டெல்லியில் கனிமொழி - ராகுல்காந்தி சந்திப்பு... தொகுதிப் பங்கீட்டில் முக்கிய திருப்பம்!
நாடாளுமன்ற பட்ஜெட் கூட்டத்தொடர் இன்று ஜனவரி 28ம் தேதி தொடங்கியுள்ள நிலையில், முதலமைச்சர் மு.க. ஸ்டாலின் அறிவுறுத்தலின்படி கனிமொழி எம்.பி, டெல்லியில் உள்ள சோனியா காந்தி இல்லத்தில் ராகுல் காந்தியை இன்று சந்தித்துப் பேசினார்.
திமுக - காங்கிரஸ் இடையே தொகுதிப் பங்கீடு பேச்சுவார்த்தையில் கடந்த சில நாட்களாக முன்னேற்றம் ஏதும் இல்லாமல் ஒருவிதத் தேக்க நிலை நிலவி வந்தது. காங்கிரஸ் தரப்பில் கடந்த முறையை விட கூடுதல் தொகுதிகள் மற்றும் 'ஆட்சியில் பங்கு' போன்ற கோரிக்கைகள் முன்வைக்கப்பட்டதாகக் கூறப்படுகிறது. கூட்டணியில் நிலவும் கருத்து வேறுபாடுகளைக் களைந்து, தேர்தல் பணிகளை விரைவுபடுத்த முதலமைச்சர் சார்பாகக் கனிமொழி இந்தச் சந்திப்பை மேற்கொண்டுள்ளார்.
2021 தேர்தலில் காங்கிரஸ் 25 இடங்களில் போட்டியிட்டது. இந்த முறை அவர்கள் 35 முதல் 40 இடங்கள் வரை எதிர்பார்ப்பதாகத் தெரிகிறது. ஆனால், திமுக 30 முதல் 32 இடங்களுக்குள் பேச்சுவார்த்தையை முடிக்கத் திட்டமிட்டுள்ளது. தமிழக காங்கிரஸின் ஒரு தரப்பினர் 'கூட்டணி ஆட்சி' என்ற கோரிக்கையைத் தொடர்ந்து வலியுறுத்தி வருகின்றனர். இது குறித்த கட்சியின் மேலிட நிலைப்பாட்டை ராகுல் காந்தி இந்தச் சந்திப்பில் தெளிவுபடுத்தியிருக்கலாம்.
நடிகர் விஜய்யின் தமிழக வெற்றிக் கழகம் களம் காண உள்ள நிலையில், வாக்குகள் சிதறாமல் இருக்க 'இந்தியா' கூட்டணியின் வலுவை உறுதி செய்வது குறித்து இருவரும் ஆலோசித்துள்ளனர்.
இன்று மாலை சுமார் 4 மணியளவில் பட்ஜெட் கூட்டத்தொடர் இடைவேளையின் போது இந்தச் சந்திப்பு நிகழ்ந்துள்ளது. சமீபத்தில் காங்கிரஸ் எம்.பி மாணிக்கம் தாகூர் மற்றும் ஜோதிமணி ஆகியோர் திமுக நிர்வாகிகளின் சில விமர்சனங்களுக்கு எதிராகத் தங்களின் அதிருப்தியை வெளிப்படுத்தியிருந்தனர். இத்தகைய சலசலப்புகளுக்கு முற்றுப்புள்ளி வைக்கவே இந்த உயர்மட்டச் சந்திப்பு நடத்தப்பட்டுள்ளது. மக்கள் நீதி மய்யம் ஏற்கனவே கூட்டணியில் இணைந்துள்ளதால், அவர்களுக்கு ஒதுக்கப்படும் இடங்கள் போக எஞ்சிய இடங்களை மற்ற கூட்டணிக் கட்சிகளுக்குப் பிரித்து வழங்குவதில் திமுக கவனமாக உள்ளது.
ஆயுள் முழுவதும் ரூ.52,000 ஓய்வூதியம்! எல்.ஐ.சி.யின் அசத்தல் திட்டம்!
வீடியோ! 5 அடி முதலையை விழுங்கும் மலைப்பாம்பு!!
வீடியோ! ராஜநாகத்துடன் ஆக்ரோஷமாக சண்டையிடும் கோழி!!