அனுமன் ஜெயந்தி... வாழ்வில் வெற்றி பெற அனுமனிடம் கற்றுக்கொள்ள வேண்டிய பாடங்கள்!
வீரம், அறிவு, கூர்மையான புத்தி மற்றும் பணிவு என அத்தனை நற்பண்புகளுக்கும் இலக்கணமாகத் திகழ்பவர் ஆஞ்சநேயர். அனுமனை வழிபடுபவர்களுக்குத் தைரியமும், பலமும், நம்பிக்கையும் கிட்டும் என்பது ஐதீகம். ஒரு சாதாரண வானர வீரனாகத் தன் பயணத்தைத் தொடங்கி, இன்று உலகமே போற்றும் தெய்வமாக உயர்ந்து நிற்க அனுமனிடம் இருந்த அந்த அபாரமான குணங்கள் இன்றைய தலைமுறைக்கு மிகச்சிறந்த பாடங்களாகும்.
கொள்கையில் உறுதியும் மரியாதையும்
இலங்கையில் சீதையைத் தேடிச் சென்ற போது, அனுமனுக்கும் ராவணனின் மகன் இந்திரஜித்திற்கும் இடையே கடும் போர் நடந்தது. அப்போது இந்திரஜித் பிரம்மாஸ்திரத்தைப் பயன்படுத்தினான். அனுமனால் அந்த அஸ்திரத்தைத் தனது பலத்தால் உடைத்திருக்க முடியும். ஆனால், பிரம்மா அளித்த அந்த ஆயுதத்திற்கு மதிப்பளிக்க வேண்டும் என்பதற்காக, தன்னைத் தானே அந்த ஆயுதத்திற்குக் கட்டுப்படுத்திக் கொண்டு கைதானார். இது தனது பலத்தை விடவும், தர்மத்திற்கும் மேலதிகாரிகளின் கட்டளைக்கும் அவர் கொடுத்த மரியாதையைக் காட்டுகிறது. வாழ்வில் எவ்வளவு பெரிய உயரத்தில் இருந்தாலும், மரபுகளுக்கும் மூத்தோர்களுக்கும் மதிப்பளிக்க வேண்டும் என்பதை இது உணர்த்துகிறது.
தலைமைப் பண்பும் நகைச்சுவை உணர்வும்
கடலில் பாலம் அமைக்கும் பணியில் ஈடுபட்டிருந்த வானரப் படைகள் சோர்வடைந்த போது, அவர்களைத் தன் பேச்சால் உற்சாகப்படுத்திப் பணியை வெற்றிகரமாக முடிக்க வழிநடத்தினார் அனுமன். ஒரு சிறந்த தலைவன் என்பவன் கடினமான சூழலிலும் தன் குழுவினரைச் சோர்ந்து விடாமல் பார்த்துக்கொள்ள வேண்டும் என்பதற்கு அனுமன் ஒரு சிறந்த உதாரணம். அதேபோல், எவ்வளவு பெரிய இக்கட்டான சூழலிலும் நிதானத்தை இழக்காமல், நகைச்சுவையோடு அதனை எதிர்கொள்வது அனுமனின் தனித்திறன். மன அழுத்தம் நிறைந்த இன்றைய சூழலில் இந்த நிதானமும் நகைச்சுவையும் மிக முக்கியமானவை.
அவமானத்தைத் தாங்கும் பொறுமை
சீதையைத் தேடிச் சென்று சிறைபிடிக்கப்பட்ட அனுமன், ராவணனின் சபை முன் நிறுத்தப்பட்டார். ஒரு தூதுவனாகச் சென்ற அவருக்கு அமர இருக்கை கூட வழங்கப்படவில்லை. ஆனால், அனுமன் அதற்காகக் கோபப்படவோ, அவமானப்பட்டு நிலைகுலையவோ இல்லை. மாறாக, தான் வந்த காரியத்தில் கண்ணும் கருத்துமாய் இருந்து, ராமன் சொல்லச் சொன்ன சமாதானத் தூதை ராவணனிடம் நிதானமாக எடுத்துரைத்தார். தனிப்பட்ட விருப்பு வெறுப்புகளை விடவும், தான் ஏற்றுக்கொண்ட கடமையே முக்கியம் என்பதை இது நமக்குக் கற்பிக்கிறது.
சமயோசித புத்தியும் அசாத்திய உழைப்பும்
இலங்கைப் போரில் லட்சுமணன் மயக்கமடைந்த போது, அவரைக் காக்க சஞ்சீவி மூலிகையை இமயமலையில் இருந்து கொண்டு வரும் பொறுப்பு அனுமனிடம் ஒப்படைக்கப்பட்டது. இமயமலைக்குச் சென்ற அனுமனுக்குச் சஞ்சீவி மூலிகை எது என்று தெரியவில்லை. ஆனால், அதற்காக அவர் நேரத்தை வீணடிக்கவில்லை. மூலிகையைத் தேடித் தாமதம் செய்வதை விட, அந்த மலையையே பெயர்த்து எடுத்துக்கொண்டு இலங்கைக்கே வந்துவிட்டார். ஒரு வேலையைச் செய்யும்போது தடைகள் வந்தால், மாற்று வழியை யோசித்து அதே நேரத்தில் அந்த வேலையைத் தடையின்றி முடிக்கும் 'சமயோசித புத்தி' ஒவ்வொருவருக்கும் அவசியம் தேவை.
ராமன் மற்றும் சுக்ரீவன் இடையேயான நட்பை உறுதிப்படுத்தியதும், வாலி வதத்திற்குப் பின் சுக்ரீவனுக்கு அரசுரிமையைப் பெற்றுத் தந்ததும் அனுமனின் திறமையான செயல்பாடுகளே. இப்படிப் பணிவு, வேகம், விவேகம் என அனுமனிடம் உள்ள அத்தனை குணங்களும் ஒரு மனிதனை வாழ்வில் வெற்றியாளனாக மாற்றும் என்பதில் ஐயமில்லை.
ஆயுள் முழுவதும் ரூ.52,000 ஓய்வூதியம்! எல்.ஐ.சி.யின் அசத்தல் திட்டம்!
வீடியோ! 5 அடி முதலையை விழுங்கும் மலைப்பாம்பு!!
வீடியோ! ராஜநாகத்துடன் ஆக்ரோஷமாக சண்டையிடும் கோழி!!