தோழர் நல்லகண்ணு கடந்து வந்த பாதை... தன்னலம் இல்லா தகைசால் தமிழர் !

தமிழ்நாடு அரசு வழங்கும் தகைசால் தமிழர் விருது, தமிழுக்கும் தமிழின வளர்ச்சிக்கும் பெரும் பங்களிப்பு செய்தவர்களுக்கு வழங்கப்படுகிறது. 2022 ஆம் ஆண்டுக்கான விருது, இந்திய கம்யூனிஸ்ட் கட்சியின் மூத்த தலைவர் ஆர். நல்லகண்ணு அவர்களுக்கு அறிவிக்கப்பட்டது. தன்னலமற்ற அரசியல்வாதியாக வாழ்நாள் முழுவதும் உழைத்த அவர், பல தலைமுறைகளின் மரியாதையை பெற்றார்.

1925 டிசம்பர் 25 அன்று ஸ்ரீவைகுண்டத்தில் விவசாயக் குடும்பத்தில் பிறந்தார். தந்தை ராமசாமி, தாய் கருப்பாயி. பள்ளிப்படிப்பை ஸ்ரீவைகுண்டத்தில் முடித்த அவர், மதுரையில் மேல்படிப்பு தொடர்ந்தார். ஆனால் தீவிர அரசியல் ஈடுபாடு காரணமாக கல்வியை முழுமையாக்க முடியவில்லை. சிறுவயதிலேயே சுதந்திரப் போராட்ட உணர்வுடன் செயல்பட்டார். 12 வயதில் தேர்தலில் காங்கிரசுக்கு வாக்களிக்குமாறு மக்களிடம் கேட்டுக்கொண்டார். வேலைநிறுத்தம், போராட்டம், உரிமை கோரல் என இளமையிலேயே தைரியமாக குரல் கொடுத்தார்.

1944 ஆம் ஆண்டு கம்யூனிஸ்ட் கட்சியில் இணைந்தார். பின்னர் ‘ஜனசக்தி’ அலுவலகத்தில் பணியாற்றி சமூக அநீத்திகளை வெளிக்கொணர்ந்தார். பதுக்கி வைக்கப்பட்ட நெல் மூட்டைகள் குறித்து எழுதிய செய்தி பெரிய அதிர்வை ஏற்படுத்தியது. எளிமை, உறுதி, தியாகம் ஆகியவற்றை வாழ்க்கை முழுவதும் கடைபிடித்த நல்லகண்ணு, போராட்டமே வாழ்க்கை என்ற அடையாளத்துடன் மக்கள் மனதில் நிலைத்துள்ளார்.

நகர வாழ்க்கை பிடிக்காததால் சென்னையை விட்டு வெளியேறிய ஆர். நல்லகண்ணு, நாங்குனேரி பகுதியில் விவசாய சங்க பணியில் இறங்கினார். அம்பாசமுத்திரம், சிவகிரி, புளியங்குடி, தென்காசி உள்ளிட்ட பகுதிகளில் மடங்களுக்கு சொந்தமான நிலங்களில் உழைத்த விவசாயிகளை ஒன்றிணைத்தார். பல மைல்கள் நடந்தே சென்று பேசிப் பேசி அவர்களுக்கு உரிமை உணர்வு ஏற்படுத்தினார். மிரட்டல்களைக் கவனிக்காமல், உழைத்த நெல்லை விவசாயிகளே வீடுகளுக்கு எடுத்துச் செல்லும் நிலையை உருவாக்கினார். மடங்கள் தரப்பில் வழக்குகள் தொடரப்பட்டும் அவர் தளரவில்லை.

ஒரு மே தினத்தில் நாங்குனேரியில் நடந்த கூட்டம் பெரிய திருப்பமாக அமைந்தது. சில தெருக்களில் பிற சமூகத்தினருக்கு அனுமதி இல்லை என்ற நிலையிலும் ஆயிரக்கணக்கானோர் தடையை மீறி சென்றனர். கூட்டம் முடிந்து திரும்பிய நல்லகண்ணுவை மடத்து அடியார்கள் தூணில் கட்டி வைத்து தாக்கினர். இருந்தும் அவர் போராட்ட மனப்பாங்கை விடவில்லை.

1948 இல் கட்சி தடை செய்யப்பட்டபோது தலைமறைவானார். பின்னர் கைது செய்யப்பட்ட போது கடுமையான சித்திரவதை நடந்தும், தோழர்களை பற்றிய தகவலை வெளிப்படுத்தவில்லை. நாங்குனேரி சிறைத் தண்டனைக்குப் பிறகு நெல்லைச் சதி வழக்கில் ஆயுள் தண்டனை விதிக்கப்பட்டு ஏழாண்டுகள் சிறை வாசம் அனுபவித்தார். 1956 இல் விடுதலையானதும் அன்றைய முதல்வர் காமராஜர் அவர்களை சந்தித்து, சிறையில் இருந்த பிற தோழர்களையும் விடுதலை செய்ய வேண்டுமென கேட்டுக்கொண்டார்.

