போருக்கு நடுவே பதற்றம்... ஈரானில் அமெரிக்க ஆதரவாளர்கள் மேலும் 3 பேருக்கு மரண தண்டனை.!
வளைகுடா நாடுகளில் போர் மேகங்கள் சூழ்ந்துள்ள நிலையில், அமெரிக்கா மற்றும் இஸ்ரேலுக்கு ஆதரவாகச் செயல்பட்டதாகக் கூறி 3 பேருக்கு ஈரான் அரசு இன்று (வியாழக்கிழமை) மரண தண்டனை நிறைவேற்றியுள்ளது. மெஹ்தி காசெமி, சலே முகமதி மற்றும் சயீத் தாவுதி என அடையாளம் காணப்பட்ட இந்த மூவரும், கடந்த ஜனவரி மாதம் நடைபெற்ற நாடு தழுவிய போராட்டங்களின் போது இரண்டு போலீஸ் அதிகாரிகளைக் கொன்றதாகக் குற்றம் சாட்டப்பட்டிருந்தது. இவர்கள் அமெரிக்கா மற்றும் இஸ்ரேலின் தூண்டுதலின் பேரில் வன்முறையில் ஈடுபட்டதாக ஈரான் நீதித்துறை தெரிவித்துள்ளது.
ஈரானின் உச்ச நீதிமன்றம் இந்தத் தண்டனையை உறுதி செய்ததைத் தொடர்ந்து, இன்று அதிகாலை சிறைச்சாலையில் இவர்கள் தூக்கிலிடப்பட்டனர். இவர்களுடன் சேர்த்து, இஸ்ரேலின் 'மொசாட்' உளவு அமைப்புக்காகப் பணியாற்றியதாகக் கூறி ஸ்வீடன் நாட்டைச் சேர்ந்த ஒருவருக்கும் நேற்று மரண தண்டனை நிறைவேற்றப்பட்டது குறிப்பிடத்தக்கது. ஈரானின் முக்கியத் தலைவர்கள் அமெரிக்கத் தாக்குதலில் கொல்லப்பட்டு வரும் நிலையில், அந்நாட்டிற்குள் இருக்கும் 'எதிரி நாட்டு ஆதரவாளர்களை' ஒடுக்கும் நோக்கில் இந்தத் தூக்குத் தண்டனைகள் வேகப்படுத்தப்பட்டுள்ளதாகத் தெரிகிறது.
சர்வதேச மனித உரிமை அமைப்புகள் இந்தத் தண்டனைகளுக்குக் கடும் கண்டனம் தெரிவித்துள்ளன. முறையான விசாரணை இன்றி, வலுக்கட்டாயமாகப் பெறப்பட்ட வாக்குமூலங்களின் அடிப்படையில் இந்தத் தண்டனைகள் வழங்கப்பட்டுள்ளதாக ஐக்கிய நாடுகள் சபை கவலை வெளியிட்டுள்ளது. ஏற்கனவே போர் காரணமாக ஈரானில் மக்கள் கடும் அச்சத்தில் உள்ள நிலையில், அரசின் இந்த அதிரடி நடவடிக்கைகள் உள்நாட்டிற்குள் மேலும் கொந்தளிப்பை ஏற்படுத்தியுள்ளது. அமெரிக்காவுடனான மோதல் உச்சகட்டத்தை எட்டியுள்ள சூழலில், இத்தகைய தூக்குத் தண்டனைகள் இரு நாடுகளுக்கும் இடையிலான பகையை மேலும் அதிகரிக்கும் என எதிர்பார்க்கப்படுகிறது.
ஆயுள் முழுவதும் ரூ.52,000 ஓய்வூதியம்! எல்.ஐ.சி.யின் அசத்தல் திட்டம்!
வீடியோ! 5 அடி முதலையை விழுங்கும் மலைப்பாம்பு!!
வீடியோ! ராஜநாகத்துடன் ஆக்ரோஷமாக சண்டையிடும் கோழி!!