தானமாக கொடுத்த நிலத்தின் பத்திரப்பதிவுக்கும் ரூ.25,000 லஞ்சம்... கறார் காட்டிய சார் பதிவாளர் கைது!

செங்கல்பட்டு மாவட்டம், மதுராந்தகத்தில் நேற்று நடந்த ஒரு சம்பவம் அரசு அலுவலகங்களில் நடக்கும் லஞ்ச முறைகேடுகளை மீண்டும் வெளிச்சத்திற்குக் கொண்டு வந்துள்ளது. ஒரு தொண்டு நிறுவனத்திற்குச் செய்யப்படும் தானப் பத்திரப்பதிவுக்கே லஞ்சம் கேட்ட சார் பதிவாளர், லஞ்ச ஒழிப்புப் போலீசாரின் வலையில் கையும் களவுமாகச் சிக்கினார்.

மதுராந்தகம் அருகேயுள்ள ஈசூர் கிராமத்தைச் சேர்ந்த சிவராமன் என்பவர் ‘சிவன்' என்ற பெயரில் ஒரு தொண்டு நிறுவனத்தை நடத்தி வருகிறார். இவர், தனது மனைவி கலா பெயரில் இருந்த 15 சென்ட் நிலத்தில் 3 சென்ட் நிலத்தை தனது தொண்டு நிறுவனத்திற்குத் தானமாகப் பத்திரப்பதிவு செய்ய முடிவு செய்தார். இதற்காக, மதுராந்தகம் சார் பதிவாளர் கார்த்திகேயனை அணுகியபோதுதான் விவகாரம் ஆரம்பமானது.

சமூகப் பணிக்காக நிலத்தை எழுதி வைக்கும் பத்திரப்பதிவுக்கே, சார் பதிவாளர் கார்த்திகேயன் ஆரம்பத்தில் ரூ.25 ஆயிரம் லஞ்சம் கேட்டதாகக் கூறப்படுகிறது. நீண்ட போராட்டத்திற்குப் பிறகு, லஞ்சத் தொகை ரூ.15 ஆயிரமாகக் குறைக்கப்பட்டு, முதல் தவணையாக ரூ.10 ஆயிரத்தை நேற்று கொடுப்பதாக முடிவானது.

லஞ்சம் கொடுக்க விரும்பாத சிவராமன், துணிச்சலுடன் செங்கல்பட்டு லஞ்ச ஒழிப்புப் போலீசில் புகார் அளித்தார். துணை போலீஸ் சூப்பிரண்டு சரவணன் தலைமையிலான நான்கு பேர் கொண்ட குழு, சார் பதிவாளரைப் பிடிக்கத் திட்டம் வகுத்தது.

போலீசார் வகுத்த திட்டப்படி, ரசாயனம் தடவப்பட்ட ரூ.10 ஆயிரத்தை சிவராமன் நேற்று சார் பதிவாளர் கார்த்திகேயனிடம் கொடுத்தார். பணத்தைப் பெற்ற கார்த்திகேயன், அதை உடனடியாக அருகில் இருந்த பத்திர எழுத்தாளர் சிவாவிடம் கொடுக்கும்படி பணித்தார்.

சிவா அந்தப் பணத்தைப் பெற்ற அடுத்த நொடியே, மறைந்திருந்த லஞ்ச ஒழிப்பு போலீசார் மின்னல் வேகத்தில் பாய்ந்து, பணத்தைப் பறிமுதல் செய்தனர். சார் பதிவாளர் கார்த்திகேயன் மற்றும் பத்திர எழுத்தாளர் சிவா ஆகிய இருவரையும் லஞ்ச ஒழிப்புப் போலீசார் கையும் களவுமாகப் பிடித்து கைது செய்து, தீவிர விசாரணை நடத்தி வருகின்றனர். லஞ்சம் கேட்ட அரசு அதிகாரி கைது செய்யப்பட்ட சம்பவம் மதுராந்தகம் வட்டாரத்தில் பெரும் பரபரப்பை ஏற்படுத்தியுள்ளது.

ஆயுள் முழுவதும் ரூ.52,000 ஓய்வூதியம்! எல்.ஐ.சி.யின் அசத்தல் திட்டம்!

வீடியோ!  5 அடி முதலையை விழுங்கும் மலைப்பாம்பு!!

வீடியோ! ராஜநாகத்துடன் ஆக்ரோஷமாக சண்டையிடும் கோழி!!

உங்க ராசிக்கேற்ற தொழில் எது? இந்த துறை அதிக லாபம் தரும்

லட்சத்துல கடன் இருந்தாலும் ஈஸியா தீர்க்கும் எளிய பரிகாரம்!