டிட்வா புயல்.. சூறைக்காற்றுடன் கனமழை... தமிழகத்தில் 2 பேர் உயிரிழப்பு!
வங்கக் கடலில் நிலை கொண்டிருக்கும் 'டிட்வா' புயல், இன்று வட கடலோர மாவட்டங்கள் மற்றும் புதுச்சேரிப் பகுதிகளில் கனமழையைத் தொடர்ந்து வழங்கி வருகிறது. இந்தப் புயல் கரையை முழுவதுமாகக் கடக்காமல், கடலோரப் பகுதிகளைத் தொட்டபடியே பயணிக்கும் என்று வானிலை ஆய்வு மையம் தெரிவித்துள்ளது.
'டிட்வா' புயல் காரணமாகத் தமிழ்நாட்டின் பல்வேறு மாவட்டங்களில் பலத்த மழையும் சூறைக்காற்றும் வீசி வருகிறது. இந்த வெள்ளம் மற்றும் புயல் தாக்கத்தினால் மாநிலத்தில் இருவர் உயிரிழந்திருப்பதாக மாநிலப் பேரிடர் மீட்புக் குழு தகவல் வெளியிட்டுள்ளது.
தூத்துக்குடியில் வீடு இடிந்து விழுந்ததில் ஒருவர் உயிரிழந்துள்ளார். தஞ்சாவூரில் ஒரு பெண் உயிரிழந்துள்ளார். மேலும், இந்த இயற்கைச் சீற்றத்தால் 163 குடிசைகள் சேதமடைந்துள்ளன என்றும், 121 கால்நடைகள் உயிரிழந்துள்ளன என்றும் பேரிடர் மீட்புக் குழு தெரிவித்துள்ளது.
புயல் கரையைத் தொட்டபடி பயணிக்கும் நிலையில், இன்றும் மழை வெளுத்து வாங்கும் என்று எதிர்பார்க்கப்படுகிறது. அதி கனமழை (ரெட் அலர்ட்): திருவள்ளூர் மற்றும் ராணிப்பேட்டை மாவட்டங்களின் சில பகுதிகளில் ஓரிரு இடங்களில் அதி கனமழை பெய்ய வாய்ப்புள்ளது.
கன முதல் மிக கனமழை: சென்னை, காஞ்சிபுரம், செங்கல்பட்டு, விழுப்புரம், திருவண்ணாமலை, வேலூர், திருப்பத்தூர், கிருஷ்ணகிரி, தர்மபுரி உள்ளிட்ட வடமாவட்டங்களில் ஓரிரு இடங்களில் கன முதல் மிக கனமழை பெய்ய வாய்ப்புள்ளது. பலத்த காற்று: சென்னை உட்பட வட கடலோர மாவட்டங்கள் மற்றும் புதுச்சேரியில் மணிக்கு 60 கி.மீ. முதல் 80 கி.மீ. வரையிலான வேகத்தில் பலத்த காற்று வீசக்கூடும்.
பொதுவாக, புயல் கரையை ஊடுருவிச் செல்லும். ஆனால், இலங்கையில் தனது தீவிரத்தைக் காட்டிய 'டிட்வா' புயல், பின்னர் தமிழகப் பகுதிகளில் டெல்டா அருகே கடலோரத்தில் வந்து நின்று மழையை வழங்கிவிட்டு, தற்போது வட கடலோர மாவட்டங்கள்-புதுச்சேரிக் கடலோரப் பகுதிகளில் வந்து நின்று மழையைத் தொடர்கிறது. இனி புயல் எங்கும் கரையேறாமல் கடலிலேயே வலுவிழந்துவிடும் என்று வானிலை ஆய்வு மையம் அறிவித்துள்ளது.
ஆயுள் முழுவதும் ரூ.52,000 ஓய்வூதியம்! எல்.ஐ.சி.யின் அசத்தல் திட்டம்!
வீடியோ! 5 அடி முதலையை விழுங்கும் மலைப்பாம்பு!!
வீடியோ! ராஜநாகத்துடன் ஆக்ரோஷமாக சண்டையிடும் கோழி!!