டாக்டர் வந்தனா தாஸ் கொலை வழக்கில் அதிரடித் தீர்ப்பு... வெறிச்செயலில் ஈடுபட்ட ஆசிரியருக்கு ஆயுள் தண்டனை!
கேரள மாநிலம் கொல்லம் மாவட்டத்தில் கடந்த 2023ம் ஆண்டு அரங்கேறிய இளம் பெண் மருத்துவர் வந்தனா தாஸின் கொடூரக் கொலை வழக்கு, இன்று ஒரு முக்கியக் கட்டத்தை எட்டியுள்ளது. அரசு மருத்துவமனையில் கடமையில் இருந்தபோது, சிகிச்சைக்காக அழைத்து வரப்பட்ட சந்தீப் என்ற ஆசிரியரால் டாக்டர் வந்தனா தாஸ் கத்திரிக்கோலால் சரமாரியாகக் குத்திக் கொல்லப்பட்டார். நாடு முழுவதும் பெரும் அதிர்வலைகளையும், மருத்துவர்களிடையே போராட்டத்தையும் வெடிக்கச் செய்த இந்த வழக்கில், கொல்லம் மாவட்ட நீதிமன்றம் இன்று தனது இறுதித் தீர்ப்பை வழங்கியுள்ளது. குற்றவாளி சந்தீப்பைத் தகுந்த ஆதாரங்களுடன் குற்றவாளி என உறுதி செய்த நீதிபதி, அவருக்கு ஆயுள் தண்டனை விதித்து அதிரடி உத்தரவு பிறப்பித்துள்ளார்.
சம்பவத்தன்று போதையில் இருந்ததாகக் கூறப்படும் ஆசிரியர் சந்தீப், அக்கம் பக்கத்தினருடன் சண்டையிட்டுத் தனது காலில் ஏற்பட்ட காயத்திற்காகக் காவல்துறையினரால் மருத்துவமனைக்கு அழைத்து வரப்பட்டார். அங்குத் தனக்குச் சிகிச்சை அளித்த மருத்துவர் வந்தனா தாஸை எவ்விதக் காரணமுமின்றி அங்கிருந்த கத்திரிக்கோலை எடுத்து வெறித்தனமாகத் தாக்கினார். பெற்றோரின் ஒரே மகளான வந்தனா தாஸ், மருத்துவராகிச் சேவை செய்ய வேண்டும் என்ற கனவோடு பணியாற்றி வந்த நிலையில், இந்தத் துரதிர்ஷ்டவசமான சம்பவத்தில் தனது இன்னுயிரை இழந்தார். இந்தச் சம்பவம் மருத்துவமனை வளாகங்களில் பாதுகாப்பு குறித்தப் பெரும் விவாதத்தையே கிளப்பியது.
நீதிமன்றம் இன்று ஆயுள் தண்டனை விதித்திருந்தாலும், வந்தனா தாஸின் குடும்பத்தினர் மற்றும் அவர்களது வழக்கறிஞர் தரப்பில் இந்தத் தீர்ப்பு திருப்தி அளிக்கவில்லை எனத் தெரிவிக்கப்பட்டுள்ளது. "தவறு செய்தவருக்கு உச்சக்கட்டத் தண்டனையான மரண தண்டனை மட்டுமே நீதியாக இருக்கும்" எனக் குறிப்பிட்டுள்ள அவர்கள், இந்தத் தண்டனையை எதிர்த்து உயர்நீதிமன்றத்தில் மேல்முறையீடு செய்யப் போவதாக அறிவித்துள்ளனர். ஒரு இளம் மருத்துவரின் உயிரைப் பறித்த கொடூரக் குற்றவாளிக்குக் கிடைத்துள்ள இந்தத் தண்டனை, கேரள அரசியல் மற்றும் மருத்துவ வட்டாரத்தில் இன்று பேசுபொருளாகியுள்ளது.
ஆயுள் முழுவதும் ரூ.52,000 ஓய்வூதியம்! எல்.ஐ.சி.யின் அசத்தல் திட்டம்!
வீடியோ! 5 அடி முதலையை விழுங்கும் மலைப்பாம்பு!!
வீடியோ! ராஜநாகத்துடன் ஆக்ரோஷமாக சண்டையிடும் கோழி!!