நினைத்தாலே முக்தி தரும் திருவண்ணாமலையில், தை மாத பௌர்ணமியை முன்னிட்டு நேற்று மாலை முதல் லட்சக்கணக்கான பக்தர்கள் விடிய விடிய கிரிவலம் வந்து அண்ணாமலையாரை வழிபட்டனர். தைப்பூசம், பௌர்ணமி மற்றும் ஞாயிற்றுக்கிழமை விடுமுறை என அனைத்தும் ஒரே நாளில் அமைந்ததால், பக்தர்களின் கூட்டம் வழக்கத்தை விட அதிகமாகக் காணப்பட்டது.

கோயில் நிர்வாகத்தின் அறிவிப்புப்படி, தை மாத பௌர்ணமி திதி பிப்ரவரி 1-ம் தேதி அதிகாலை 5:34 மணிக்குத் தொடங்கி இன்று அதிகாலை 4:05 மணி வரை நீடித்தது. நேற்று அதிகாலை முதலே பக்தர்கள் 14 கிலோமீட்டர் நீளமுள்ள கிரிவலப் பாதையில் வலம் வரத் தொடங்கினர். கிரிவலப் பாதையில் உள்ள அஷ்டலிங்க சன்னதிகளிலும் பக்தர்கள் நீண்ட வரிசையில் நின்று வழிபட்டனர். 

அண்ணாமலையார் கோயிலில் நேற்று அதிகாலை 4 மணிக்கு நடை திறக்கப்பட்டு, சுவாமிக்கும் அம்மனுக்கும் சிறப்பு அபிஷேகங்கள் மற்றும் ஆராதனைகள் நடைபெற்றன. தரிசனத்திற்காகப் பக்தர்கள் பெரிய தெரு வரை நீண்ட வரிசையில் காத்திருந்தனர். வரிசையில் நின்ற பக்தர்கள் சுவாமி தரிசனம் செய்ய சுமார் 6 மணி நேரத்திற்கும் மேலாகச் செலவிட வேண்டியிருந்தது.

தைப்பூசத் திருவிழாவை முன்னிட்டு, ஈசான்ய குளத்தில் அண்ணாமலையாருக்குப் பிரமாண்டமான தீர்த்தவாரி நடைபெற்றது. அலங்கார ரூபத்தில் சந்திரசேகரர் எழுந்தருளி பக்தர்களுக்கு அருள்பாலித்தார். தீர்த்தவாரி முடிந்து சுவாமி கோயிலுக்குத் திரும்பும் வழியில், வள்ளால மகாராஜாவுக்குத் திதி கொடுக்கும் நிகழ்வு மேளதாளங்கள் இன்றி அமைதியாக நடைபெற்றது.

பக்தர்களின் வசதிக்காகத் தமிழகத்தின் பல்வேறு மாவட்டங்களிலிருந்தும், அண்டை மாநிலங்களான ஆந்திரா, கர்நாடகா, தெலங்கானாவிலிருந்தும் ஆயிரக்கணக்கான வாகனங்களில் மக்கள் வருகை தந்தனர். போக்குவரத்து நெரிசலைக் குறைக்கத் தற்காலிகப் பேருந்து நிலையங்கள் அமைக்கப்பட்டிருந்தன. ஆயிரக்கணக்கான போலீஸார் பாதுகாப்புப் பணியில் ஈடுபட்டனர்.

கிரிவலப் பாதை முழுவதும் பல்வேறு அமைப்புகள் சார்பில் விடிய விடிய அன்னதானம் மற்றும் குடிநீர் வழங்கப்பட்டது. நேற்று அதிகாலை தொடங்கிய கிரிவலப் பயணம், இன்று அதிகாலை பௌர்ணமி திதி முடியும் வரை பல்லாயிரக்கணக்கான பக்தர்களின் பங்கேற்புடன் பக்தி மயமாக நிறைவுற்றது.

ஆயுள் முழுவதும் ரூ.52,000 ஓய்வூதியம்! எல்.ஐ.சி.யின் அசத்தல் திட்டம்!

வீடியோ!  5 அடி முதலையை விழுங்கும் மலைப்பாம்பு!!

வீடியோ! ராஜநாகத்துடன் ஆக்ரோஷமாக சண்டையிடும் கோழி!!

உங்க ராசிக்கேற்ற தொழில் எது? இந்த துறை அதிக லாபம் தரும்

லட்சத்துல கடன் இருந்தாலும் ஈஸியா தீர்க்கும் எளிய பரிகாரம்!