நாளை பொது வேலைநிறுத்தம் - திமுக முழு ஆதரவு - போராட்ட நேரமும் மாற்றம்!
நாளை நாடு முழுவதும் போராட்டம் அறிவிக்கப்பட்டுள்ள நிலையில், மத்திய தொழிற்சங்கங்கள் மற்றும் விவசாய அமைப்புகள் இணைந்து நடத்தும் போராட்டத்திற்குத் தமிழகத்தின் ஆளும் கட்சியான திமுகவும், அதன் கூட்டணி கட்சிகளும் ஆதரவு தெரிவித்துள்ளதால், நாளை தமிழகம் முழுவதும் போராட்டக்களம் சூடுபிடிக்கும் என எதிர்பார்க்கப்படுகிறது.
இது குறித்து திமுக தலைமை வெளியிட்டுள்ள அறிக்கையில் மத்திய அரசு மீதான பின்வரும் குற்றச்சாட்டுகள் முன்வைக்கப்பட்டுள்ளன: நாடாளுமன்றத்தில் விவாதமின்றித் தன்னிச்சையாக நிறைவேற்றப்பட்ட 4 புதிய தொழிலாளர் தொகுப்புச் சட்டங்களைத் திரும்பப் பெற வேண்டும்.
விவசாயிகளின் விளைபொருட்களுக்கு நியாயமான விலை வழங்காதது மற்றும் 'விதைகள் சட்டத் திருத்தம்' மூலம் சிறு, குறு விவசாயிகளின் வாழ்வாதாரத்தைப் பறிக்கும் முயற்சியைக் கைவிட வேண்டும். மின்சாரச் சட்டத் திருத்தம் மூலம் மின் உற்பத்தி மற்றும் பகிர்மானத்தைத் தனியார்மயமாக்கும் அபாயம் உள்ளதைக் கண்டித்தல். மகாத்மா காந்தி ஊரக வேலைவாய்ப்புத் திட்டத்தின் பெயரை மாற்றி, அதன் நிதிச் சுமையை மாநிலங்கள் மீது சுமத்துவதை நிறுத்த வேண்டும்.
ஏற்கனவே நாளை காலையில் திமுக தலைமையிலான 'மதச்சார்பற்ற முற்போக்குக் கூட்டணி' சார்பில் கண்டன ஆர்ப்பாட்டம் அறிவிக்கப்பட்டிருந்தது. ஆனால், நாளை தொழிற்சங்கங்களின் வேலைநிறுத்தம் மற்றும் மறியல் நடைபெறுவதால், அதற்கு இடையூறு இல்லாமல் ஆதரவு அளிக்கும் வகையில் திமுக கூட்டணியின் ஆர்ப்பாட்டம் நாளை மாலை 4 மணிக்கு மாற்றப்பட்டுள்ளது.
திமுகவுடன் இணைந்து அதன் கூட்டணிக் கட்சிகளான காங்கிரஸ், இடதுசாரிகள், விடுதலைச் சிறுத்தைகள் கட்சி, மதிமுக மற்றும் மக்கள் நீதி மய்யம் உள்ளிட்ட கட்சிகளும் இந்தப் போராட்டத்தில் பங்கேற்கின்றன. மத்திய பட்ஜெட்டில் தமிழகம் புறக்கணிக்கப்பட்டதைக் கண்டித்தும் இந்த ஆர்ப்பாட்டம் நடைபெறும் எனத் தெரிவிக்கப்பட்டுள்ளது.
போக்குவரத்துத் தொழிலாளர் சங்கங்கள் வேலைநிறுத்தத்தில் பங்கேற்பதால், அரசுப் பேருந்துகளின் இயக்கம் ஓரளவிற்குப் பாதிக்கப்பட வாய்ப்புள்ளது. வங்கி மற்றும் காப்பீட்டுத் துறை ஊழியர்களும் இதில் பங்கேற்பதால், வங்கிச் சேவைகளில் தொய்வு ஏற்படலாம். தூத்துக்குடி உள்ளிட்ட சில மாவட்டங்களில் வணிகர்களும் கடையடைப்பு செய்து ஆதரவு தெரிவிக்க வேண்டுகோள் விடுக்கப்பட்டுள்ளது.
ஆயுள் முழுவதும் ரூ.52,000 ஓய்வூதியம்! எல்.ஐ.சி.யின் அசத்தல் திட்டம்!
வீடியோ! 5 அடி முதலையை விழுங்கும் மலைப்பாம்பு!!
வீடியோ! ராஜநாகத்துடன் ஆக்ரோஷமாக சண்டையிடும் கோழி!!