அமேசான் நிறுவனருக்கு 61வது வயதில் மாஜி டிவி நிருபருடன் திருமணம்... குவிந்த பிரபலங்கள்!
அமேசான் நிறுவனர் ஜெப் பெசோஸின், தனது 61 வயதில், முன்னாள் டிவி நிருபரை கரம் பிடித்துள்ளார். உலகின் பெரும் கோடீஸ்வரரான அமேசான் நிறுவனர் ஜெப் பெசோஸின் திருமணக் கொண்டாட்டங்களால், இத்தாலியின் புகழ்பெற்ற வெனிஸ் நகரம் களைகட்டியிருந்தது.
இதற்கு ஒருபுறம் கடுமையான எதிர்ப்புகளும் கிளம்பின. ஏற்கனவே வெனிஸ் சுற்றுலாப் பயணிகளின் வருகையால் நிரம்பி வழியும் நிலையில் கோடீஸ்வரர்களின் இத்தகைய ஆடம்பரக் கொண்டாட்டங்கள் தேவையா? எனக் கேள்வி எழுப்பி, உள்ளூர் மக்கள் மற்றும் சமூக ஆர்வலர்கள் போராட்டத்தில் ஈடுபட்டனர்.
‘பெசோஸ் வேண்டாம்’, ‘கோடீஸ்வரர்களுக்கு வரி விதி’ போன்ற வாசகங்கள் அடங்கிய பதாகைகளை ஏந்தியும், நகரின் முக்கிய இடங்களில் நியான் விளக்குகளில் எதிர்ப்பு வாசகங்களை ஒளிரச் செய்தும் அவர்கள் தங்கள் எதிர்ப்பைப் பதிவு செய்தனர். மேலும், இந்தத் திருமணத்திற்காக நூற்றுக்கணக்கான தனியார் விமானங்கள் வந்து செல்வதால் ஏற்படும் கார்பன் மாசுபாடுகளும் சுட்டிக்காட்டப்பட்டன. இந்த எதிர்ப்புகளுக்கு மத்தியில், அமேசான் நிறுவனர் ஜெப் பெசோஸ் (61) – முன்னாள் தொலைக்காட்சி செய்தியாளர் லாரன் சான்செஸ் (55) ஆகியோரின் திருமணம், நேற்று வெனிஸில் உள்ள சான் ஜார்ஜியோ மேஜியோரே தீவில் மிகவும் பிரம்மாண்டமாக நடந்தேறியது.
கிம் கர்தாஷியன், ஓப்ரா வின்ஃப்ரே, ஆர்லாண்டோ ப்ளூம், அமெரிக்க முன்னாள் அதிபர் டிரம்பின் மகள் இவான்கா டிரம்ப், ஜோர்டான் ராணி ரானியா உட்பட பல உலகப் பிரபலங்கள் கலந்துகொண்டனர். விழாவில், புகழ்பெற்ற ஓபரா பாடகர் ஆண்ட்ரியா போசெல்லியின் மகன் மேட்டியோ போசெல்லி இசை நிகழ்ச்சி நடத்தினார். திருமணத்திற்குப் பிறகு, லாரன் சான்செஸ் தனது இன்ஸ்டாகிராம் பெயரை ‘லாரன்சான்செஸ்பெசோஸ்’ என மாற்றியுள்ளார். இந்தத் திருமணத்திற்காக வெனிஸ் நகரத்திற்கு ஜெப் பெசோஸ் சுமார் 3.5 மில்லியன் டாலர் நன்கொடை அளித்ததாகவும் தகவல்கள் வெளியாகியுள்ளன.
இதையும் பிடிச்சிருந்தா படிச்சு பாருங்க
லட்சத்துல கடன் இருந்தாலும் ஈஸியா தீர்க்கும் எளிய பரிகாரம்
பளபளக்கும் மிருதுவான சருமத்திற்கு இதை மட்டும் செய்தாலே போதும்!!
நாப்கின்களால் ஏற்படும் ரேசஸ் மற்றும் எரிச்சலை போக்க இயற்கை வழிகள்!!