40 வழக்குகள்... சன்மானம் அறிவிக்கப்பட்டிருந்த குற்றவாளி என்கவுன்டரில் சுட்டுக்கொலை!
உத்தரபிரதேச மாநிலத்தில் 40-க்கும் மேற்பட்ட குற்ற வழக்குகளில் தொடர்புடைய பிரபல ரவுடி சபீர் (35), போலீசாருடன் நடந்த துப்பாக்கிச் சண்டையில் சுட்டுக்கொல்லப்பட்டார். மீரட் மாவட்டத்தைச் சேர்ந்த இவர், கொள்ளை, மிரட்டல், கொலை முயற்சி உள்ளிட்ட பல்வேறு தீவிரமான குற்றச்செயல்களில் ஈடுபட்டு வந்தவர். கடந்த சில மாதங்களாகத் தலைமறைவாக இருந்த சபீரைத் தேடப்படும் குற்றவாளியாக அறிவித்த போலீசார், அவரைப் பிடித்துக் கொடுப்பவர்களுக்கு 50 ஆயிரம் ரூபாய் சன்மானம் வழங்கப்படும் என்றும் அறிவித்திருந்தனர்.
நேற்று இரவு கோட்வாலி டிகர் பகுதியில் உள்ள பிரதான சாலையில் போலீசார் தீவிர வாகன சோதனையில் ஈடுபட்டிருந்தனர். அப்போது அந்த வழியாகச் சபீர் தனது கூட்டாளி ஒருவருடன் மோட்டார் சைக்கிளில் வந்துள்ளார். போலீசாரைப் பார்த்ததும் நிலைதடுமாறிய அவர், தான் வைத்திருந்த கள்ளத்துப்பாக்கியால் போலீசாரை நோக்கிச் சுட்டுவிட்டு தப்பியோட முயன்றார். இதையடுத்து போலீசார் அவரைப் பின்தொடர்ந்து விரட்டியபோது, சபீர் அருகில் இருந்த அடர்ந்த வனப்பகுதிக்குள் நுழைந்து மறைந்து கொண்டார்.
வனப்பகுதிக்குள் பதுங்கியிருந்த சபீரைச் சரணடையுமாறு போலீசார் எச்சரித்தனர். ஆனால், அவர் மீண்டும் போலீசாரை நோக்கிக் குறிவைத்துச் சுட்டதால், தற்காப்பிற்காகப் போலீசார் பதில் தாக்குதல் நடத்தினர். இதில் குண்டு பாய்ந்த சபீர் சம்பவ இடத்திலேயே ரத்த வெள்ளத்தில் உயிரிழந்தார். இந்தச் சண்டையைப் பயன்படுத்திக் கொண்டு சபீரின் கூட்டாளி இருளில் தப்பியோடிவிட்டார். என்கவுன்டர் நடந்த இடத்தில் இருந்து ஒரு கள்ளத்துப்பாக்கி மற்றும் ஏராளமான தோட்டாக்களையும் போலீசார் பறிமுதல் செய்துள்ளனர்.
உத்தரபிரதேசத்தின் முக்கியக் குற்றவாளியாகக் கருதப்பட்ட சபீர் சுட்டுக்கொல்லப்பட்டது அந்தப் பகுதியில் பெரும் பரபரப்பை ஏற்படுத்தியுள்ளது. தப்பியோடிய சபீரின் கூட்டாளியைப் பிடிக்கத் தனிப்படை அமைக்கப்பட்டுத் தீவிர தேடுதல் வேட்டை நடைபெற்று வருகிறது. சட்டம் ஒழுங்கைப் பாதுகாக்க இத்தகைய அதிரடி நடவடிக்கைகள் தொடரும் என காவல்துறை உயரதிகாரிகள் தெரிவித்துள்ளனர்.
ஆயுள் முழுவதும் ரூ.52,000 ஓய்வூதியம்! எல்.ஐ.சி.யின் அசத்தல் திட்டம்!
வீடியோ! 5 அடி முதலையை விழுங்கும் மலைப்பாம்பு!!
வீடியோ! ராஜநாகத்துடன் ஆக்ரோஷமாக சண்டையிடும் கோழி!!