மாணவி வன்கொடுமை வழக்கில் ஒருவா் தான் குற்றவாளி... காவல் ஆணையா் தகவல்... அப்போ அந்த ஆடி கார்?!

அண்ணா பல்கலைக்கழக வளாகத்தில் பொறியியல் மாணவி பாலியல் வன்கொடுமை செய்யப்பட்ட வழக்கில், ஒருவா் தான் குற்றவாளி என சென்னை காவல் ஆணையா் ஏ.அருண் தெரிவித்தாா்.

இது தொடா்பாக சென்னையில் சேற்று காவல் ஆணையர் அளித்த பேட்டியில், “ பாதிக்கப்பட்ட மாணவி கொடுத்த புகாரின் அடிப்படையில் முதல் தகவல் அறிக்கை பதிவு செய்யப்பட்டது. ஒரு வழக்கில் பாதிக்கப்பட்டவா் அளித்த தகவலை அப்படியே முதல் தகவல் அறிக்கையில் சோ்ப்பது தான் சட்ட நடைமுறையும், விதிமுறையுமாகும். 

அதனால் தான் முதல் தகவல் அறிக்கையில் மாணவி கொடுத்த புகாா் அப்படியே சோ்க்கப்பட்டது. அதில் காவல்துறையினா் எந்த திருத்தமும் செய்யக் கூடாது.

கோட்டூா்புரம் உதவி ஆணையா் பாரதிராஜா தலைமையில் 4 தனிப்படைகள் அமைக்கப்பட்டு, விசாரணை நடத்தப்பட்டது. அறிவியல் பூா்வமாக ஆதாரங்கள் சேகரிக்கப்பட்டு, விசாரணை நடத்தப்பட்டது. ஞானசேகரன் தான் குற்றத்தில் ஈடுபட்டதற்கான உறுதியான தடயங்கள் சேகரிக்கப்பட்ட பின்னரே, அவா் கைது செய்யப்பட்டாா். 

இது வரை நடைபெற்ற புலனாய்வில் வழக்கில் ஞானசேகரன் ஒருவா் தான் குற்றவாளி. சம்பவம் நடந்த போது ஞானசேகரன் ஒருவருடன் கைப்பேசி மூலம் பேசியதாக தகவல் பரவுகிறது. ஆனால், அது உண்மை இல்லை. ஏனெனில், சம்பவம் நடந்த போது செல்போனை 'ஏரோபிளேன் மோடில்' ஞானசேகரன் வைத்துள்ளாா். அவா் மாணவியை மிரட்டுவதற்கும், பயமுறுத்துவதற்கும் பொய்யாக கைப்பேசி மூலம் ஒருவரிடம் பேசுவது போல நாடகமாடியுள்ளாா்.

இதுவரை ஞானசேகரன் மீது வேறு யாரும் புகாா் அளிக்கவில்லை. நீதிமன்றக் காவலில் இருக்கும் ஞானசேகரனை மீண்டும் காவலில் எடுத்து விசாரிப்போம். அந்த விசாரணையில் வேறு யாரும் ஞானசேகரனால் பாதிக்கப்பட்டது தெரிய வந்தால், சம்பந்தப்பட்டவா்களிடம் காவல் துறையினா் நம்பிக்கையளித்து புகாா் பெற்று நடவடிக்கை எடுப்போம். வேறு யாரும் பாதிக்கப்பட்டுள்ளாா்களா என்பது இனி நடைபெறும் விசாரணையில் தான் தெரிய வரும்.

ஞானசேகரன் மீது சென்னையில் 2013ம் ஆண்டு முதல் 20 வழக்குகள் உள்ளன. அந்த வழக்குகள் திருட்டு, கட்டடங்களில் புகுந்து திருட்டு போன்றவை ஆகும். ஞானசேகரன் மீது ரெளடித்தனம், பாலியல் வழக்குகள் இதற்கு முன்பு வரை இல்லை. 20 வழக்குகளில் 6 வழக்குகளில் ஞானசேகரன் தண்டனை பெற்றுள்ளாா்.

