சென்னையில் வீட்டின் மீது வெடிகுண்டு வீசி தாக்குதல்: 3 சிறுவர்கள் உள்பட 5 பேர் கைது!
சென்னை நொளம்பூரில், கஞ்சா புகைப்பதைக் கண்டித்த ஆம்புலன்ஸ் ஓட்டுநரின் வீட்டின் மீது நாட்டு வெடிகுண்டுகளை வீசித் தாக்குதல் நடத்திய கும்பலைச் சேர்ந்த 5 பேரை போலீசார் கைது செய்துள்ளனர். சென்னை போரூர் பகுதியைச் சேர்ந்த பிரபாகரன் என்ற ஆம்புலன்ஸ் ஓட்டுநர், கடந்த புதன்கிழமை அன்று நொளம்பூர் வேணுகோபால் தெருவில் உள்ள தனது மாமனார் வீட்டிற்குச் சென்றுள்ளார். அப்போது வீட்டின் அருகே இருந்த காலி இடத்தில் சிலர் அமர்ந்து மது அருந்திக் கொண்டும், கஞ்சா புகைத்துக் கொண்டும் இருப்பதை அவர் கவனித்துள்ளார். பொது இடத்தில் இது போன்ற செயல்களில் ஈடுபடக்கூடாது எனக் கூறி அவர்களைப் பிரபாகரன் திட்டி அங்கிருந்து விரட்டியுள்ளார்.
இதனால் ஆத்திரமடைந்த அந்த கும்பல், சிறிது நேரம் கழித்து மீண்டும் அங்கு வந்து பிரபாகரனிடம் தகராறில் ஈடுபட்டுள்ளது. அவரை உடல்ரீதியாகத் தாக்கிவிட்டு அங்கிருந்து தப்பியோடிய அந்த இளைஞர்கள், அத்துடன் ஆத்திரம் அடங்காமல் நள்ளிரவில் மீண்டும் வந்துள்ளனர். பிரபாகரன் தங்கியிருந்த வீட்டின் மீது குறிவைத்து இரண்டு நாட்டு வெடிகுண்டுகளை அவர்கள் சரமாரியாக வீசியுள்ளனர். இந்தத் தாக்குதலில் வெடிகுண்டுகள் வெடித்துச் சிதறியதில் வீட்டின் சுவர் மற்றும் ஜன்னல் கண்ணாடிகள் தீப்பற்றி எரிந்தன. நள்ளிரவில் நிகழ்ந்த இந்தச் சத்தத்தைக் கேட்டு அப்பகுதி மக்கள் பெரும் அச்சத்தில் உறைந்தனர்.
இது குறித்துத் தகவல் அறிந்த நொளம்பூர் போலீசார் சம்பவ இடத்திற்கு விரைந்து சென்று தீவிர விசாரணை மேற்கொண்டனர். தடயங்களைச் சேகரித்த போலீசார், அந்தப் பகுதியில் பதுங்கியிருந்த அதே பகுதியைச் சேர்ந்த மார்ட்டின் (22), கம்ருதீன் (21) மற்றும் 15 வயதுடைய 3 சிறுவர்கள் என மொத்தம் 5 பேரைக் கைது செய்துள்ளனர். கஞ்சா போதையில் இருந்த இளைஞர்கள் பழிவாங்கும் நோக்கில் இந்த விபரீதச் செயலில் ஈடுபட்டது விசாரணையில் தெரியவந்துள்ளது. கைது செய்யப்பட்டவர்களிடம் வெடிகுண்டு எங்கிருந்து கிடைத்தது என்பது குறித்துப் போலீசார் தொடர்ந்து தீவிர விசாரணை நடத்தி வருகின்றனர்.
ஆயுள் முழுவதும் ரூ.52,000 ஓய்வூதியம்! எல்.ஐ.சி.யின் அசத்தல் திட்டம்!
வீடியோ! 5 அடி முதலையை விழுங்கும் மலைப்பாம்பு!!
வீடியோ! ராஜநாகத்துடன் ஆக்ரோஷமாக சண்டையிடும் கோழி!!