காசாவில் பொம்மைக்கு இறுதி ஊர்வலம் நடத்தும் சின்னஞ் சிறுவர்கள்... கண்ணில் நீர் வரவழைக்கும் வீடியோ!
காசாவில் போர் மேகங்கள் இன்னும் விலகாத நிலையில், அங்கிருந்து வெளியாகும் ஒரு வீடியோ ஒட்டுமொத்த உலகையுமே உலுக்கி வருகிறது. அகதி முகாம்களில் வசிக்கும் 5 சிறுவர்கள், தங்களின் விளையாட்டு பொம்மை ஒன்றுக்கு உண்மையான இறுதி ஊர்வலம் நடத்துவது போலச் செய்துள்ள அந்த உருக்கமான காட்சி இணையத்தில் வைரலாகி வருகிறது. போர்க்களத்தின் கோர முகத்தை நேரடியாகக் கண்டு வளர்ந்த அந்தப் பிஞ்சு உள்ளங்களில், விளையாட்டு என்பது கூட மரணத்தைச் சுற்றியே இருப்பதுதான் வேதனையின் உச்சம்.
தங்கள் கண் முன்னே உறவினர்களும், நண்பர்களும் கொல்லப்படுவதைப் பார்த்த அந்தச் சிறுவர்கள், விளையாட்டிலும் அதே துயரத்தைப் பிரதிபலிக்கின்றனர். ஒரு சிறிய துணியால் பொம்மையைப் போர்த்தி, அதைத் தூக்கிக்கொண்டு அவர்கள் செல்லும் விதம், "எங்கள் வாழ்க்கையில் மரணம் என்பது ஒரு விளையாட்டாக மாறிவிட்டது" என்று உலகிற்குச் சொல்லாமல் சொல்வது போல இருக்கிறது. இந்த வீடியோவைப் பார்க்கும் எவருடைய கண்களும் குளமாவதைத் தவிர்க்க முடியாது.
குழந்தைகளின் மனங்களில் பதிந்துள்ள ஆழமான போர் வடுக்களை இந்த ஒரு காட்சி அப்பட்டமாகத் தோலுரித்துக் காட்டுகிறது. "சிரித்துப் பேசி விளையாட வேண்டிய வயதில், பிணவறைகளையும் இறுதி ஊர்வலங்களையும் பார்த்து வளரும் இந்தத் தலைமுறையின் எதிர்காலம் என்ன?" என்கிற கேள்வி உலக நாடுகளிடையே எழுந்துள்ளது. காசாவின் அவல நிலையைச் சித்தரிக்கும் இந்த வீடியோ, போரின் கொடுமைக்கு அப்பாவிச் சிறுவர்கள் எப்படி இரையாகிறார்கள் என்பதற்கு ஒரு சாட்சியாக அமைந்துள்ளது.
ஆயுள் முழுவதும் ரூ.52,000 ஓய்வூதியம்! எல்.ஐ.சி.யின் அசத்தல் திட்டம்!
வீடியோ! 5 அடி முதலையை விழுங்கும் மலைப்பாம்பு!!
வீடியோ! ராஜநாகத்துடன் ஆக்ரோஷமாக சண்டையிடும் கோழி!!