ஞானசேகரன் மீது பதியப்பட்ட வழக்கில் கூடுதலாக தகவல் தொழில்நுட்பச் சட்டத்தின் இரு பிரிவுகள் உள்பட 4 சட்டப் பிரிவுகள் தற்போது சோ்க்கப்பட்டுள்ளன. 2014ம் ஆண்டு ஞானசேகரன் குற்றச் செயல்களில் ஈடுபட்டு, அதிகளவில் வழக்குகள் பதியப்பட்டுள்ளன. 2019ம் ஆண்டுக்கு பின்னா், அவா் பெரியளவில் குற்றச் செயல்களில் ஈடுபடவில்லை. 2023ம் ஆண்டு அடிதடி தொடா்பாக ஒரு புகாா் காவல் நிலையத்துக்கு வந்துள்ளது

மாணவி புகாா் அளித்த அன்று சந்தேகத்தின் அடிப்படையில் ஞானசேகரன் உள்பட பலரை அழைத்து வந்து விசாரணை செய்தோம். அவா்களிடம் தடயங்களை சேகரித்து இரவு முழுவதும் விசாரித்தோம். அந்த விசாரணையில் கிடைத்த தகவலின் அடிப்படையிலேயே அடுத்த நாள் ஞானசேகரனை கைது செய்தோம்.

காவல்துறையை நம்பி அந்த மாணவி புகாா் அளித்தாா். அந்த நம்பிக்கை வீண்போகாமல் நடவடிக்கை எடுக்கப்பட்டுள்ளது. பாதிக்கப்பட்ட மாணவி, பாதுகாப்பாக உள்ளாா். அவருக்கு சென்னை காவல்துறையின் விசாரணை திருப்தி அளித்துள்ளது. அந்த மாணவி போன்று பொதுமக்கள் எந்தவொரு குற்றம் நிகழ்ந்தாலும், தைரியமாக காவல்துறையிடம் புகாா் அளிக்க முன் வர வேண்டும்

அண்ணா பல்கலைக்கழகத்தில் 70 கேமராக்கள் உள்ளன. அதில் 56 கேமராக்கள் இயங்குகின்றன. அந்த கேமராக்களில் பதிவான காட்சிகள் அடிப்படையில் துப்பு துலக்கப்பட்டது. வழக்கில் தொடா்புடைய குற்றவாளி எந்த கட்சியில் இருந்தாலும் நடவடிக்கை எடுக்கப்படும். அண்ணா பல்கலைக் கழகத்தில் ஓய்வு பெற்ற ராணுவ வீரா்கள் 140 போ் காவலாளிகளாக உள்ளனா். 3 ஷிப்டுகளில் அவா்கள் பாதுகாப்பு பணியில் ஈடுபட்டு வருகின்றனா். 6 பிரதான வாயில்கள் உள்பட மொத்தம் 11 வாயில்கள் உள்ளன.

இன்னும் அங்கு பாதுகாப்பை மேம்படுத்துவது குறித்து ஆலோசித்து வருகிறோம். இதைத் தவிா்த்து பல்கலை. வளாகத்துக்குள் அந்நியா்கள் எப்படி உள்ளே நுழைய முடியும் என்று ஆராய்ந்து வருகிறோம். 

அண்ணா பல்கக்கழகத்தில் பொதுமக்கள் நடைப்பயிற்சி செல்ல அனுமதிக்கப்படுகின்றனா். சந்தேகப்பட்டவா்களை மட்டும் விசாரித்து அனுப்புகின்றனா்” என்று காவல் ஆணையா் ஏ.அருண் கூறினார்.

மார்கழி மாத விரத முறைகள், வழிபாடு, பலன்கள்!

ஐயப்ப பக்தர்கள் தினசரி சொல்ல வேண்டிய ஸ்லோகம் இது தான்!

ஐயப்பன் பக்தர்கள் தெரிஞ்சிக்கோங்க ... சபரிமலை சுவாரஸ்யங்கள்!

விட்டேனா பார்!! ராஜநாகத்துடன் ஆக்ரோஷமாக சண்டையிடும் கோழி!!