"எனக்கு நீதி வேண்டும்" - நிழலுலக தாதா ஹாஜி மஸ்தானின் மகள் பிரதமர் மோடி, அமித் ஷாவிடம் கண்ணீர் மல்கக் கோரிக்கை!
மும்பையின் ஒருகாலத்து நிழலுலக தாதாவாக அறியப்பட்ட ஹாஜி மஸ்தானின் மகள் ஹசீன் மஸ்தான் மிர்சா, தனக்கு நேர்ந்த குடும்பக் கொடுமைகள் குறித்துப் பிரதமர் நரேந்திர மோடி மற்றும் உள்துறை அமைச்சர் அமித் ஷாவிடம் உருக்கமான வேண்டுகோள் விடுத்துள்ளார். தனது தந்தை மறைந்த பிறகு, உறவினர்களாலேயே தான் சொல்லொணாத் துயரங்களுக்கு ஆளானதாகவும், தனது சொத்துக்கள் பறிக்கப்பட்டதாகவும் அவர் குற்றம் சாட்டியுள்ளார். இது தொடர்பாக அவர் இன்ஸ்டாகிராமில் வெளியிட்டுள்ள வீடியோ சமூக வலைதளங்களில் பெரும் பரபரப்பை ஏற்படுத்தியுள்ளது.
கட்டாயத் திருமணமும் சித்ரவதையும்: தமிழகத்தைச் சேர்ந்த ஹாஜி மஸ்தான் மும்பையில் பெரிய தொழிலதிபராகவும், தாதாவாகவும் வலம் வந்தவர். அவர் மறைந்த பிறகு, அவரது மகள் ஹசீனுக்கு சிறு வயதிலேயே அவரது சம்மதம் இல்லாமல் மாமா மகனுடன் கட்டாயத் திருமணம் செய்து வைக்கப்பட்டுள்ளது. ஏற்கனவே 8 முறை திருமணமான அந்த நபர், ஹசீனைத் தவறாகப் பயன்படுத்தியதோடு மட்டுமல்லாமல், அவரது சொத்துக்களையும் அபகரித்துக் கொண்டதாக ஹசீன் புகாரளித்துள்ளார். இந்தக் கொடுமைகளால் மனமுடைந்த அவர், கடந்த காலங்களில் மூன்று முறை தற்கொலைக்கு முயன்றதாகவும் வேதனையுடன் தெரிவித்துள்ளார்.
காவல்துறை மீதான அதிருப்தி: தன் மீதான பாலியல் வன்கொடுமை மற்றும் கொலை முயற்சிகள் குறித்துப் பேசிய ஹசீன், தனது கணவர் ஒரு சிறுமிக்கு இழைத்த கொடூரமான குற்றத்தைச் சுட்டிக்காட்டியுள்ளார். அந்தச் சிறுமியைப் பலாத்காரம் செய்து அவர் இறக்க நேரிட்டபோது, போலீசார் தன்னையும் விசாரணை என்ற பெயரில் அச்சுறுத்தியதாக அவர் கூறியுள்ளார். "நான் குழந்தையாக இருந்தபோது வீட்டை விட்டு வெளியே வீசப்பட்டேன்; அப்போது எனக்கு உதவ யாரும் வரவில்லை. இப்போது வளர்ந்துவிட்டேன், எனக்கான நீதியை நானே கேட்க வேண்டிய நிலையில் உள்ளேன்" என்று அவர் ஆவேசமாகப் பேசியுள்ளார்.
பிரதமரிடம் உருக்கமான வேண்டுகோள்: பிரதமர் மோடியின் 'முத்தலாக்' தடைச் சட்டத்தைப் பாராட்டியுள்ள ஹசீன், தன்னைப்போலப் பாதிக்கப்பட்ட பெண்களுக்கு உடனடி நீதி கிடைக்கக் கடுமையான சட்டங்கள் அவசியம் என வலியுறுத்தியுள்ளார். தனது தந்தை மறைந்த செய்தி கூடத் தெரியாமல் இரண்டு ஆண்டுகள் தான் ஒரு அறையில் அடைத்து வைக்கப்பட்டிருந்ததாகக் கூறும் அவர், இழந்த தனது சொத்துக்களையும் கௌரவத்தையும் மீட்டுத்தர மத்திய அரசு நடவடிக்கை எடுக்க வேண்டும் என்று கோரியுள்ளார். மும்பை நிழலுலக வரலாற்றில் ஒரு சகாப்தமாகத் திகழ்ந்த ஹாஜி மஸ்தானின் மகளுக்கே இந்த நிலைமையா எனப் பலரும் அதிர்ச்சி அடைந்துள்ளனர்.
ஆயுள் முழுவதும் ரூ.52,000 ஓய்வூதியம்! எல்.ஐ.சி.யின் அசத்தல் திட்டம்!
வீடியோ! 5 அடி முதலையை விழுங்கும் மலைப்பாம்பு!!
வீடியோ! ராஜநாகத்துடன் ஆக்ரோஷமாக சண்டையிடும் கோழி!!