பாஜக தேசிய செயல் தலைவராக நிதின் நபின் பொறுப்பேற்றார்.. இளம் தலைவருக்கு நட்டா, அமித் ஷா வாழ்த்து!

பாரதிய ஜனதா கட்சியின் (பாஜக) தேசியச் செயல் தலைவராகப் பீகார் மாநில அமைச்சரான நிதின் நபின் நேற்று (டிசம்பர் 14) அறிவிக்கப்பட்ட நிலையில், இன்று அவர் டெல்லியில் உள்ள கட்சித் தலைமையகத்தில் முறைப்படிப் பொறுப்பேற்றுக் கொண்டார். 45 வயதாகும் நிதின் நபின், பாஜகவின் மிகவும் இளம் வயது தேசியச் செயல் தலைவராகப் பொறுப்பேற்றுள்ளது குறிப்பிடத்தக்கது. அவருக்குக் கட்சியின் தேசியத் தலைவர் ஜே.பி. நட்டா, உள்துறை அமைச்சர் அமித் ஷா உள்ளிட்டோர் வாழ்த்துத் தெரிவித்தனர்.

பீகார் மாநில அமைச்சரான நிதின் நபின், இன்று டெல்லியில் உள்ளக் கட்சித் தலைமையகத்துக்கு வருகை தந்தபோது, அவருக்கு மலர் தூவியும், பூங்கொத்துகள் மற்றும் சால்வைகள் அணிவித்தும் உற்சாக வரவேற்பு அளிக்கப்பட்டது. இதையடுத்து, கட்சித் தலைமையகத்தில் உள்ள ஷியாம பிரசாத் முகர்ஜி மற்றும் தீன் தயாள் உபாத்யாயா ஆகியோரின் சிலைகளுக்கு அவர் மாலை அணிவித்து மரியாதை செலுத்தினார்.

இந்தச் சமயத்தில், பாஜகவின் மூத்தத் தலைவரும் மத்திய உள்துறை அமைச்சருமான அமித் ஷா, தேசியத் தலைவர் ஜே.பி. நட்டா ஆகியோர் பூங்கொத்துக் கொடுத்து அவருக்கு வாழ்த்துத் தெரிவித்தனர். மேலும், ஏராளமானக் கட்சி நிர்வாகிகளும் அவருக்கு வாழ்த்துக்களைத் தெரிவித்தனர். பொறுப்பேற்பதற்காக டெல்லி புறப்படுவதற்கு முன்பாகச் செய்தியாளர்களிடம் பேசிய நிதின் நபின், இந்த உயரியப் பதவிக்குத் தன்னை உயர்த்தியதற்குப் பீகார் மக்கள் மற்றும் தனது தொகுதி மக்களுக்கு மனமார்ந்த நன்றியைத் தெரிவித்துக் கொண்டார்.

"இந்த வாய்ப்பை வழங்கிய பிரதமர், உள்துறை அமைச்சர், பாதுகாப்புத் துறை அமைச்சர் உள்ளிட்ட அனைத்துத் தலைவர்களுக்கும் எனது நன்றியைத் தெரிவித்துக் கொள்கிறேன். எனக்குப் பிரதமரின் ஆசிர்வாதம் இருக்கிறது. அவர் வழங்கிய வழிகாட்டுதலையும் தலைமைத்துவத்தையும் நான் தொடர்ந்து முன்னெடுத்துச் செல்வேன்" என்றும் அவர் கூறினார்.

பாஜக மூத்தத் தலைவர் மறைந்த நபின் கிஷோர் பிரசாத் சின்ஹாவின் மகனான நிதின் நபின், தந்தையின் மறைவுக்குப் பிறகு அரசியலில் தீவிரமாக இறங்கிப் பாட்னா பாங்கிபூர் சட்டப்பேரவைத் தொகுதியில் வெற்றி பெற்று எம்.எல்.ஏ.வாக இருக்கிறார். கடந்த 2006-ஆம் ஆண்டு முதல் தொடர்ந்து 2025 சட்டப்பேரவைத் தேர்தல்கள் வரை ஐந்து முறை வெற்றி பெற்றுள்ள அனுபவம் இவருக்கு உண்டு. தமிழகம், கேரளா உள்ளிட்ட மாநிலங்களில் அடுத்த ஆண்டுச் சட்டப்பேரவைத் தேர்தல் நடைபெற உள்ள நிலையில், அங்கு நிதின் நபின் வழிகாட்டுதலின்படி தேர்தல் பணிகளில் பாஜக ஈடுபடும் என்று கட்சி வட்டாரங்கள் தெரிவித்துள்ளன.

ஆயுள் முழுவதும் ரூ.52,000 ஓய்வூதியம்! எல்.ஐ.சி.யின் அசத்தல் திட்டம்!

வீடியோ!  5 அடி முதலையை விழுங்கும் மலைப்பாம்பு!!

வீடியோ! ராஜநாகத்துடன் ஆக்ரோஷமாக சண்டையிடும் கோழி!!

உங்க ராசிக்கேற்ற தொழில் எது? இந்த துறை அதிக லாபம் தரும்

லட்சத்துல கடன் இருந்தாலும் ஈஸியா தீர்க்கும் எளிய பரிகாரம்!