ஜவுளி உற்பத்தியாளர்கள் அதிர்ச்சி... நூல் விலை கிலோவுக்கு 10 ரூபாய் உயர்வு!
தமிழகத்தில் ஜவுளித் தொழிலின் முக்கிய மூலப்பொருளான நூல் விலை நடப்பு மாதத்தில் மட்டும் இரண்டாவது முறையாக உயர்ந்துள்ளது. பஞ்சு தட்டுப்பாடு மற்றும் உலகளாவிய சந்தை அழுத்தங்கள் காரணமாக அனைத்து ரக நூல்களுக்கும் கிலோவுக்கு 10 ரூபாய் வரை அதிகரிக்கப்பட்டுள்ளது. கடந்த நான்கு மாதங்களில் மட்டும் நூல் விலை ஒட்டுமொத்தமாக 34 ரூபாய் வரை உயர்ந்திருப்பது ஜவுளி உற்பத்தியாளர்களிடையே பெரும் கவலையை ஏற்படுத்தியுள்ளது.
இந்தத் தொடர் விலை உயர்வால் உள்நாட்டு ஜவுளி உற்பத்தி கடுமையாகப் பாதிக்கப்படும் அபாயம் உருவாகியுள்ளது. நூல் விலை உயர்வால் ஜவுளி உற்பத்திச் செலவு அதிகரித்துள்ளதால், அதன் தாக்கம் சந்தையில் விற்கப்படும் ஆடைகளின் விலையிலும் எதிரொலிக்கும் என எதிர்பார்க்கப்படுகிறது. இதனால் வரும் காலங்களில் ஆயத்த ஆடைகள் மற்றும் இதர துணி வகைகளின் விலை கணிசமாக உயர வாய்ப்புள்ளதாகத் தொழில் துறையினர் தெரிவிக்கின்றனர்.
நூல் விலை ஏற்ற இறக்கத்தைக் கட்டுப்படுத்த மத்திய மற்றும் மாநில அரசுகள் உரிய நடவடிக்கை எடுக்க வேண்டும் என விசைத்தறி உரிமையாளர்கள் கோரிக்கை விடுத்துள்ளனர். ஏற்றுமதி வாய்ப்புகள் பாதிக்கப்படாமல் இருக்கவும், நெசவுத் தொழிலைப் பாதுகாக்கவும் பஞ்சு இறக்குமதி வரி மற்றும் இருப்பு வைப்பதில் புதிய கட்டுப்பாடுகளைக் கொண்டு வர வேண்டும் என வலியுறுத்தப்பட்டுள்ளது. இந்த விலை உயர்வு சாதாரண மக்களின் ஆடைத் தேவையிலும் சுமையை ஏற்படுத்தும் என அஞ்சப்படுகிறது.
லட்சத்துல கடன் இருந்தாலும் ஈஸியா தீர்க்கும் எளிய பரிகாரம்!