சீன ராணுவத்தில் பரபரப்பு...அடுத்தடுத்து கைதாகும் தளபதிகள்... அதிபர் ஜின்பிங்கின் அதிரடி!
உலக வல்லரசுப் போட்டியில் அமெரிக்காவிற்கு சவால் விட்டு வரும் சீனா, தற்போது தனது சொந்த நாட்டு ராணுவத்திற்குள்ளேயே ஒரு மிகப்பெரிய 'சுத்திகரிப்பு' நடவடிக்கையைத் தொடங்கியுள்ளது. சீன அதிபர் ஷி ஜின்பிங், தனது அதிகாரத்திற்கு எதிராக எழும் சிறு சலசலப்பையும் முளையிலேயே கிள்ளி எறியும் விதமாக, நாட்டின் மிக உயரிய ராணுவ அதிகாரிகளை அடுத்தடுத்து கைது செய்து வருவது உலக நாடுகளை அதிர வைத்துள்ளது.
சீனாவின் மக்கள் விடுதலை ராணுவத்தில் (PLA) மிகவும் செல்வாக்கு மிக்க அதிகாரியாகத் திகழ்ந்தவர் ஜெனரல் ஜாங் யூக்சியா. ஜின்பிங்கிற்கு மிகவும் விசுவாசமானவர் என்று பெயர் எடுத்த இவரையே, கடந்த 24-ம் தேதி சீன அரசு அதிரடியாகக் கைது செய்தது. அவர் எதற்காகக் கைது செய்யப்பட்டார் என்ற காரணத்தை இன்றுவரை சீனா ரகசியமாகவே வைத்துள்ளது. இந்த அதிர்ச்சி அடங்குவதற்குள், தற்போது மற்றொரு முக்கிய தளபதியான ஜெனரல் லியு ஜென்லி என்பவரையும் ஜின்பிங் அரசு கைது செய்துள்ளதாகத் தகவல்கள் வெளியாகியுள்ளன.
சீனாவின் ஒட்டுமொத்த ராணுவத்தையும் கட்டுப்படுத்தும் அதிகாரம் கொண்டது 'மத்திய ராணுவ ஆணையம்' (Central Military Commission). இந்த ஆணையத்தில் கடந்த 2022-ம் ஆண்டு 6 உறுப்பினர்கள் இருந்தனர். ஆனால், ஜின்பிங்கின் அதிரடி நீக்க நடவடிக்கைகளால் இந்த எண்ணிக்கை படிப்படியாகக் குறைந்து 4 ஆனது.
தற்போது ஜாங் மற்றும் லியு ஆகிய இருவரின் கைதிற்குப் பிறகு, இந்த ஆணையத்தில் அதிபர் ஜின்பிங் மற்றும் ஜெனரல் ஜாங் ஷெங்மின் ஆகிய இருவர் மட்டுமே எஞ்சியுள்ளனர். இதன் மூலம், சீன ராணுவத்தின் முழு அதிகாரமும் ஜின்பிங்கின் ஒற்றைக் கையில் வந்து சேர்ந்துள்ளது. அனைத்து உறுப்பினர்களையும் தானே தேர்வு செய்த போதிலும், அவர்கள் மீது ஜின்பிங் சந்தேகம் கொண்டு கைது செய்வது சீன அரசியலில் பெரும் பரபரப்பை ஏற்படுத்தியுள்ளது.
சீன ராணுவத்தில் ஏவுகணைப் பிரிவிலும், கொள்முதல் பிரிவிலும் பெரிய அளவில் ஊழல் நடப்பதாகக் கூறி, கடந்த சில ஆண்டுகளாகவே ஜின்பிங் பல அதிகாரிகளை நீக்கி வருகிறார். ஆனால், உண்மையில் தனக்கு எதிராக ராணுவப் புரட்சி ஏதும் நடந்துவிடக் கூடாது என்பதில் ஜின்பிங் மிகக் கவனமாக இருப்பதாக அரசியல் ஆய்வாளர்கள் கருதுகின்றனர். குறிப்பாக, தைவான் விவகாரத்தில் சீனா ஆக்ரோஷமாகச் செயல்பட்டு வரும் நிலையில், ராணுவத் தலைமைக்குள் ஏற்படும் இந்த மாற்றங்கள் சர்வதேச அளவில் உற்று நோக்கப்படுகின்றன.
அமெரிக்கா உள்ளிட்ட நாடுகள் சீனாவின் இந்த உள்நாட்டு அரசியல் மாற்றங்களை உன்னிப்பாகக் கவனித்து வருகின்றன. ஒரு நாட்டின் ராணுவத் தலைமை பலவீனமடைவது அல்லது மாற்றப்படுவது அந்த நாட்டின் பாதுகாப்பு மற்றும் வெளியுறவுக் கொள்கையில் பெரும் தாக்கத்தை ஏற்படுத்தும். ஜின்பிங்கின் இந்த 'இரும்புக்கரம்' ஒடுக்குமுறை சீனாவிற்குள் அமைதியை ஏற்படுத்துமா அல்லது ராணுவத்திற்குள் அதிருப்தியை உண்டாக்குமா என்பது வரும் காலங்களில் தெரியவரும்.
ஆயுள் முழுவதும் ரூ.52,000 ஓய்வூதியம்! எல்.ஐ.சி.யின் அசத்தல் திட்டம்!
வீடியோ! 5 அடி முதலையை விழுங்கும் மலைப்பாம்பு!!
வீடியோ! ராஜநாகத்துடன் ஆக்ரோஷமாக சண்டையிடும் கோழி!!