தமிழக சட்டமன்றத் தேர்தல் 2026 நெருங்கி வரும் சூழலில், ஏழை மற்றும் நடுத்தர மக்களின் எதிர்பார்ப்பைப் பூர்த்தி செய்யும் வகையில் கூட்டுறவு வங்கிகளில் மீண்டும் ஒரு 'நகைக்கடன் தள்ளுபடி' அறிவிப்பு வெளியாக வாய்ப்புள்ளதாகத் தகவல்கள் கசிந்துள்ளன. இது குறித்த முக்கிய விவரங்களை நிதியமைச்சர் தங்கம் தென்னரசு சமீபத்திய பட்ஜெட் கூட்டத்தொடரின் போது சூசகமாகத் தெரிவித்துள்ளார்.

2021ஆம் ஆண்டு திமுக ஆட்சிக்கு வந்தவுடன் அளித்த வாக்குறுதியின்படி, 5 சவரன் வரை அடகு வைத்த சுமார் 13.12 லட்சம் பேருக்குப் பயன் கிடைக்கும் வகையில் ரூ.4,889 கோடி மதிப்பிலான நகைக்கடன்கள் தள்ளுபடி செய்யப்பட்டன. தகுதியுள்ள நபர்களின் விவரங்கள் தீவிரமாகச் சரிபார்க்கப்பட்டு, கடன் சுமையில் இருந்த குடும்பங்களுக்குப் பெரும் நிம்மதி வழங்கப்பட்டது.

சமீபத்தில் தாக்கல் செய்யப்பட்ட 2026-27 இடைக்கால பட்ஜெட்டில், சிறுபான்மையினர் நலன் மற்றும் மகளிர் உரிமைத் தொகை போன்ற திட்டங்களுக்கு அதிக முக்கியத்துவம் அளிக்கப்பட்டுள்ளது. இதனைத் தொடர்ந்து, கூட்டுறவு வங்கிகளில் தற்போது நிலுவையில் உள்ள நகைக்கடன்கள் மற்றும் அவற்றை அடகு வைத்துள்ள பயனாளிகளின் விவரங்களைச் சேகரிக்க அதிகாரிகளுக்கு வாய்மொழி உத்தரவு பிறப்பிக்கப்பட்டுள்ளதாகத் தெரிகிறது.

கூட்டுறவுத் துறை அதிகாரிகள் ஒவ்வொரு மாவட்ட வாரியாக நிலுவையில் உள்ள கடன்கள் பற்றிய பட்டியலைத் தயார் செய்து வருவதாகக் கூறப்படுகிறது. கடந்த முறை சில நிபந்தனைகளால் தள்ளுபடி கிடைக்காதவர்களுக்கு, இம்முறை ஏதேனும் சலுகை வழங்கப்படுமா என்ற எதிர்பார்ப்பு நிலவுகிறது.

எதிர்க்கட்சியான அதிமுகவும் மாணவர்களின் கல்விக்கடன் மற்றும் விவசாயக் கடன் தள்ளுபடி குறித்துப் பேசி வருவதால், அதனைச் சமாளிக்க அரசு தரப்பிலிருந்து மெகா தள்ளுபடி அறிவிப்பு வெளியாகலாம் எனக் கருதப்படுகிறது.

தமிழக அரசியலில் கடன் தள்ளுபடி என்பது எப்போதும் வெற்றியைத் தீர்மானிக்கும் ஒரு முக்கியக் காரணியாக இருந்து வருகிறது. குறிப்பாக, பெண்களின் வாக்குகளைக் கவர்வதற்கு 5 சவரன் நகைக்கடன் தள்ளுபடி ஒரு வலுவான ஆயுதமாகும். 2026 சட்டமன்றத் தேர்தலுக்கான தேர்தல் அறிக்கை தயாராகி வரும் நிலையில், அதில் இந்தத் தள்ளுபடி குறித்த அதிகாரப்பூர்வ அறிவிப்பு இடம்பெற அதிக வாய்ப்புள்ளதாக அரசியல் நோக்கர்கள் கணிக்கின்றனர்.

கூட்டுறவு வங்கிகளில் நகை வைத்துள்ள லட்சக்கணக்கான குடும்பங்கள், கடந்த முறையைப் போலவே தங்களுக்கு ஒரு விடிவுகாலம் பிறக்குமா என்று ஆவலுடன் காத்திருக்கின்றனர்.

ஆயுள் முழுவதும் ரூ.52,000 ஓய்வூதியம்! எல்.ஐ.சி.யின் அசத்தல் திட்டம்!

வீடியோ!  5 அடி முதலையை விழுங்கும் மலைப்பாம்பு!!

வீடியோ! ராஜநாகத்துடன் ஆக்ரோஷமாக சண்டையிடும் கோழி!!

உங்க ராசிக்கேற்ற தொழில் எது? இந்த துறை அதிக லாபம் தரும்

லட்சத்துல கடன் இருந்தாலும் ஈஸியா தீர்க்கும் எளிய பரிகாரம்!