கோர விபத்து... ஜாக்கி நழுவி பேருந்து அடியில் சிக்கி இளம் மெக்கானிக் பலி!
கேரள மாநிலம் ஆலப்புழா மாவட்டம் காயங்குளம் அருகே உள்ள மீனத்தேல் பகுதியைச் சேர்ந்த பிரகாஷ் என்பவரது மகன் கிரி பிரகாஷ், கோழிக்கோடு பகுதியில் தனியார் பேருந்துகளைப் பழுதுபார்க்கும் பணியில் ஈடுபட்டு வந்தார். 23 வயதான இவர், தனது உதவியாளரான அஸ்வின் என்பவருடன் சேர்ந்து சரோவரம் பகுதியில் நிறுத்தப்பட்டிருந்த ஒரு பேருந்தின் அடியில் படுத்து வேலை செய்துகொண்டிருந்தார். அப்போது பேருந்தை உயர்த்தி நிறுத்தியிருந்த ஜாக்கி கட்டை எதிர்பாராத விதமாகத் திடீரென நழுவியதால், ராட்சத பேருந்து அப்படியே கீழே இறங்கி இருவர் மீதும் விழுந்தது. இதில் பேருந்தின் இரும்புச் சட்டங்களுக்கு இடையே சிக்கிக்கொண்ட கிரி பிரகாஷ் மற்றும் அஸ்வின் ஆகிய இருவரும் பலத்த காயமடைந்து உயிருக்குப் போராடினர்.
விபத்து குறித்த தகவல் கிடைத்ததும் கோழிக்கோடு காவல்துறையினர் மற்றும் தீயணைப்புத் துறையினர் அதிநவீன கருவிகளுடன் சம்பவ இடத்திற்கு விரைந்து வந்தனர். நீண்ட போராட்டத்திற்குப் பிறகு ரப்பர் காற்றழுத்தக் கருவிகள் மூலம் பேருந்தை உயர்த்தி, அதன் அடியில் சிக்கிக்கிடந்த இருவரையும் மீட்டனர். உடனடியாக அவர்கள் கோழிக்கோடு அரசு மருத்துவக் கல்லூரி மருத்துவமனைக்குக் கொண்டு செல்லப்பட்டனர். அங்கு அவர்களைப் பரிசோதித்த மருத்துவர்கள், கிரி பிரகாஷ் ஏற்கனவே உயிரிழந்துவிட்டதாகத் தெரிவித்தனர். அவருடன் இருந்த அஸ்வின் தற்போது மிக மோசமான நிலையில் தீவிர சிகிச்சைப் பிரிவில் அனுமதிக்கப்பட்டு, உயிருக்குப் போராடி வருகிறார்.
உயிரிழந்த கிரி பிரகாஷின் உடல் பிரேதப் பரிசோதனைக்காக அனுப்பி வைக்கப்பட்டுள்ள நிலையில், அவரது குடும்பத்தினர் இந்தத் துயரச் செய்தியைக் கேட்டு நிலைகுலைந்து போயுள்ளனர். வருங்காலத் தூணாக விளங்கிய வாலிபர் ஒருவர் பணியின் போது நேர்ந்த விபத்தில் உயிரிழந்தது அந்தப் பகுதியில் பெரும் சோகத்தை ஏற்படுத்தியுள்ளது. பாதுகாப்பு உபகரணங்களைச் சரியாகக் கையாளாதது விபத்திற்குக் காரணமா அல்லது இயந்திரக் கோளாறா என்பது குறித்துப் போலீசார் வழக்குப் பதிவு செய்து தீவிர விசாரணை நடத்தி வருகின்றனர். தொழிலாளர்கள் கனரக வாகனங்களைப் பழுதுபார்க்கும் போது கூடுதல் எச்சரிக்கையுடன் இருக்க வேண்டும் என்று அதிகாரிகள் அறிவுறுத்தியுள்ளனர்.
ஆயுள் முழுவதும் ரூ.52,000 ஓய்வூதியம்! எல்.ஐ.சி.யின் அசத்தல் திட்டம்!
வீடியோ! 5 அடி முதலையை விழுங்கும் மலைப்பாம்பு!!
வீடியோ! ராஜநாகத்துடன் ஆக்ரோஷமாக சண்டையிடும் கோழி!!