இலங்கையில் கனமழைக்கு 69 பேர் பலி: இந்தியா சார்பில் 'ஆபரேசன் சாகர் பந்து' மூலம் நிவாரணம்!
இந்தியாவின் அண்டை நாடான இலங்கையில், தொடர்ச்சியான கனமழை மற்றும் சூறாவளித் தாக்குதல் காரணமாக ஏற்பட்ட வெள்ளப்பெருக்கு மற்றும் நிலச்சரிவில் சிக்கி இதுவரை 69 பேர் உயிரிழந்துள்ளனர். இந்தச் சூழலில், பேரிடரில் சிக்கித் தவிக்கும் இலங்கை மக்களுக்கு உதவும் வகையில், இந்தியா சார்பில் ‘ஆபரேசன் சாகர் பந்து’ என்ற மனிதாபிமான உதவி நடவடிக்கை மேற்கொள்ளப்பட்டு வருகிறது.
இலங்கையில் நவம்பர் மாதத்தின் மத்தியில் இருந்தே பருவமழை தீவிரமாகப் பெய்து வருகிறது. குறிப்பாக, கடந்த நவம்பர் 17ஆம் தேதி முதல் மழை இடைவிடாமல் கொட்டித் தீர்த்ததன் விளைவாக, பல இடங்களில் நிலச்சரிவும், ஆறுகளில் வெள்ளப்பெருக்கும் ஏற்பட்டுள்ளன. இதனால், தலைநகர் கொழும்பு உட்படப் பல முக்கிய நகரங்களில் மக்களின் இயல்பு வாழ்க்கை கடுமையாகப் பாதிக்கப்பட்டுள்ளது.
இந்தத் துயரச் சம்பவங்கள் குறித்து இலங்கை பேரிடர் மேலாண்மை மையம் வெளியிட்ட தகவலின்படி, கனமழையில் சிக்கி இதுவரை 69 பேர் பலியாகி உள்ளனர். மேலும், 34 பேரைக் காணவில்லை என்றும், ஏராளமானோர் காயமடைந்து மருத்துவமனைகளில் சிகிச்சை பெற்று வருவதாகவும் தெரிவிக்கப்பட்டுள்ளது.
தொடர்ச்சியான இந்த இயற்கைச் சீற்றத்தால் சுமார் 63 ஆயிரம் குடும்பங்களைச் சேர்ந்த 2.19 லட்சம் பேர் கடுமையாகப் பாதிக்கப்பட்டுள்ளனர். நான்கு வீடுகள் முற்றிலும் இடிந்து விழுந்துவிட்டன. 666 வீடுகள் பகுதியளவில் சேதமடைந்துள்ளன. அவசர உதவி: பாதிக்கப்பட்ட பொதுமக்கள் அவசர உதவிக்கு 117 என்ற அவசர எண்ணில் தொடர்புகொள்ளலாம் என்றும் அறிவிக்கப்பட்டுள்ளது.
மீட்புப் பணிகளைத் துரிதப்படுத்துமாறும், பாதிக்கப்பட்டவர்களுக்குத் தடையில்லா நிவாரண உதவி கிடைக்கவும் வழிவகை செய்யுமாறும் அனைத்து மாவட்ட அதிகாரிகளுக்கும் இலங்கை அதிபர் அனுர குமார திசநாயகே அவர்கள் உத்தரவிட்டுள்ளார். தற்போது மீட்புப் பணிகள் துரித வேகத்தில் மேற்கொள்ளப்பட்டு வருகின்றன.
சூறாவளிப் பாதிப்பு, மழை, நிலச்சரிவு மற்றும் வெள்ளப்பெருக்கால் பாதிக்கப்பட்டு உள்ள இலங்கை மக்களுக்கு உதவிடும் வகையில், இந்தியாவின் கடற்படை உதவிக் கரம் நீட்டியுள்ளது. இந்தத் துயரத்தில் பலியானவர்களின் குடும்பத்தினருக்கு இந்தியப் பிரதமர் திரு. நரேந்திர மோடி அவர்கள் தனது ஆழ்ந்த இரங்கலைத் தெரிவித்துக் கொண்டார். பேரிடரை முன்னிட்டு, இந்தியா சார்பில் 'ஆபரேசன் சாகர் பந்து' என்ற மனிதாபிமான உதவி மற்றும் பேரிடர் நிவாரண நடவடிக்கை மேற்கொள்ளப்பட்டுள்ளது.
இது குறித்து மத்திய வெளிவிவகார மந்திரி திரு. எஸ். ஜெய்சங்கர் அவர்கள் தனது சமூக ஊடகப் பக்கத்தில் பதிவிட்டுள்ள தகவலின்படி, இந்தியக் கடற்படைக்குச் சொந்தமான பெரிய கப்பல்களான ஐ.என்.எஸ். விக்ராந்த் மற்றும் ஐ.என்.எஸ். உதயகிரி ஆகியவை மூலம் கொழும்பு நகரில் நிவாரண உதவிப் பொருட்கள் வழங்கப்பட்டு வருகின்றன. மேலும், பாதிக்கப்பட்ட பகுதிகளுக்குத் தொடர்ந்து நிவாரண உதவிக்கான பணிகள் முழுவீச்சில் நடந்து வருவதாகவும் அவர் குறிப்பிட்டுள்ளார்.
ஆயுள் முழுவதும் ரூ.52,000 ஓய்வூதியம்! எல்.ஐ.சி.யின் அசத்தல் திட்டம்!
வீடியோ! 5 அடி முதலையை விழுங்கும் மலைப்பாம்பு!!
வீடியோ! ராஜநாகத்துடன் ஆக்ரோஷமாக சண்டையிடும் கோழி!!