உடல் பருமனுக்கு குட் பை... இந்தியாவில் எடை குறைப்பு ஊசி அறிமுகம்!
உடல் பருமனால் அவதிப்பட்டு வருபவர்களுக்கு இது குட் நியூஸ். இந்தியாவில் உடல் பருமனைக் குறைப்பதற்கான ஊசி அறிமுகப்படுத்தப்பட்டுள்ளது.
அமெரிக்காவின் புகழ்பெற்ற மருந்து நிறுவனமான Eli Lilly இந்தியாவில் தனது புதிய எடை குறைப்பு ஊசி மருந்து மௌஞ்சாரோவை அறிமுகப்படுத்தியுள்ளது.
அமெரிக்காவை பொறுத்தவரை இந்த மருந்து 1,000 டாலர் முதல் 1,200 டாலர் வரை விலை நிர்ணயம் செய்யப்பட்டுள்ளது. இதே மருந்து இந்தியாவில் 2.5 மிகி ஊசி ரூ.3,500க்கும், 5 மிகி ஊசி ரூ.4,375க்கும் விற்பனைக்கு வர தயாராக உள்ளது. இது ஒரு வாரத்திற்கு ஒரு முறை மருத்துவர்களின் பரிந்துரையுடன் செலுத்த வேண்டிய ஊசியாகும்.
மௌஞ்சாரோ மருந்தின் பரிசோதனைகளில் முக்கிய முடிவுகள் வெளியாகியுள்ளன. உணவு கட்டுப்பாடு மற்றும் உடற்பயிற்சியுடன் இந்த மருந்தை எடுத்தபோது, 15 மில்லிகிராம் டோஸில் இருந்தவர்கள் சராசரியாக 21.8 கிலோ எடையை இழந்திருப்பது கண்டறியப்பட்டது.
குறைந்தபட்சமாக 5 மில்லி கிராம் டோஸில் இருந்தவர்கள் 15.4 கிலோ எடையை இழந்ததாக கண்டறியப்பட்டது. இது உடல் பருமன், அதிக எடை மற்றும் வகை 2 நீரிழிவு நோய்க்கு எதிரான சிகிச்சையாக பயன்படுகிறது என Eli Lilly நிறுவனம் தெரிவித்துள்ளது.
இந்திய சந்தைக்கு ஏற்றவாறு விலையைக் குறைத்திருப்பதாகவும் எந்த இந்திய நிறுவனத்துடனும் கூட்டாண்மை இல்லாமல் தான் விநியோகம் செய்யப்படுவதாகவும் அந்நிறுவனம் கூறியுள்ளது.
கடந்த 2022ல் இந்தியாவில், நோவோ நோர்டிஸ்க் நிறுவனம் அறிமுகப்படுத்திய ரைபெல்சஸ் மாத்திரை தற்போது உடல் பருமன் எதிர்ப்பு மருந்து சந்தையில் 65% பங்கைக் கொண்டுள்ளது. இந்த சந்தை 2020ல் ரூ.137 கோடியாக இருந்தது. இந்நிலையில் 2024ல் ரூ.533 கோடியாக வளர்ச்சி பெற்றிருப்பது குறிப்பிடத்தக்கது.
மௌஞ்சாரோ ஊசி மருந்து காரணமாக சிலருக்கு பக்க விளைவுகள் ஏற்படலாம். அதன்படி குமட்டல், வயிற்றுப்போக்கு, வாந்தி, பசியின்மை, மலச்சிக்கல் போன்றவை அடிக்கடி காணப்படும். இவை நீடிக்கும் போது உடனடியாக மருத்துவர் ஆலோசனை கட்டாயம் பெற வேண்டும் எனவும் வலியுறுத்தப்பட்டுள்ளது.
லட்சத்துல கடன் இருந்தாலும் ஈஸியா தீர்க்கும் எளிய பரிகாரம்!
ஆயுள் முழுவதும் ரூ.52,000 ஓய்வூதியம்! எல்.ஐ.சி.யின் அசத்தல் திட்டம்!
வீடியோ! 5 அடி முதலையை விழுங்கும் மலைப்பாம்பு!!