நீதிபதிகள் மோதல்: ஜி.ஆர்.சுவாமிநாதனுக்கு குவியும் ஆதரவு - பதவி நீக்க முயற்சியால் கொதிக்கும் முன்னாள் நீதிபதிகள்!
திருப்பரங்குன்றம் கோயில் விவகாரத்தில் மதுரை உயர்நீதிமன்ற நீதிபதி ஜி.ஆர்.சுவாமிநாதன் பிறப்பித்த ஒரு உத்தரவு, தற்போது இந்திய அளவில் மிகப்பெரிய அரசியல் மற்றும் சட்டப் போராட்டமாக மாறியுள்ளது. இந்த உத்தரவை எதிர்த்து, நாடாளுமன்றத்தில் 'இந்தியா' கூட்டணியைச் சேர்ந்த 100-க்கும் மேற்பட்ட எம்.பி.க்கள் ஒன்றிணைந்து, நீதிபதி ஜி.ஆர்.சுவாமிநாதனைப் பதவி நீக்கம் செய்ய வேண்டும் என்ற தீர்மானத்தில் கையெழுத்திட்டு சபாநாயகரிடம் மனு அளித்துள்ளனர். அரசியல் கட்சிகளின் இந்த அதிரடி நடவடிக்கை, நீதித்துறையில் பெரும் அதிர்வலைகளை ஏற்படுத்தியுள்ளது.
அரசியல் கட்சிகளின் இந்த நடவடிக்கைக்கு எதிர்ப்புத் தெரிவிக்கும் வகையில், ஏற்கனவே முன்னாள் நீதிபதிகள் ஆர்.சுப்பிரமணியன், சிவஞானம் உள்ளிட்ட 56 பேர் நீதிபதி ஜி.ஆர்.சுவாமிநாதனுக்கு ஆதரவாகக் குரல் கொடுத்திருந்தனர். எம்.பி.க்களின் இத்தகைய செயல் நீதிபதிகளை வெளிப்படையாக மிரட்டுவது போல இருப்பதாகவும், இது ஜனநாயகத்தின் தூணான நீதித்துறையின் சுதந்திரத்தைப் பாதிக்கும் என்றும் அவர்கள் எச்சரித்திருந்தனர்.
மேலும் 36 நீதிபதிகள் போர்க்கொடி: இந்த நிலையில், நீதிபதி ஜி.ஆர்.சுவாமிநாதனுக்கு ஆதரவு தெரிவிப்பவர்களின் எண்ணிக்கை மேலும் அதிகரித்துள்ளது. உச்சநீதிமன்ற முன்னாள் நீதிபதி கிருஷ்ணா முராரி, சென்னை உயர்நீதிமன்ற முன்னாள் நீதிபதிகள் பி.என்.பிரகாஷ் மற்றும் பார்த்திபன் உள்ளிட்ட மேலும் 36 முன்னாள் நீதிபதிகள் தற்போது தங்களது ஆதரவை வெளிப்படுத்தியுள்ளனர். இது தொடர்பாக அவர்கள் கூட்டாக வெளியிட்டுள்ள அறிக்கையில், சட்ட ரீதியான ஒரு தீர்ப்பிற்காக நீதிபதியைப் பதவி நீக்கம் செய்ய முயல்வது தவறான முன்னுதாரணம் என்று சுட்டிக்காட்டியுள்ளனர்.
தற்போது மொத்தம் 92 முன்னாள் நீதிபதிகள் ஜி.ஆர்.சுவாமிநாதனுக்குப் பின்னால் அணிவகுத்து நிற்கின்றனர். ஒருபுறம் ஆளும் மற்றும் எதிர்க்கட்சிகளின் கூட்டணி எம்.பி.க்கள், மறுபுறம் அனுபவம் வாய்ந்த சட்ட வல்லுநர்கள் எனத் தமிழக அரசியலும் நீதித்துறையும் இந்த விவகாரத்தால் இரண்டாகப் பிரிந்துள்ளன. ஒரு நீதிபதியின் தீர்ப்பை எதிர்த்து அரசியல் ரீதியாகத் தொடரப்பட்டுள்ள இந்தப் போராட்டம், வரும் நாட்களில் டெல்லி அரசியலிலும் எதிரொலிக்கும் என எதிர்பார்க்கப்படுகிறது.
ஆயுள் முழுவதும் ரூ.52,000 ஓய்வூதியம்! எல்.ஐ.சி.யின் அசத்தல் திட்டம்!
வீடியோ! 5 அடி முதலையை விழுங்கும் மலைப்பாம்பு!!
வீடியோ! ராஜநாகத்துடன் ஆக்ரோஷமாக சண்டையிடும் கோழி!!