டெல்டாவில் கனமழையால் ஒரு லட்சம் ஏக்கர் பயிர்கள் அழுகும் அபாயம்... தாமிரபரணியில் வெள்ளப்பெருக்கு!
தென்குமரிக் கடல் பகுதியில் நிலை கொண்டிருக்கும் காற்றழுத்தத் தாழ்வுப் பகுதி காரணமாகத் தமிழகத்தின் பல்வேறு மாவட்டங்களில் கடந்த சில நாட்களாகக் கனமழை கொட்டித் தீர்த்தது. குறிப்பாக, டெல்டா மாவட்டங்களில் பெய்த இடைவிடாத தொடர் மழையால், சுமார் ஒரு இலட்சம் ஏக்கர் பரப்பளவிலான பயிர்கள் முற்றிலும் அழுகும் அபாயத்தில் இருப்பதால் விவசாயிகள் பெரும் கவலைக்குள்ளாகியுள்ளனர். மறுபுறம், தென் மாவட்டங்களில் பெய்த கனமழையால் தாமிரபரணி ஆற்றில் வெள்ளம் பெருக்கெடுத்து ஓடுகிறது.
டெல்டா மாவட்டங்களான நாகப்பட்டினம், திருவாரூர், தஞ்சாவூர் மற்றும் மயிலாடுதுறை உள்ளிட்ட பகுதிகளில் கடந்த மூன்று நாட்களுக்கும் மேலாகத் தொடர்ந்து மழை பெய்தது. இதனால், தாழ்வான பகுதிகள், குடியிருப்புப் பகுதிகள் மட்டுமின்றி, ஆயிரக்கணக்கான ஏக்கர் விவசாய நிலங்களிலும் மழைநீர் சூழ்ந்து வெள்ளக்காடாகக் காட்சியளிக்கிறது. நேற்று முன்தினம் மாலைக்குப் பிறகு மழை சற்று ஓய்ந்திருந்தாலும், வயல்களில் தேங்கி நிற்கும் தண்ணீர் இன்னும் வடியாததால் நிலைமை மோசமாக உள்ளது.
தொடர் மழையின் காரணமாக ஏற்பட்ட பயிர்ச் சேத விவரங்கள் அதிர்ச்சி அளிக்கின்றன. நாகப்பட்டினம் மாவட்டத்தில் மட்டும் சுமார் 50,000 ஏக்கர் இளம் சம்பா மற்றும் தாளடிப் பயிர்கள் நீரில் மூழ்கியுள்ளன. இதேபோல், மயிலாடுதுறை மாவட்டத்தில் 10,000 ஏக்கர் சம்பா நேரடி விதைப்புப் பயிர்களும், திருவாரூர் மாவட்டத்தில் 15,000 ஏக்கர் சம்பா, தாளடிப் பயிர்களும், தஞ்சாவூர் மாவட்டத்தில் 15,000 ஏக்கர் பயிர்களும் நீரில் மூழ்கியுள்ளன. புதுக்கோட்டை மாவட்டத்தில் 300 ஏக்கர் பயிர்கள் பாதிக்கப்பட்டுள்ளன. ஒட்டுமொத்தமாக டெல்டா மாவட்டங்களில் 1 லட்சம் ஏக்கர் பயிர்கள் கடந்த மூன்று நாட்களாக மழைநீரில் மூழ்கியுள்ளதால், அவை அழுகி வீணாகும் நிலையில் உள்ளன. இதேபோல் கடலூர் மாவட்டத்திலும் 3 ஆயிரம் ஏக்கர் நெற்பயிர்கள் நீரில் மூழ்கிச் சேதமடைந்துள்ளன.
தற்போது மழை சற்று ஓய்ந்திருப்பதால், வயலில் தேங்கி நிற்கும் தண்ணீரை வெளியேற்றும் பணியில் விவசாயிகள் மும்முரமாக ஈடுபட்டுள்ளனர். இருப்பினும், பயிர்கள் நீரில் மூழ்கி நீண்ட நேரம் ஆவதால், விவசாயிகள் தங்களின் வாழ்வாதாரத்தை இழக்கும் அபாயத்தில் மிகுந்த கவலையுடன் உள்ளனர். இதற்கிடையே, டெல்டா மாவட்டங்களில் கடல் கொந்தளிப்பு காரணமாக, ஏழாவது நாளாகவும் சுமார் 1.50 லட்சம் மீனவர்கள் மீன்பிடிக்கச் செல்ல முடியாமல் வீடுகளுக்குள் முடங்கியுள்ளனர். இதனால் சுமார் ரூ.400 கோடி வரை மீன் ஏற்றுமதி வர்த்தகம் பாதிக்கப்பட்டுள்ளது என்று மதிப்பிடப்பட்டுள்ளது.
டெல்டா மாவட்டங்கள் ஒருபுறம் பாதிக்கப்பட, திருநெல்வேலி மற்றும் தென்காசி மாவட்டங்களில் பெய்த கனமழை காரணமாக அணைகளுக்கு நீர்வரத்து தொடர்ந்து அதிகரித்து வருகிறது. இதனால், தாமிரபரணி ஆற்றில் வெள்ளம் அபாய அளவைத் தாண்டிப் பெருக்கெடுத்து ஓடுகிறது. ஆற்றங்கரையோரம் வசிக்கும் மக்கள் எச்சரிக்கையுடன் இருக்குமாறு அறிவுறுத்தப்பட்டுள்ளனர். மேலும், நெல்லை மற்றும் சுற்றுவட்டாரப் பகுதிகளில் பெய்த கனமழையின் தாக்கத்தால், 15 க்கும் மேற்பட்ட வீடுகள் இடிந்து சேதமடைந்துள்ளன என்றும் தகவல்கள் வெளியாகி உள்ளன. தமிழக அரசு உடனடியாகப் பயிர்ச் சேதங்களை ஆய்வு செய்து விவசாயிகளுக்கு நிவாரணம் வழங்க வேண்டும் என்பதே அனைவரின் கோரிக்கையாக உள்ளது.
ஆயுள் முழுவதும் ரூ.52,000 ஓய்வூதியம்! எல்.ஐ.சி.யின் அசத்தல் திட்டம்!
வீடியோ! 5 அடி முதலையை விழுங்கும் மலைப்பாம்பு!!
வீடியோ! ராஜநாகத்துடன் ஆக்ரோஷமாக சண்டையிடும் கோழி!!