத்திரத்துக்கு லாபம் தரும் துறை எது?