ஸ்கூட்டர் மீது கார் மோதி கோர விபத்து.. சம்பவ இடத்திலேயே கல்லூரி மாணவி உயிரிழப்பு!
விழுப்புரம் மாவட்டம் விக்கிரவாண்டி அருகே நிகழ்ந்த கோர விபத்தில், கல்லூரி மாணவி ஒருவர் சம்பவ இடத்திலேயே உயிரிழந்த சம்பவம் அப்பகுதியில் பெரும் சோகத்தை ஏற்படுத்தியுள்ளது. விக்கிரவாண்டி பகுதியைச் சேர்ந்த அந்த மாணவி, இன்று காலை தனது நண்பருடன் ஸ்கூட்டரில் கல்லூரிக்குச் சென்று கொண்டிருந்தார். ஸ்கூட்டரின் பின் இருக்கையில் அமர்ந்து மாணவி பயணம் செய்த நிலையில், செண்டூர் என்ற இடத்தைக் கடந்தபோது இந்த விபரீதம் நிகழ்ந்துள்ளது.
அதிவேக கார் மோதியதில் விபரீதம்: மாணவி சென்ற ஸ்கூட்டர் செண்டூர் பகுதியில் சாலையைக் கடக்க முயன்றபோது, பின்னால் அதிவேகமாக வந்த கார் ஒன்று எதிர்பாராத விதமாக ஸ்கூட்டர் மீது பயங்கரமாக மோதியது. மோதிய வேகத்தில் ஸ்கூட்டரில் இருந்த மாணவியும் அவரது நண்பரும் பல அடி தூரத்திற்குத் தூக்கி வீசப்பட்டனர். இதில் தலையில் பலத்த காயமடைந்த மாணவி, ரத்த வெள்ளத்தில் சம்பவ இடத்திலேயே பரிதாபமாக உயிரிழந்தார். அவரது நண்பர் உயிருக்குப் போராடிய நிலையில் படுகாயங்களுடன் மீட்கப்பட்டார்.
தலைகீழாகக் கவிழ்ந்த கார்: விபத்தை ஏற்படுத்திய கார், ஸ்கூட்டர் மீது மோதிய வேகத்தில் கட்டுப்பாட்டை இழந்து சாலையோரம் தலைகீழாகக் கவிழ்ந்தது. இதில் காரில் பயணம் செய்தவர்களுக்கும் பலத்த காயம் ஏற்பட்டது. விபத்தைக் கண்டு ஓடிவந்த அக்கம்பக்கத்தினர், உடனடியாகப் படுகாயமடைந்த மாணவியின் நண்பர் மற்றும் காரில் இருந்தவர்களை மீட்டு சிகிச்சைக்காக அருகில் உள்ள மருத்துவமனைக்கு அனுப்பி வைத்தனர். உயிரிழந்த மாணவியின் உடல் பிரேதப் பரிசோதனைக்காக அரசு மருத்துவமனைக்குக் கொண்டு செல்லப்பட்டது.
இந்த விபத்து குறித்துத் தகவல் அறிந்த போலீசார், சம்பவ இடத்திற்கு விரைந்து வந்து போக்குவரத்தைச் சீர்செய்தனர். விபத்து தொடர்பாக வழக்குப் பதிவு செய்யப்பட்டுள்ள நிலையில், காரை ஓட்டி வந்த ஓட்டுநரின் அஜாக்கிரதையே விபத்திற்குக் காரணமா என்பது குறித்துப் போலீசார் தீவிர விசாரணை நடத்தி வருகின்றனர். கல்லூரிக்குச் சென்ற மாணவி பிணமாகத் திரும்பிய செய்தி அவரது உறவினர்களிடையே ஆறாத் துயரத்தை ஏற்படுத்தியுள்ளது.
ஆயுள் முழுவதும் ரூ.52,000 ஓய்வூதியம்! எல்.ஐ.சி.யின் அசத்தல் திட்டம்!
வீடியோ! 5 அடி முதலையை விழுங்கும் மலைப்பாம்பு!!
வீடியோ! ராஜநாகத்துடன் ஆக்ரோஷமாக சண்டையிடும் கோழி!!