11,000 லிட்டர் பாலில் நர்மதா நதிக்கு அபிஷேகம்... பக்தர்களின் வினோத வழிபாடு!
மத்திய பிரதேச மாநிலத்தின் வாழ்வாதாரமாக விளங்கும் நர்மதா நதியில், சுமார் 11,000 லிட்டர் பாலை ஊற்றி பக்தர்கள் வழிபாடு செய்துள்ள வீடியோ தற்போது சமூக வலைதளங்களில் வெளியாகி பெரும் அதிர்ச்சியை ஏற்படுத்தியுள்ளது. புனித நீராடல் மற்றும் சிறப்பு வழிபாட்டின் ஒரு பகுதியாக, டேங்கர் லாரி மூலம் கொண்டு வரப்பட்ட அதிகப்படியான பால் நேரடியாக ஆற்றில் கொட்டப்பட்டது. மதச் சடங்கு என்ற பெயரில் இவ்வளவு பெரிய அளவிலான பால் நதியில் கலக்கப்பட்ட சம்பவம், சுற்றுச்சூழல் ஆர்வலர்கள் மற்றும் பொதுமக்களிடையே பெரும் விவாதத்தைக் கிளப்பியுள்ளது.
புனித நதியாகக் கருதப்படும் நர்மதாவிற்கு மரியாதை செலுத்தும் விதமாக இந்த வழிபாடு நடத்தப்பட்டதாகப் பக்தர்கள் தரப்பில் கூறப்பட்டாலும், அத்தியாவசியத் தேவையான உணவை இப்படி வீணாக்குவது நியாயமற்றது எனப் பலரும் கருத்து தெரிவித்து வருகின்றனர். குறிப்பாக, நாட்டில் லட்சக்கணக்கான மக்கள் ஊட்டச்சத்துக் குறைபாட்டால் அவதிப்படும் நிலையில், டன் கணக்கில் பாலை ஆற்றில் கொட்டுவது கடவுளுக்குச் செய்யும் தொண்டாக இருக்க முடியாது எனச் சமூக ஆர்வலர்கள் சுட்டிக்காட்டுகின்றனர். இந்த வீடியோ வைரலானதைத் தொடர்ந்து, இதுபோன்ற வீணடிப்புச் செயல்களைத் தடுக்க அரசு நடவடிக்கை எடுக்க வேண்டும் என்ற கோரிக்கையும் வலுத்து வருகிறது.
மேலும், ஆற்றில் அதிகப்படியான பாலைக் கொட்டுவது நீரின் தன்மையை மாற்றி, நீர்வாழ் உயிரினங்களுக்குப் பாதிப்பை ஏற்படுத்தும் எனச் சுற்றுச்சூழல் வல்லுநர்கள் எச்சரிக்கின்றனர். "பக்தி என்பது பிறருக்கு உதவும் வகையில் இருக்க வேண்டுமே தவிர, பொருட்களை வீணாக்குவதில் இல்லை" என இணையவாசிகள் தங்களது கண்டனங்களைப் பதிவு செய்து வருகின்றனர். ஏற்கனவே பல இடங்களில் இது போன்ற பால் அபிஷேகங்களுக்கு எதிராக விழிப்புணர்வு ஏற்படுத்தப்பட்டு வரும் நிலையில், நர்மதை நதியில் நடந்த இந்தச் சம்பவம் மீண்டும் ஒருமுறை வழிபாட்டு முறைகள் குறித்த கேள்வியை எழுப்பியுள்ளது.
ஆயுள் முழுவதும் ரூ.52,000 ஓய்வூதியம்! எல்.ஐ.சி.யின் அசத்தல் திட்டம்!
வீடியோ! 5 அடி முதலையை விழுங்கும் மலைப்பாம்பு!!
வீடியோ! ராஜநாகத்துடன் ஆக்ரோஷமாக சண்டையிடும் கோழி!!