இந்திய வரலாற்றில் முதல்முறையாக, ஒரே வருடத்தில் 5 வர்த்தக ஒப்பந்தங்கள்... உலக மொத்த உள்நாட்டு உற்பத்தியில் 50% க்கும் அதிகமான பங்கு!
இந்திய பொருளாதார வரலாற்றில் முதல்முறையாக, குறுகிய காலத்திற்குள் இரண்டு முக்கிய வர்த்தக ஒப்பந்தங்களில் இந்தியா கையெழுத்திட்டுள்ளது. இந்த ஆண்டில் மட்டும் ஐந்து சர்வதேச வர்த்தக ஒப்பந்தங்கள் மேற்கொள்ளப்பட்டுள்ளன. இவை உலக மொத்த உள்நாட்டு உற்பத்தியின் 50 சதவீதத்துக்கும் மேல் உள்ள நாடுகளை உள்ளடக்கியதாக அமைந்துள்ளன. இதில், இந்தியாவின் மிகப்பெரிய வர்த்தக பங்காளியான அமெரிக்காவுடன் ஏற்பட்ட புதிய ஒப்பந்தம் முக்கியத்துவம் பெற்றுள்ளது.
அமெரிக்க அதிபர் டொனால்ட் டிரம்ப் பிரதமர் நரேந்திர மோடியுடன் தொலைபேசி உரையாடலில், இந்திய பொருட்கள் மீதான வரியை 25 சதவீதத்திலிருந்து 18 சதவீதமாக குறைக்க ஒப்புதல் அளித்தார். மேலும், ரஷ்யாவிலிருந்து எண்ணெய் கொள்முதல் செய்ததற்காக விதிக்கப்பட்ட கூடுதல் வரியும் நீக்கப்பட்டுள்ளதாக தெரிவிக்கப்பட்டுள்ளது. இதன் மூலம் தற்போதைய 191 பில்லியன் டாலர் வர்த்தகத்தை 500 பில்லியன் டாலராக உயர்த்தும் இலக்குடன் இரு நாடுகளும் முன்னேறி வருகின்றன.
இதற்கு முன்பு, இந்தியா ஐரோப்பிய ஒன்றியத்துடன் சுதந்திர வர்த்தக ஒப்பந்தத்தை அங்கீகரித்துள்ளது. உலகின் இரண்டு பெரிய வர்த்தக குழுக்களுடன் ஒரே நேரத்தில் ஒப்பந்தம் எட்டியிருப்பது இந்தியாவுக்கு முதல் முறை ஆகும். அமெரிக்கா, ஐரோப்பிய ஒன்றியத்திற்கு முன்பு, இந்தியா இங்கிலாந்து, ஓமன் மற்றும் நியூசிலாந்து ஆகிய நாடுகளுடனும் வர்த்தக ஒப்பந்தங்களில் கையெழுத்திட்டிருந்தது குறிப்பிடத்தக்கது.
2025 ஆம் ஆண்டுக்குள் உலக மொத்த உள்நாட்டு உற்பத்தியில் இந்தியா, அமெரிக்கா, ஐரோப்பிய ஒன்றியம், இங்கிலாந்து, ஓமன் மற்றும் நியூசிலாந்து ஆகிய நாடுகளின் ஒருங்கிணைந்த பங்கு 50 முதல் 55 சதவீதம் வரை இருக்கும் என கணிக்கப்படுகிறது. இதில், இந்தியா மற்றும் ஐரோப்பிய ஒன்றியத்தின் பங்கை மட்டும் சேர்த்தாலே உலக ஜிடிபியில் சுமார் 25 சதவீதம் ஆகும். அமெரிக்காவுடனான வர்த்தக ஒப்பந்தம் இந்தியாவுக்கு மேலும் முக்கியத்துவம் பெற்றுள்ளது, ஏனெனில் வங்கதேசம், வியட்நாம், தாய்லாந்து போன்ற நாடுகளுக்கு விதிக்கப்பட்ட அமெரிக்க வரிகள் இந்தியாவைவிட அதிகமாக உள்ளன.
உலகின் மிகப்பெரிய பொருளாதார நாடாக அமெரிக்காவும், சீனாவுக்குப் பிறகு இரண்டாவது இடத்தில் ஐரோப்பிய ஒன்றியமும், நான்காவது இடத்தில் இந்தியாவும் உள்ளன. சமீப காலம் வரை இங்கிலாந்தும் முதல் ஐந்து பொருளாதார நாடுகளில் ஒன்றாக இருந்தது. இதன் மூலம், உலகின் செல்வாக்கு மிக்க பொருளாதார நாடுகளின் பெரும் குழு தற்போது வர்த்தகத்தின் மூலம் இந்தியாவுடன் நெருக்கமாக இணைந்துள்ளது. இந்நாடுகளின் உலகளாவிய வர்த்தகப் பங்கு 38 முதல் 40 சதவீதம் வரை இருக்கும் என மதிப்பிடப்படுகிறது.
இதற்கு முன்பே இந்தியா பல்வேறு நாடுகளுடன் வர்த்தக ஒப்பந்தங்களை கொண்டுள்ளது. ஜப்பான், தென் கொரியா, ஆசியான் நாடுகள், சார்க் அமைப்பில் உள்ள நாடுகள், மொரிஷியஸ், ஐக்கிய அரபு எமிரேட்ஸ் மற்றும் ஆஸ்திரேலியா ஆகியவற்றுடன் பிராந்திய மற்றும் சுதந்திர வர்த்தக ஒப்பந்தங்கள் நடைமுறையில் உள்ளன. இதன் மூலம், உலக வர்த்தகத்தில் இந்தியாவின் பங்கு தொடர்ந்து விரிவடைந்து வருகிறது.
ஆயுள் முழுவதும் ரூ.52,000 ஓய்வூதியம்! எல்.ஐ.சி.யின் அசத்தல் திட்டம்!
வீடியோ! 5 அடி முதலையை விழுங்கும் மலைப்பாம்பு!!
வீடியோ! ராஜநாகத்துடன் ஆக்ரோஷமாக சண்டையிடும் கோழி!!