4,00,000 ஆசிரியர்களின் வேலைக்கு ஆபத்து... RTE சட்டத்தில் திருத்தம் தேவை... பிரதமருக்கு மு.க.ஸ்டாலின் அவசரக் கடிதம்!
இலவச மற்றும் கட்டாயக் கல்வி உரிமைச் சட்டம் (RTE Act 2009) காரணமாகத் தமிழ்நாட்டில் உள்ள சுமார் நான்கு இலட்சம் ஆசிரியர்களின் பணிக்குச் சிக்கல் ஏற்பட்டுள்ள நிலையில், அந்தச் சட்டப் பிரிவுகளில் உடனடியாகத் திருத்தம் கொண்டு வர வேண்டும் என்று வலியுறுத்தி, தமிழக முதலமைச்சர் மு.க.ஸ்டாலின் அவர்கள் பிரதமர் நரேந்திர மோடிக்கு அவசரக் கடிதம் ஒன்றை எழுதியுள்ளார். TET (ஆசிரியர் தகுதித் தேர்வு) தகுதியில் இருந்து ஆசிரியர்களைப் பாதுகாக்கவும், குழந்தைகளின் கல்வி பாதிக்கப்படாமல் இருக்கவும் இந்தத் திருத்தம் அவசியம் என்று அவர் வலியுறுத்தியுள்ளார்.
இலவச மற்றும் கட்டாயக் கல்வி உரிமைச் சட்டம், 2009 (RTE சட்டம்) பிரிவு 23 மற்றும் தேசிய ஆசிரியர் கல்விக் குழும சட்டம், 1993 (NCTE சட்டம்) பிரிவு 12A ஆகியவற்றில் உரிய திருத்தங்கள் மேற்கொள்ள வேண்டும் என்பதே முதல்வரின் பிரதான கோரிக்கையாகும். ஆசிரியர்களின் நியமனங்கள் மற்றும் பதவி உயர்வுகளுக்கான தகுதி தொடர்பாகச் சமீபத்தில் உச்ச நீதிமன்றம் வழங்கிய தீர்ப்பின் பின்னணியில் இந்தக் கடிதம் அனுப்பப்பட்டுள்ளது.
அந்தக் கடிதத்தில், சிவில் மேல்முறையீடு எண் 1405/2025 உள்ளிட்ட வழக்குகளில் உச்ச நீதிமன்றம் செப்டம்பர் 1, 2025 அன்று வழங்கிய தீர்ப்பை முதல்வர் மு.க.ஸ்டாலின் சுட்டிக்காட்டியுள்ளார். அந்தத் தீர்ப்பின்படி, ஆசிரியர் தகுதித் தேர்வில் (TET) தேர்ச்சி பெறாத பணியில் உள்ள அனைத்து ஆசிரியர்களும், இரண்டு ஆண்டுகளுக்குள் அத்தகுதியைப் பெற வேண்டும் என்று குறிப்பிடப்பட்டுள்ளது. அத்துடன், ஐந்து ஆண்டுகளுக்கும் குறைவாகப் பணியாற்றிய ஆசிரியர்கள் TET தகுதி பெறாவிட்டால், அவர்களுக்கு பதவி உயர்வு மறுக்கப்படும் என்றும் குறிப்பிடப்பட்டுள்ளது.
தேசிய ஆசிரியர் கல்விக் குழுமம் (NCTE) முன்பு, 23.08.2010-க்கு முன்பு நியமிக்கப்பட்ட ஆசிரியர்களுக்கு, TET போன்ற புதிய தகுதித் தேவைகளிலிருந்து விலக்கு அளித்திருந்தது. ஆனால், உச்ச நீதிமன்றத்தின் தற்போதைய இந்தத் தீர்ப்பு, முன்பு வழங்கப்பட்ட விலக்கை மீறி, TET-ஐ கட்டாயமாக்கியுள்ளது. இதன் காரணமாக, TET தேர்ச்சி பெறாத ஆசிரியர்கள் இரண்டு ஆண்டுகளுக்குள் தேர்ச்சி பெற வேண்டிய கட்டாயத்திற்குத் தள்ளப்பட்டுள்ளனர்; இல்லாவிட்டால் அவர்களின் வேலை பறிக்கப்படும் என்ற நிலை உருவாகியுள்ளது என்று முதல்வர் தனது வருத்தத்தைத் தெரிவித்துள்ளார்.
