தினம் ஒரு திருப்பாவை... பாசுரம் 17!
மார்கழி 17... தினம் ஒரு திருப்பாவை... பாசுரம் 17
எழுந்தருள்வாய் கண்ணனே…!
அம்பரமே தண்ணீரே சோறே அறஞ்செய்யும்
எம்பெருமான் நந்தகோபாலா! எழுந்திராய்
கொம்பனார்க்கு எல்லாம் கொழுந்தே! குலவிளக்கே!
எம்பெருமாட்டி யசோதாய்! அறிவுறாய்!
அம்பரம் ஊடறுத்து ஓங்கி உலகளந்த
உம்பர்கோமானே! உறங்காது எழுந்திராய்
செம்பொற் கழலடிச் செல்வா! பலதேவா!
உம்பியும் நீயும் உறங்கலோர் எம்பாவாய்
பொருள் விளக்கம் ;
ஆடையும், குளிர்ந்த நீரும், உணவும் எவரும் திருப்தி அடையும் அளவுக்கு தர்மம் செய்யும் நந்தகோபரின் அருள்மகனே, நீ எழுந்தருள வேண்டும். கொடிபோல் மெலிந்த இடையைக் கொண்ட பெண்களுக்கு எல்லாம் தலைவியாக விளங்கும், இளகிய மனம் கொண்ட யசோதையின் அருமை புதல்வனே, உன் தரிசனத்தை எதிர்நோக்கி பக்தர்கள் காத்திருக்கிறார்கள்.
மங்களகரமான தீபம் போல் ஒளிரும் முகத்தைக் கொண்ட யசோதையே, நீயும் எழுந்தருள வேண்டும். விண்ணையே பிளந்து, உன் திருவடிகளால் உலகை அளந்த தேவர்களின் தலைவனான கண்ணனே, கண் விழித்து எங்களை அருளால் காக்க வேண்டும் என வேண்டுதல் எழுகிறது.
செம்பொன்னால் செய்த சிலம்புகளை அணிந்த செல்வத்திருமகனான பலராமனே, நீயும் உன் தம்பியுடனே உறக்கத்திலிருந்து எழுந்து தரிசனம் தர வேண்டும். உன் அருள் பார்வை பட்டாலே பாவங்கள் நீங்கும் என்ற நம்பிக்கையுடன், உன் வரவை பக்தர்கள் ஆவலுடன் எதிர்பார்க்கின்றனர்.
திருப்பாவையில் வாமன அவதாரத்தை ஆண்டாள் மிகச் சிறப்பாகப் பாடுகிறாள். மூன்று பாசுரங்களில் இந்த அவதாரத்தின் மகிமை வெளிப்படுகிறது. மூன்றாவது பாசுரத்தில் “ஓங்கி உலகளந்த உத்தமன் பேர்பாடி” என்றும், இப்பாசுரத்திலும், 24-வது பாசுரத்தில் “அன்று இவ்வுலகம் அளந்தாய் அடி போற்றி” என்றும் அவர் வாமனனை நினைவுகூர்கிறாள்.
அசுரனாயினும் நல்லுணர்வு கொண்ட மகாபலி, தேவர்களை அடக்கி வெற்றியின் கர்வத்தில் மூழ்கினான். அந்த அகங்காரம் மனிதனை இறைவனிடமிருந்து விலக்குவதை உணர்த்தவே, நாராயணன் வாமனனாக வந்து அவனை ஆட்கொண்டார். கர்வம் களைந்தாலே இறை அருள் எளிதாக கிடைக்கும் என்பதே இந்த அவதாரத்தின் மையம்.
திருப்பாவை பாடுபவர்களும் “நாம் செய்கிறோம்” என்ற அகந்தையை விட்டு, அடக்கத்துடன் இறைவனை நாட வேண்டும் என்பதே ஆண்டாள் சொல்லும் செய்தி. கர்வம் கரைந்த இடத்தில்தான் பக்தி மலர்கிறது. வாமனன் எடுத்த மூன்று அடிகள், மனித மனத்தில் இருக்கும் அகங்காரத்தையும் அளந்துவிட்டதாக ஆண்டாள் உணர்த்துகிறாள்.
ஆயுள் முழுவதும் ரூ.52,000 ஓய்வூதியம்! எல்.ஐ.சி.யின் அசத்தல் திட்டம்!
வீடியோ! 5 அடி முதலையை விழுங்கும் மலைப்பாம்பு!!
வீடியோ! ராஜநாகத்துடன் ஆக்ரோஷமாக சண்டையிடும் கோழி!!