11 வயது சிறுமிக்கு பாலியல் துன்புறுத்தல்... 4 பேர் போக்சோ சட்டத்தில் கைது!
தூத்துக்குடி மாவட்டத்தில், 11 வயது சிறுமிக்கு பாலியல் தொந்தரவு கொடுத்த வழக்கில் சம்பந்தப்பட்ட 4 குற்றவாளிகளுக்கு, தூத்துக்குடி போக்சோ நீதிமன்றம் தலா 5 ஆண்டுகள் கடுங்காவல் சிறை தண்டனை விதித்துத் தீர்ப்பளித்தது. இந்தத் தீர்ப்பு, குழந்தைகளுக்கு எதிரான குற்றச் செயல்களில் ஈடுபடுவோருக்கு ஒரு எச்சரிக்கையாக அமைந்துள்ளது.
இந்தச் சம்பவம் கடந்த 2015 ஆம் ஆண்டு தூத்துக்குடி மாவட்டம், குலசேகரன் பட்டினம் காவல் நிலைய எல்லைக்குட்பட்ட பகுதியில் நடந்தது. அப்போது 11 வயது சிறுமி ஒருவருக்கு, பாலியல் தொந்தரவு கொடுத்ததாக நாசரேத் பகுதியைச் சேர்ந்த நான்கு பேர் மீது குற்றம் சாட்டப்பட்டது.
சம்பவம் குறித்துத் தகவல் அறிந்த குலசேகரன் பட்டினம் காவல் நிலைய போலீசார், போக்சோ சட்டப்பிரிவின் கீழ் வழக்குப்பதிவு செய்தனர். குற்றவாளிகள்: தினேஷ் (வயது 33), இசக்கிமுத்து (வயது 33), ஸ்டாலின் (வயது 38), ஐக்கோர்ட்துரை (வயது 33) ஆகிய 4 பேரையும் போலீசார் கைது செய்து சிறையில் அடைத்தனர்.
இந்த வழக்கின் விசாரணை தூத்துக்குடியில் உள்ள போக்சோ நீதிமன்றத்தில் நடைபெற்று வந்தது. பல்வேறு கட்ட விசாரணைகளுக்குப் பிறகு, இந்த வழக்கை விசாரித்த நீதிபதி பிரீத்தா அவர்கள் நேற்று (நவம்பர் 26, 2025) தீர்ப்பு வழங்கினார்.
சிறுமிக்குப் பாலியல் தொந்தரவு கொடுத்த குற்றத்தை நிரூபிக்கப்பட்டதன் அடிப்படையில், குற்றவாளிகள் 4 பேருக்கும் தலா 5 ஆண்டுகள் கடுங்காவல் சிறை தண்டனை விதித்து நீதிபதி உத்தரவிட்டார். அத்துடன், அவர்கள் ஒவ்வொருவருக்கும் தலா ரூ.2,500 அபராதம் விதித்தும் தீர்ப்பு வழங்கப்பட்டது.
இந்த வழக்கை மிகச் சிறப்பாகப் புலனாய்வு செய்து, குற்றவாளிகளுக்குத் தண்டனை பெற்றுத் தர உறுதுணையாக இருந்த அப்போதைய குலசேகரன் பட்டினம் போலீஸ் இன்ஸ்பெக்டர் ஷீஜா ராணி, அரசு தரப்பில் திறம்பட வாதிட்ட அரசு வழக்கறிஞர் ஜானகி, மற்றும் விசாரணைக்கு உதவிய தலைமை காவலர் முருகன் ஆகியோரைப் மாவட்ட எஸ்.பி. ஆல்பர்ட் ஜான் மனதாரப் பாராட்டினார்.
தூத்துக்குடி மாவட்டத்தில், குழந்தைகளுக்கு எதிரான பாலியல் குற்றங்கள் தொடர்பான வழக்குகளில் கடுமையான தீர்ப்புகள் வழங்கப்பட்டு வருகின்றன. இந்த ஆண்டு இதுவரை, மொத்தம் 27 போக்சோ வழக்குகளில் சம்பந்தப்பட்ட குற்றவாளிகளுக்குத் தண்டனை வழங்கப்பட்டுள்ளது என்பது குறிப்பிடத்தக்கது.
ஆயுள் முழுவதும் ரூ.52,000 ஓய்வூதியம்! எல்.ஐ.சி.யின் அசத்தல் திட்டம்!
வீடியோ! 5 அடி முதலையை விழுங்கும் மலைப்பாம்பு!!
வீடியோ! ராஜநாகத்துடன் ஆக்ரோஷமாக சண்டையிடும் கோழி!!