இண்டிகோ விமானத்தின் மீது கார் மோதி விபத்து... பெரும் பரபரப்பு !
கொல்கத்தா விமான நிலையத்தில் நிறுத்தி வைக்கப்பட்டிருந்த இண்டிகோ நிறுவனத்தின் விமானம் மீது மஹிந்திரா கார் மோதிய சம்பவம் பெரும் பரபரப்பை ஏற்படுத்தியுள்ளது. நேற்று இரவு (ஏப்., 07) விமான நிலைய ஊழியர்களுக்குச் சொந்தமான கார், நிறுத்தப்பட்டிருந்த இடத்திலிருந்து திடீரென நகரத் தொடங்கியுள்ளது. டிரைவர் இல்லாத நிலையில் கார் தானாகவே சென்று அங்கிருந்த ஏ320 ரக விமானத்தின் மீது பலமாக மோதியது. இந்த எதிர்பாராத விபத்தால் விமான நிலைய ஊழியர்கள் மற்றும் அதிகாரிகள் அதிர்ச்சி அடைந்தனர்.
விபத்து குறித்து நடத்தப்பட்ட முதற்கட்ட விசாரணையில், காரின் ஹேண்ட் பிரேக் சரியாகச் செயல்படாததே விபத்திற்குக் காரணம் எனத் தெரியவந்தது. ஹேண்ட் பிரேக் செயலிழந்ததால், சரிவான பகுதியில் இருந்து கார் மெல்ல நகரத் தொடங்கி விமானத்தின் மீது மோதியுள்ளது. அதிர்ஷ்டவசமாக இந்த விபத்தின் போது விமானத்தைச் சுற்றி ஊழியர்கள் யாரும் இல்லாததால் பெரும் உயிர்ச் சேதம் தவிர்க்கப்பட்டது. இருப்பினும், காரின் வேகத்தால் விமானத்தின் ஒரு பகுதி பலத்த சேதமடைந்தது.
கார் மோதியதில் சேதமடைந்த இண்டிகோ நிறுவனத்தின் ஏ320 விமானம் உடனடியாகப் பழுது பார்க்கும் பணிக்கு மாற்றப்பட்டது. விமானத்தின் பாதுகாப்பு மற்றும் உறுதித்தன்மையைச் சோதனை செய்த பிறகே அது மீண்டும் இயக்கப்படும் என அதிகாரிகள் தெரிவித்துள்ளனர். விமான நிலையத்தின் பாதுகாப்பான பகுதியில் இத்தகைய விபத்து நேரிட்டது குறித்து விசாரணைக்கு உத்தரவிடப்பட்டுள்ளது. இனி வரும் காலங்களில் இது போன்ற கவனக்குறைவான சம்பவங்கள் நடைபெறாமல் இருக்க உரிய நடவடிக்கைகள் எடுக்கப்படும் என விமான நிலைய நிர்வாகம் தெரிவித்துள்ளது.
ஆயுள் முழுவதும் ரூ.52,000 ஓய்வூதியம்! எல்.ஐ.சி.யின் அசத்தல் திட்டம்!
வீடியோ! 5 அடி முதலையை விழுங்கும் மலைப்பாம்பு!!
வீடியோ! ராஜநாகத்துடன் ஆக்ரோஷமாக சண்டையிடும் கோழி!!