கார்த்திகை பௌர்ணமி... திருவண்ணாமலை கிரிவலம்: செல்ல உகந்த நேரம் எப்போது? - கோவில் நிர்வாகம் அறிவிப்பு!
உலகப் பிரசித்தி பெற்றதும், பஞ்சபூத ஸ்தலங்களில் அக்னி ஸ்தலமாக விளங்குவதுமான திருவண்ணாமலை அருணாசலேஸ்வரர் திருக்கோயிலில், கார்த்திகை தீபத் திருவிழா மிக முக்கியமான பக்தி நிகழ்வாகக் கொண்டாடப்படுகிறது. இந்த விழாவுக்கு இடையே, பக்தர்கள் கிரிவலம் செல்வதற்கான உகந்த நேரத்தையும் கோவில் நிர்வாகம் தற்போது அறிவித்துள்ளது.
திருவண்ணாமலை அருணாசலேஸ்வரர் கோயில் பின்புறம் உள்ள 'அண்ணாமலை' என்று பக்தர்களால் அழைக்கப்படும் 2,668 அடி உயரமுள்ள மலையே சிவபெருமானாகப் போற்றி வணங்கப்படுகிறது. இந்த மலையைச் சுற்றி உள்ள 14 கிலோமீட்டர் தொலைவு கொண்ட பாதையே கிரிவலப் பாதை என அழைக்கப்படுகிறது.
இந்த மலைப் பாதையில் பௌர்ணமி தினங்களில் கிரிவலம் செல்வது மிகவும் புண்ணியமாகக் கருதப்படுகிறது. ஒவ்வொரு பௌர்ணமி அன்றும், தமிழகம் மற்றும் வெளி மாநிலங்களில் இருந்து லட்சக்கணக்கான பக்தர்கள் இங்கு வந்து கிரிவலம் சென்று, மலையை வலம் வந்து சிவபெருமானைத் தரிசித்துச் செல்வது வழக்கம்.
மகாதீபத் திருவிழாவை ஒட்டி வரும் கார்த்திகை மாதத்திற்கான பௌர்ணமி கிரிவலம் செல்ல உகந்த நேரத்தை திருவண்ணாமலை கோயில் நிர்வாகம் தற்போது அதிகாரப்பூர்வமாக அறிவித்துள்ளது.
இந்த அறிவிப்பின்படி, பௌர்ணமி தொடக்கம்: இந்த மாதத்திற்கான பௌர்ணமி திதி நாளை மறுநாள் (வியாழக்கிழமை), டிசம்பர் 4ஆம் தேதி காலை 7.55 மணிக்குத் தொடங்குகிறது. பௌர்ணமி திதி வெள்ளிக்கிழமை டிசம்பர் 5ம் தேதி) காலை 3:55 மணிக்கு முடிகிறது.
இந்த நேரத்தில் பக்தர்கள் கிரிவலம் செல்ல உகந்த நேரம் என கோவில் நிர்வாகத்தின் சார்பில் அறிவிக்கப்பட்டுள்ளது. பொதுவாகப் பௌர்ணமி திதி தொடங்குவதற்கு முன்னரே, பக்தர்கள் கிரிவலம் செல்லத் தொடங்கிவிடுவார்கள். எனினும், திதி முழுவதுமாக நிலவும் இந்த நேரத்தில் கிரிவலம் செல்வது சிறப்பு வாய்ந்ததாகக் கருதப்படுகிறது.
இந்த ஆண்டு மகாதீபம் ஏற்றப்படும் நாளான நாளை டிசம்பர் 3ம் தேதி மாலை 6 மணிக்குப் பிறகு, பக்தர்கள் லட்சக்கணக்கில் கிரிவலப் பாதையில் கூடுவார்கள். அண்ணாமலையார் மலையின் உச்சியில் எரியும் மகாதீபத்தைத் தரிசித்தபடியே கிரிவலம் செல்வது மிகவும் சிறப்பானதாகக் கருதப்படுகிறது.
கிரிவலம் செல்ல உகந்த நேரத்தை கோவில் நிர்வாகம் அறிவித்துள்ளதையடுத்து, மாவட்ட நிர்வாகத்தின் மூலம் பக்தர்களுக்குத் தேவையான அடிப்படை வசதிகள் மற்றும் பாதுகாப்பு ஏற்பாடுகளை மேற்கொள்ள அதிகாரிகள் தீவிரமாக ஈடுபட்டு வருகின்றனர். கிரிவலப் பாதையில் குடிநீர், மருத்துவம் மற்றும் தற்காலிகக் கழிப்பறை வசதிகள் போன்ற ஏற்பாடுகள் செய்யப்பட்டு வருகின்றன.
ஆயுள் முழுவதும் ரூ.52,000 ஓய்வூதியம்! எல்.ஐ.சி.யின் அசத்தல் திட்டம்!
வீடியோ! 5 அடி முதலையை விழுங்கும் மலைப்பாம்பு!!
வீடியோ! ராஜநாகத்துடன் ஆக்ரோஷமாக சண்டையிடும் கோழி!!