விழுப்புரம் மாவட்டம் விக்கிரவாண்டி அருகே இன்று அதிகாலை ஒரு தனியார் ஆம்னி பேருந்து ஆற்றுப்பாலத்தில் மோதி கோர விபத்துக்குள்ளானது. இந்த விபத்தில் பேருந்தில் பயணம் செய்த 35 பயணிகள் படுகாயமடைந்தனர். சென்னையில் இருந்து மதுரை நோக்கிச் சென்று கொண்டிருந்த அந்தப் பேருந்து, விக்கிரவாண்டி அடுத்த வி.சாலையூர் பகுதியில் உள்ள சங்கராபரணி ஆற்றுப்பாலத்தைக் கடக்க முயன்றபோது இந்த விபத்து நிகழ்ந்ததாகத் தகவல்கள் தெரிவிக்கின்றன.

இன்று அதிகாலை சுமார் 4 மணி அளவில், பயணிகள் ஆழ்ந்த உறக்கத்தில் இருந்த போது விபத்து நிகழ்ந்துள்ளது. அதிகாலை பனிமூட்டம் அல்லது ஓட்டுநரின் தூக்கக் கலக்கம் காரணமாகப் பேருந்து கட்டுப்பாட்டை இழந்திருக்கலாம் என்று முதற்கட்ட விசாரணையில் தெரியவந்துள்ளது. அதிவேகமாக வந்த பேருந்து, ஆற்றுப்பாலத்தின் தடுப்புச் சுவரில் மிகப்பலமாக மோதியது. மோதிய வேகத்தில் பேருந்தின் முன்பகுதி சுக்குநூறாக நொறுங்கியதுடன், பேருந்து பாலத்தின் ஓரத்தில் அந்தரத்தில் தொங்கியபடி நின்றது. நல்லவேளையாகப் பேருந்து ஆற்றுக்குள் விழாததால் பெரும் உயிர்ச்சேதம் தவிர்க்கப்பட்டது.

விபத்து நடந்தவுடன் அலறல் சத்தம் கேட்டு அப்பகுதி மக்கள் ஓடிவந்து மீட்புப் பணியில் ஈடுபட்டனர். தகவலறிந்து விரைந்து வந்த விக்கிரவாண்டி போலீசார் மற்றும் தீயணைப்புத் துறையினர், இடிபாடுகளுக்குள் சிக்கியிருந்த பயணிகளை மீட்டனர். விபத்தில் படுகாயமடைந்த குழந்தைகள் மற்றும் பெண்கள் உள்ளிட்ட 35 பேரும் உடனடியாக 108 ஆம்புலன்ஸ் மூலம் முண்டியம்பாக்கம் அரசு மருத்துவக் கல்லூரி மருத்துவமனைக்கு அனுப்பி வைக்கப்பட்டனர். அங்கு அவர்களுக்குத் தீவிர சிகிச்சை அளிக்கப்பட்டு வருகிறது. இதில் சிலரது நிலைமை கவலைக்கிடமாக இருப்பதாக மருத்துவமனை வட்டாரங்கள் தெரிவிக்கின்றன.

தேசிய நெடுஞ்சாலையில் ஆற்றுப்பாலத்தின் குறுக்கே பேருந்து விபத்துக்குள்ளானதால், சென்னை - திருச்சி தேசிய நெடுஞ்சாலையில் சுமார் 2 மணி நேரத்திற்கும் மேலாகப் போக்குவரத்து கடுமையாகப் பாதிக்கப்பட்டது. விபத்துக்குள்ளான பேருந்தை ராட்சத கிரேன் மூலம் போலீசார் அப்புறப்படுத்திய பின்னரே போக்குவரத்து சீரானது. இது குறித்து விக்கிரவாண்டி போலீசார் வழக்குப் பதிவு செய்து, தலைமறைவான பேருந்து ஓட்டுநரைத் தீவிரமாகத் தேடி வருகின்றனர். பனிமூட்டம் நிலவும் இக்காலங்களில் அதிகாலை நேரப் பயணத்தில் வாகன ஓட்டிகள் மிகுந்த எச்சரிக்கையுடன் இருக்குமாறு காவல் துறை அறிவுறுத்தியுள்ளது.

ஆயுள் முழுவதும் ரூ.52,000 ஓய்வூதியம்! எல்.ஐ.சி.யின் அசத்தல் திட்டம்!

வீடியோ!  5 அடி முதலையை விழுங்கும் மலைப்பாம்பு!!

வீடியோ! ராஜநாகத்துடன் ஆக்ரோஷமாக சண்டையிடும் கோழி!!

உங்க ராசிக்கேற்ற தொழில் எது? இந்த துறை அதிக லாபம் தரும்

லட்சத்துல கடன் இருந்தாலும் ஈஸியா தீர்க்கும் எளிய பரிகாரம்!