உண்ணாவிரதம் முதல் மணல் கொள்ளை தடுப்பு வரை…  

சிறையிலிருந்து வெளிவந்த பின்னரும் ஆர். நல்லகண்ணு தளரவில்லை. அரசின் சட்ட வரம்புக்குள் உள்ளவர்களை விடுதலை செய்யலாம் என அன்றைய முதல்வர் காமராஜர் கூறியபோது, பலருக்கு சிறை வகை உயர்வு கிடைக்க அவர் முயன்றார். அரசியல் கைதிகளுக்கான உரிமைக்காக 12 நாட்கள் உண்ணாவிரதமும் இருந்தார். 1958 இல் ரஞ்சிதம் அவர்களைத் திருமணம் செய்து கொண்டார். எளிய இல்லற வாழ்க்கையிலும் சமூகப் பணியே முதன்மை ஆனது.

விவசாயிகளின் வாழ்வாதாரத்திற்காக கடனா நதியில் அணை கட்ட வேண்டும் என்று 11 நாட்கள் உண்ணாவிரதம் இருந்து கோரிக்கையை நிறைவேற்றச் செய்தார். நொச்சிக்குளம் பிரச்சினையில் துப்பாக்கிச் சூடு நடந்தபோதும் பின்னடையாமல் பட்டினிப் போராட்டம் நடத்தி தீர்வு கண்டார். குற்றாலம் அருகே பந்தய திடல் அமைப்பை எதிர்த்து எழுதிய கட்டுரையால் முயற்சி கைவிடப்பட்டது. 2010 இல் தாமிரபரணி ஆற்றில் மணல் கொள்ளையைத் தடுக்க நீதிமன்றத்தில் நேரில் வாதாடி தடை பெற்றார்.

வாசிப்பு, எழுத்து, அமைப்புப் பணி என பல துறைகளில் தடம் பதித்தார். பல முக்கிய நூல்கள் எழுதியதுடன், வெளிநாடுகளுக்கும் சென்று பயிற்சி பெற்றார். 25 ஆண்டுகள் விவசாயத் தொழிலாளர் சங்கத் தலைவராகவும், 13 ஆண்டுகள் கட்சியின் மாநிலச் செயலாளராகவும் பணியாற்றினார். 80வது பிறந்த நாளில் வசூலிக்கப்பட்ட தொகையையே கட்சிக்குத் திருப்பி அளித்த அவரது நேர்மை, தியாகம், கொள்கை உறுதி என்றும் நினைவாக நிற்கும்.

 அனைத்தும் கட்சிக்கே! நல்லகண்ணுவின் தன்னலம் இல்லா வாழ்வு

தமிழக அரசு வழங்கிய ‘அம்பேத்கர் விருது’ மற்றும் ஒரு லட்சம் ரூபாய் பரிசுத்தொகையை பெற்ற ஆர். நல்லகண்ணு, அதில் பாதியை கட்சிக்கும் மீதியை விவசாயத் தொழிலாளர் சங்கத்துக்கும் வழங்கினார். அன்பின் அடையாளமாக ஒரு பத்திரிகையாளர் அளித்த காரையும் தனக்காக வைத்துக்கொள்ளாமல் கட்சிக்கே ஒப்படைத்தார். தன நலனுக்காக எதையும் சேர்த்துக்கொள்ளாத எளிமையான வாழ்க்கையே அவரது அடையாளமாக இருந்தது.

விவசாயிகள், தொழிலாளர்கள், சுற்றுச்சூழல் பாதுகாப்பு, சாதி மத வெறிக்கு எதிர்ப்பு என பல்வேறு சமூக பிரச்சினைகளில் தொடர்ந்து குரல் கொடுத்தார். அதிகாரத்திற்கும் ஆதாயத்திற்கும் தலைகுனியாத நிலைப்பாடு அவரை தனித்துவமான தலைவராக மாற்றியது. மக்கள் நலனே முதன்மை என்ற கொள்கையை வாழ்நாள் முழுவதும் கடைபிடித்தார்.

தமிழின வளர்ச்சிக்கும் சமூக நீதி நிலைநாட்டவும் பெரும் பங்களிப்பு செய்த அவருக்கு தமிழக அரசு அறிவித்த “தகைசால் தமிழர்” விருது மிகுந்த பொருத்தமானது. தன்னலமற்ற அரசியல்வாதியாக வாழ்ந்த நல்லகண்ணுவின் சேவை என்றும் பாராட்டுக்குரியது.

ஆயுள் முழுவதும் ரூ.52,000 ஓய்வூதியம்! எல்.ஐ.சி.யின் அசத்தல் திட்டம்!

வீடியோ!  5 அடி முதலையை விழுங்கும் மலைப்பாம்பு!!

வீடியோ! ராஜநாகத்துடன் ஆக்ரோஷமாக சண்டையிடும் கோழி!!

உங்க ராசிக்கேற்ற தொழில் எது? இந்த துறை அதிக லாபம் தரும்

லட்சத்துல கடன் இருந்தாலும் ஈஸியா தீர்க்கும் எளிய பரிகாரம்!