பணி நியமனத்தின்போது நடைமுறையில் இருந்த சட்டப்பூர்வ விதிகளின்கீழ் முழுமையாகத் தகுதி பெற்று, முறையாக நியமிக்கப்பட்ட ஆசிரியர்களில் பெரும்பான்மையோரை இந்த மாற்றம் நேரடியாகப் பாதிக்கும் என்று அவர் சுட்டிக்காட்டியுள்ளார். அதிலும் குறிப்பாக, தமிழ்நாட்டில் மட்டும் ஏறத்தாழ நான்கு இலட்சம் ஆசிரியர்கள் நேரடியாகப் பாதிக்கப்படுவதாகக் கவலையுடன் தெரிவித்துள்ளார். மேலும், இந்த ஆசிரியர்கள் அனைவரும் 2011-ல் TET அறிமுகப்படுத்தப்படுவதற்குப் பல ஆண்டுகளுக்கு முன்பே பணியில் சேர்ந்தவர்கள் என்றும், அவர்களுக்கு முந்தைய தேதியிட்டு TET-ஐ அமல்படுத்துவது என்பது, அவர்கள் பணியில் தொடர்வதற்கும் பதவி உயர்வு பெறுவதற்கும் உள்ள உரிமையில் மிகப்பெரிய இடையூறுகளை உருவாக்குகிறது என்றும் முதல்வர் குறிப்பிட்டுள்ளார்.
இந்த உத்தரவு, மாநிலத்தில் நிர்வாகரீதியாகச் சாத்தியமற்ற ஒரு நிலையை உருவாக்குவதுடன், பள்ளிக் கல்வி அமைப்பின் செயல்பாட்டையே சீர்குலைக்கும் அபாயத்தை ஏற்படுத்துகிறது. நாடு முழுவதும் இவ்வளவு பெரிய எண்ணிக்கையிலான அனுபவம் வாய்ந்த ஆசிரியர்களை மாற்றுவது என்பது சாத்தியமற்றது என்றும், நீண்டகாலமாகப் பணியாற்றி வரும் அனுபவம் பெற்ற ஆசிரியர்களுக்குப் பதவி உயர்விற்கான வாய்ப்புகளை மறுப்பது என்பது, தேக்க நிலையையும் சிரமத்தையும் ஏற்படுத்தும் என்றும் முதலமைச்சர் கவலை தெரிவித்துள்ளார்.
எனவே, இந்த நிலைமைகளைக் கருத்தில் கொண்டு, இலவச மற்றும் கட்டாயக் கல்வி உரிமைச் சட்டம், 2009 (RTE சட்டம்) பிரிவு 23 மற்றும் தேசிய ஆசிரியர் கல்விக் குழும சட்டம், 1993 (NCTE சட்டம்) பிரிவு 12A ஆகியவற்றில் உரிய திருத்தங்களை மேற்கொள்ளத் தேவையான நடவடிக்கைகளை எடுக்க ஒன்றியக் கல்வி அமைச்சகத்திற்கு அறிவுறுத்துமாறு பிரதமர் நரேந்திர மோடியைக் கேட்டுக் கொண்டுள்ளார். இதன் மூலம் 23.08.2010 அன்று பணியில் இருந்த ஆசிரியர்கள் பாதுகாக்கப்படுவதுடன், பதவி உயர்வுகளுக்குத் தகுதி பெறுவதுடன், குழந்தைகளின் கல்வியும் பாதிக்கப்படாமல் இருக்கும் என்றும் முதலமைச்சர் மு.க.ஸ்டாலின் தனது கடிதத்தில் தெரிவித்துள்ளார்.
ஆயுள் முழுவதும் ரூ.52,000 ஓய்வூதியம்! எல்.ஐ.சி.யின் அசத்தல் திட்டம்!
வீடியோ! 5 அடி முதலையை விழுங்கும் மலைப்பாம்பு!!
வீடியோ! ராஜநாகத்துடன் ஆக்ரோஷமாக சண்டையிடும் கோழி!!